Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu aku mangkita wo’u yangi to bou pasi lino to bou, apa yangi to uyunya pasi lino to uyunya roomo rawali yau pasi tasi tamo re’e.
2 Pasi aku re’e seja mangkita kota to mapasing, to tudumaka yako resi i Pue Allah ndate saruga. Kota etu semo Yerusalem to bou. Pasi kota etu rapasilonga ewa raika mampasilonga tau we’a to mampake baju to magaya kojo yau mangantomu to langkai to danaporongo.
3 Wali ojo karoonya aku mangkita kota etu, panewa aku mangandonge wo’u loo to maroso yako ri gadera Makole. Loo etu manganto’o, “Lo’aja, tampa nakaroo i mPue Allah re’e ri oyo nto lino. Ia damaroo resi sira, pasi sira damawali tauNya. Wali i Pue Allah semo damaroo ri oyo nsira panewa Ia damawali Allah to napue nsira.
4 Ia damampalasi yau samparia ue mata nsira. Pasi tempo etu tamo re’e kapate, pasi tamo re’e kamawo ndaya, pasi tamo seja re’e to tumangi bara ntida, apa samparia to re’e tempo ruyu room rawali yau.”
5 Wali Ia to matunda ri gaderaNya etu, Ia manganto’o, “Lo’a, samparia anu to tempo ruyu Aku mangawali yau mawali bou wo’u.” Pasi Ia manganto’o seja, “Tulis gombo si’i apa gombo si’i monso pasi masipato rasarumaka.”
6 Panewa Ia manganto’oka aku, “Room! Aku semo Alpa pasi Omega, batuanginya Aku semo pamulanya pasi kapuranya. Wali i sema-sema to mangau warokonya Aku damangawaika ia damanginu ue yako ri mata nu ue to mangawaika katuwu, pasi ia taa damangabayar ue etu.
7 Wali i sema-sema to manang, ia damangantima samparia anu to si’i. Pasi Aku damawali Allahnya, pasi ia damawali anangKu.
8 Pei tau to maleo, pasi tau to taa mangaya Aku, tau to kajimi, tau to mampopate sa’e, tau to magoyal, tau to mampake do’a, tau to mampue pue to yusa pasi samparia tau to masanang sangkani mawuti, tau to ewa wetu tare ri Yerusalem to bou, sira re’e la’u rano nu apu pasi sedawa to mawea. Etu semo kapate to kadua.”
9 Wali ojo karoonya Ia magombo, panewa ma’i wo’u pomakau i mPue Allah. Ia samba’a yako ri pomakau pitu to mangkongko yama pitu to la’u pitu soba to kapuranya. Wali pomakau etu magombo resi aku, ia manganto’o, “Mai, aku damampaporaoka korom Kasimpande nu Ana Domba, etu semo ia to damawali rongonya.”
10 Wali ojo karoonya etu, aku nawaika i Nosa Mapasing pangkita. Ri raya mpangkitangku etu, aku nakeni mpomakau to mampogomboka aku ngena nto’u rapa ntongku to bae pasi malangan. Ojo karata mami dua ndate rapa ntongku etu, ia mangansuduka aku kota to mapasing, etu semo Yerusalem, kota to ma’i yako resi i Pue Allah ndate saruga.
11 Wali kota etu nja’u kayawa i mPue Allah, pasi kota etu makilo ewa watu to masuli olinya to rato’oka yaspis. Yaspis etu polas ralo’aka ewa kasa to rato’oka kristal.
12 Kota etu tiku rindi watu to bae pasi malangan. Rindi etu re’e sampuyu pei dua wombo. Wombonya etu nja’u pomakau i mPue Allah sampuyu pei dua. Ponto-ponto wombo etu, nja’u samba’a pomakau i mPue Allah. Pasi ponto-ponto wombo etu re’e sanga to ratulis, sanga etu semo sanga nu suku nto Israel to sampuyu pei dua.
13 Wali rindi ngkota etu re’e togo wombo tondo mata nu eo, pasi re’e togo seja wombo tondo utara, pasi re’e seja togo wombo ri tondo selatan panewa re’e seja togo wo’u wombo tondo ri kasoyo nu eo.
14 Wali rindi etu re’e sampuyu pei dua watu raposaka ri tundasinya. Watu etu re’e seja sanga to ratulis, etu semo sanga mpomakau nu Ana Domba to sampuyu pei dua.
15 Wali pomakau to mampogomboka aku etu ia re’e mangkongko toko weyawa to rapake mangansukat kota etu, wombonya pasi rindinya seja.
16 Kota etu magopa opo. Karadenya sewaju pei katawaanya. Wali pomakau etu mangansukat kota etu ia mangampake tokonya. Wali kota etu karadenya dua nsowu pei opo atu kilometer. Panewa ewa see seja katawaanya pasi kalanganinya.
17 Panewa yako etu pomakau etu mangansukat seja rindi ngkota. Sukat to napake mpomakau etu, sewaju pei sukat to napake nto lino. Wali rindi etu ono mpuyu meter kalanganinya.
18 Wali rindi ngkota etu raika yako watu to rato’oka yaspis, pasi kota etu raika yako weyawa to mayongo kojo pasi to polas ralo’aka ewa kasa.
19 Pasi watu to tundasi nu rindi ngkota etu rapakagaya kojo mangampake mpangaya-ngaya watu to masuli olinya. To uyunya watu to polasi ralo’aka to rato’oka yaspis. To kadua watu to maliwuyu ewa yangi, watu to rato’oka nilam. Panewa to katogo watu buya to rato’oka mira. To kaopo watu maliwuyu ewa ira, watu to rato’oka samrud.
20 To kalima watu buya mawaa to rato’oka unam. To kaono watu mawaa to rato’oka sardis. Watu to kapitu watu makuni to rato’oka ratna sempaka. Panewa to kawayu watu maliwuyu ewa tasi, watu to rato’oka beril. To kasio watu makuni to rato’oka krisolit. To kasampuyu watu maliwuyu to rato’oka krisopras. To kasampuyu pei samba’a watu to makamumu to rato’oka lasuardi. Pasi watu to kasampuyu pei duanya makamumu seja, etu semo watu to rato’oka kesubung.
21 Wali wombo ndindi to sampuyu pei dua, etu semo watu to buya pasi maliongu to rato’oka mutiara. Ponto-ponto wombo raika etu sampa’i mutiara to bae. Pasi jaya ngkota etu raika yako weyawa to mayongo kojo to polas ralo’aka ewa kasa.
22 Wali aku tare mangkita Banua i mPue Allah ri kota etu, Banua to napago ntau yau mampue mampakabae i Pue Allah. Tamo parluu Banua etu apa i Pue Allah anu Makuasa pasi Ana nu Domba Sira sangkani maroo nja’u ria, wali juku ri kota etu tau maya mampue mampakabae Sira.
23 Pasi kota etu tamo parluu wo’u karemenya yako eo pasi wuya. Apa kayawa i mPue Allah etu semo mampakareme pasi Ana nu Domba Ia semo lampunya.
24 Wali samparia to lino to si’a to Yahudi sira damalinja ri raya ngkareme nu kota etu. Pasi makole-makole nto lino damangkeni kasuginya nja’u raya ngkota etu.
25 Wombo ngkota etu sangkani tiloka. Tare raba’a wombo etu apa taa mawali wuri nja’u ria.
26 Wali to lino sira damangkeni samparia anu to meyawa pasi samparia kasuginya nja’u raya ngkota etu.
27 Pei ri kota etu tare anu to makarika to maya masua ri rayanya. Pasi tau to mangika palaong to maja’a bara tau to mawuti, tau etu taa seja maya masua ri raya ngkota etu. Ojo tau to re’e sanganya ratulis ri raya buku ngkatuwu to Ana nu Domba puenya, ojo patanya tau etu sira maya masua njo’u raya ngkota etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA