Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sudah tu ambo maliyek langik nan baru, jo bumi nan baru. Langik nan partamu, jo bumi nan partamu pun lah ilang, lauik pun lah ilang-lanyok.

² Mako ambo maliyek kota nan suci tu, iyolah Yerusalem nan baru, turun dari sarugo dari Allah. Kota tu lah disadiyokan, bakcando surang anak daro nan lah disegehi, untuak manamui marapulai.

³ Sudah tu ambo mandanga suwaro dari kurisi tu, basaru jo suwaro nan kuwaik, "Kiniko tampaik tingga Allah adolah samo-samo jo manusia! Baliau iduik samo jo urang-urang tu, urang-urang tu ka manjadi umaik Baliau. Allah sandiri ka barado samo jo urang-urang tu, sarato manjadi Allah nyo.

⁴ Baliau ka manyeka sagalo ayie mato, dari mato urang-urang tu. Kamatian indak ka ado lai; kasadiahan, ratok-tangih, atau kasakiktan pun indak ka ado pulo lai. Sagalo parkaro nan lamo lah ilang-lanyok."

⁵ Sudah tu Baliau nan duduak di ateh kurisi tu bakato, "Kiniko Aden manjadikan sadonyo baru!" Baliau bakato pulo kabake ambo, "Tulihkanlah ko, dek karano kato-kato ko bana, sarato dapek dipicayoi."

⁶ Sudah tu Baliau bakato, "Lah salasai! Adenlah nan partamu, Adenlah nan tarakir; Adenlah Tuhan dari Sajak Samulo sampai Ka Akienyo. Satiyok urang nan auih, ka Den agiah minun sacaro perai, dari tampaik asa ayie nan mambari iduik.

⁷ Urang-urang nan manang, ka manarimo kasadonyo tu dari Den. Aden ka manjadi Allahnyo, nan inyo manjadi anak-Den.

⁸ Tapi urang nan pangacuik, nan pangkianaik, nan kurang aja, nan pambunuah, nan cabul, urang nan manaruah alemu capak-capak baruak, nan panyambah barhalo, nan panduto, kasadonyo ka dibuwang masuak lauiktan api babalerang, nan banyalo-nyalo, iyolah kamatian tahap kaduwo."

⁹ Surang di antaro katujuah malekaik, nan lah mamacik salah ciyek cawan, nan panuah jo katujuah bala bancano tarakir tu, datang kabake ambo sambia bakato, "Kamarilah! Ambo ka manunjuakkan kabake angkau Anak Daro, iyolah Anak Daro dari Anak Domba."

¹⁰ Mako Roh Allah manguwasoi ambo, malekaik tu mambawok ambo ka puncak gunuang nan sangaik tinggi. Inyo manunjuakkan kabake ambo Yerusalem, kota nan suci tu, kota tu turun dari sarugo, dari Allah,

¹¹ jo sumarak sarato jo kabasaran Allah. Kota tu bakilauan bakcando batu parmato, bakcando batu baiduri pandan nan janiah, saroman jo kristal.

¹² Tembok nan di sakuliliangnyo tinggi gadang, ado duwo baleh pintu kaporonyo, sarato nan dijago dek duwo baleh urang malekaik. Disatiyok pintu kaporonyo, tatulih namo-namo kaduwo baleh suku banso Israel.

¹³ Ka satiyok arah, ma adok tigo buwah pintu kaporo, tigo ma adok ka matoari tabik, tigo ma adok ka ilie, tigo ma adok ka mudiak, tigo ma adok ka matoari tabanam.

¹⁴ Tembok kota tu, ditonggokkan di ateh duwo baleh batu sandi. Disatiyok batu sandi tu, tatulih namo kaduwo baleh urang rasul Anak Domba tu.

¹⁵ Malekaik nan mangecek jo ambo tu, ado mampunyoi tungkek pa ukua dari ameh, untuak ma ukua kota tu, sarato untuak pa ukua pintu-pintu kaporonyo sarato jo temboknyo.

¹⁶ Kota tu bantuaknyo basagi ampek -- panjangnyo samo jo lebanyo. Mako malekaik tu ma ukua kota tu, jo tungkek pa ukuanyo; tanyato panjangnyo 2400 kilo; leba sarato jo tingginyo, samo bakcando panjangnyo.

¹⁷ Kutiko malekaik tu ma ukua temboknyo, tanyato tinggi tembok tu saratuih ampek puluah ampek eto. Ukuaran nan dipakai dek malekaik tu, adolah ukuaran nan dipakai dek manusia.

¹⁸ Tembok kota tu dibuwek dari batu baiduri pandan, sadangkan kotanyo dibuwek dari ameh tulen, janiah bakcando camin.

¹⁹ Kasadonyo batu sandi kota tu, ba agiah ragi jo sagalo macam batu parmato. Batu sandi nan partamu dibuwek dari batu baiduri pandan, nan kaduwo dari batu nilam, nan katigo dari batu yakut, nan ka ampek dari batu jamrud,

²⁰ nan kalimo dari batu baiduri sepah, nan ka anam dari batu dalimo, nan katujuah dari batu ratna cimpako, nan ka salapan dari batu piruih, nan kasambilan dari batu topas, nan ka sapuluah dari batu krisopras, nan kasabaleh dari batu lazuardi, nan kaduwobaleh dari batu kacubuang.

²¹ Kaduwo baleh pintu kaporonyo tu, dibuwek dari duwo baleh mutiara, satiyok pintu dibuwek dari ciyek mutiara. Labuah di kota tu dibuwek dari ameh tulen, janiah bakcando camin nan bakilek.

²² Ambo indak ado doh manampak Rumah Allah di dalam kota tu, dek karano Rumah Allahnyo iyolah Tuhan sandiri, Allah Nan Mahakuwaso, sarato jo Anak Domba tu.

²³ Kota tu indak paralu doh ditarangi jo matoari atau jo bulan, dek karano kabasaran Allah manaranginyo, nan Anak Domba tu adolah lampunyo.

²⁴ Sagalo banso di dunia ka bajalan dalam cahayonyo, rajo-rajo pun ka bi mambawok arato-bandonyo ka dalam kota tu.

²⁵ Kasadonyo pintu kaporo kota tu, ka tabukak sapanjang ari; indak ka disawokkan bagai doh, dek karano disinan indak ado lai ari nan malam.

²⁶ Kabasaran, sarato jo arato-bando sagalo banso, ka dibawok ka dalam kota tu.

²⁷ Tapi, urang nan mangarajokan karajo-karajo nan manjajokkan, atau urang nan panduto -- singkeknyo curito, apo pun nan najih, sabana indak ka dapek doh masuak ka kota tu. Nan ka masuak hanyolah, urang nan namonyo layi tatulih di Kitab Kahidupan, iyolah kitab Anak Domba tu.

Wahyu

Video Wahyu 21

Ikuti Kami:

KONTAK | PARTISIPASI | DONASI