Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de tamake 'o mala'ekati moi 'i'uti 'o sorogaaku. Ma giamoka ya'aono 'o ngomasa ma dorou ma ngii dau 'ikuru-kurutuku ma kuci de 'o bu-busuku moi 'iamo-amoko.

² Ge'enaka de 'o mala'ekati ge'ena yatagoko 'o naga; ge'ena la 'o ngia gee ka ma sirasi de ma 'enau, gee yosironga 'o Tokata ma Koana bolo 'o Ngomasa ma Dorou ma Balusu. 'O mala'ekati ge'ena yapusuku 'o Tokata ma Koana ge'ena de ya'umo dau 'o ngomasa ma dorou ma ngiiku. Ge'enaka de yakuciokau ma ngii ma da-damunu ge'ena, 'asa de yano-nakokau. 'O Tokata ma Koana salingou 'o taunu caana moi ya'umoku dau 'o ngomasa ma dorou ma ngiioka, de ge'ena ma do'ingono 'ena koidadiwa yosihaga 'o nyawa 'o duniaka. Ge'ena 'ipasa, de 'ena salingou yapidilika 'o 'orasi moi.

³ (20:2)

⁴ Ge'enaka de tamake 'o sagala go-gogere 'isure-sure, de 'o nyawa gee yogoge-gogeruku 'o go-gogere 'isure-sureka ge'ena, yakikula 'o kuasa ma ngale 'o hukumani yosiputusu. Ngoi tamake mita 'o nyawa gee manga saeke ya'ogu-'oguokau sababu 'ona yokula 'o sakisii ma ngale 'o Yesus de yosidagi 'o habari ma Jo'oungu ma Dutuno. 'O nyawa-nyawa go'ona koyasubawa 'o haewani bolo ma haewani ma patongo. 'Ona mita koma'iwa yadawongo 'o haewani ge'ena ma no-nako manga mengaka bolo manga giamoka. So 'ona yowangoli de yomasidapareta de ma Kristus 'o taunu caana moino.

⁵ Ne'ena ma di-disiraka 'o nyawa yosonge-songenuku yakisiwangoli. (Ma 'o nyawa 'iregu-regu yosonge-songenuku gee koyakisimomikuwa ma 'orasi 'o taunu caana moino ge'ena.)

⁶ Yosanangioka 'o nyawa-nyawa gee 'ona mita yakisiwangoli gee ma 'orasi yosonge-songenuku yakisiwango ma di-disiraka ge'ena. 'Ona yadaene yodadi ma Jo'oungu ma Dutu 'awi kawasa. 'O songene ma warasa ma modidi koyakiparetawau 'onaka. 'Ona 'asa yodadi 'o 'imam-'imam ma ngale wileleani ma Jo'oungu ma Dutu de ma Kristus, de 'ona 'asa yopareta de ma Kristus 'o taunu caana moino.

⁷ Ma 'orasi 'o taunu caana moino ge'ena 'ipasaka, de 'o Tokata ma Koana 'asa yapidili ma ngiioka dau,

⁸ de 'asa 'itagi 'isihaga 'o nyawa-nyawaka 'o duniaka yasuluunuku. Ma nyawa-nyawa go'ona yakisironga 'o Gog de 'o Magog. 'O Tokata ma Koana 'asa yakipolu 'o nyawa gee 'idadi yakisihaga de dua yaki'asa yopa-parangi ma ngiika. 'Ona posironga manga gudaioka so kopa'akunuwa pakidoimi.

⁹ So 'ona mita yopiakoro 'o dunia yasuluunuku de yosibululunu 'o kota gee ma Jo'oungu ma Dutu wosiboso-bosono ge'ena la 'awi kawasa manga ngii. Ma 'o 'uku 'i'uti 'o diwanguku de yaki'uku yakibootoka.

¹⁰ Ge'enaka de 'o Tokata ma Koana gee yakisihaga-haga 'onaka, yosi'umo 'o 'uku kaingoo-ngootuku ge'ena la 'o walira 'iluru-lurusuku. Ge'enakau 'o haewani de 'o nabii yoelu-eluku manga ngii. 'Ona 'asa yakisikisaa 'o wange de 'o obiri kaisi'ado-'adonika.

¹¹ Ge'ena 'ipasa de towimake ma Jo'oungu ma Dutu wogogerie 'o koana ma go-gogere ya'are-'arese de 'iamo-amokoka. 'O diwanga de 'o dunia 'iisanga 'awi bionoka so koi'iwau.

¹² De tamake 'o nyawa-nyawa yosonge-songene gee yola-laagomo de koyola-laagomuwa yoodumu yoma'okode 'o go-gogere ge'ena ma bionoka. So 'o buku-buku yapelenga. Ge'enaka de 'o buku 'iregu moi yapelenga, ge'ena la 'o Nyawa Yo'ahu-'ahu ma Buku. Ge'enaka de 'o hukumani yosiotaka 'o nyawa yosonge-songenuku, moteke to 'ona manga manarama 'isoka gee 'isilefokau 'o buku-bukuoka ge'ena.

¹³ Ge'enaka de 'o nyawa gee yosonge-songene 'o ngootoka yakisitaari ma Jo'oungu ma Dutuka sababu 'una 'asa wakilega ma diai. 'O Songene de 'o Songene ma Ngii yakisisarakani 'o nyawa yosonge-songenuku 'o songene ma ngiioka go'ona, de ma Jo'oungu ma Dutu mita wakihakimi moteke to 'ona moi-moi manga di-diai.

¹⁴ Ge'enaka de 'o Songene de 'o Songene ma Ngii yosi'umo 'o 'uku kaingoo-ngootuku. ('O 'uku kaingoo-ngooto ne'ena ge'ena 'o songene ma warasa ma modidi.)

¹⁵ 'O nyawa-nyawa gee manga ronga koisilefokuwa 'o bukuoka gee 'o nyawa 'o 'ahu 'ika-kakali yamake-make manga ronga 'isilefo-lefoku, 'ona yaki'umo 'o 'uku kaingoo-ngootuku.

Wahyu

Video Wahyu 20

Ikuti Kami:

KONTAK | PARTISIPASI | DONASI