Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sug sud hom geisa kuda medgomori graga en erba aremeta dara gembala areibahau lahwas se dum smougwohob, kaba, dan deiya deit, doba malaikad hom gos gusin naugb ijou mes. Dara en odo aumaga dau kermum icira en mesira, kaba, en ouwaden dau bogo.

² Dangga sug en ouwadenohob, kaba, en agaigeij Wor naugb en ahud en mesira dara en mohora darem. Hanoba en erba en deb se ijou mes naugb arisogomoc huntun sisa gin toua. Anai Wor gin, kaba, en augwohosa lusud. Dara en ohobas len. Dara en esedeh lo dougwo len toua namcirohob. Hang lusud lemeija en moho dag Hinogo Medam Gacgunog, dara Bilis, era Setan toua.

³ Sug malaikad erba Wor se ijou mesohob, kaba, en eic meh baihiron dougwo. Hanoba en eic sidgod gedig mesira mena ebsohob, adra dougwo meh gin toua. Dauntoba Wor ingga, kaba, en emagunya ucugb dau ijou mes naugb en emaugwohosa lusud toua deitero. Doba en eigtou se ijou mes se arisogomoc huntun sisa gin terimda. Dangga sug en eigtou se ijou mes se arisogomoc augwan gin bouwohob, kaba, len lec misis dau en naugb en augwohosa lusud mougwa hom dara deit, doba se lona aibibra dous. Anai gini aimo dau areg Allah en esedeb naugb enohob.

⁴ Dauwohob, kaba, dan deiya dau leng lomom icira Krisdus en moho gin, kaba, dag Allah eigdoumesa len laugwan aud maireseb menau geb huhugb deitohob. Anai len lemesijaresa aremeta gen dau dum mohu, dara len lemecguna dou men mocbobaga, dara len lemousa deisa men lusud naugb len led men hugba se len mersdemaga dara len merisira touwero. Doba len les agadgeij namcir naugb len los ladi Yesus en moho deseino lusud. Dara len lesai Allah en moro dou len toua terimdohob. Dangga sug en eigdoumesa len dau gomom ucugwohob, kaba, en eigdoumesa len meroho dag mougt mera gedeijan desij Krisdus naugb len lesedougwo lusud laugwan se arisogomoc huntun sisa. Hanoba len logod aremer aga len laugwan toua, anai dan deiya maija moc einyana. Dara lusud gedig Allah eic goubesa dou len naugb ginohob, kaba, len leigtou se maija moc ingga augwan toua. Aremer geino gin augwan, kaba, lusud leija dag geisa dau gomom gaimougtut.

⁵ Dangga len gedig laimo geisa dau gomom gaimougtut gin, kaba, len gin dous eng Allah ouci len debinim naugb en. Dara en eic geigouhw beb huhugb namcir dou len toua. Hang gomom gedig mougwa cuhwai se dum smougb, kaba, emeb naugb len toua deitero. Doba len ledag gembala gesa taij naugb len leic meren gesijaresa dag louwaharo dou Allah dara Krisdus lan terimda. Dara len ledag mougt mera gedeijan naugb len lesedougwo lusud desij Krisdus se arisogomoc huntun sisa gin toua. (Doba leng lomom gus gus, kaba, len laugwan latou debin len merug terimda arisogomoc huntun sisa gini ouwa dauwahabi, Allah emeigdoumesa len dau gomom deit.)

⁶ (20:5)

⁷ Sug arisogomoc huntun sisa gin ouwohob, kaba, len lec ijou mes dau Setan gin toua.

⁸ Dangga sug en agunyohob, kaba, en eihweda sungga sungga naugb en edaugwohosa len laugwan mougwa hom dara deit. Hanoba en ahwan len aud usi hom naugb len lesara dara Allah men lusud, gedig en ouci len debinim naugb enohob, len laugwan mougwa hom deit toua. Dara lusud areg Setan esa len deb naugb len lesara gin, kaba, emedeinyum naugb sug lusud lemecic len touwero. Doba len lebedero dag geria se dum mebera namcir. Hang len meroho dag Gog dara Magog, anai len laugwan ledag Allah men mocohob.

⁹ Sug Setan ouci len laugwan debinimohob, kaba, len lasij se ucina augwan. Hanoba len ledebeij Allah men cinogo gedig en medoc gororougb ginohob, kaba, len lerbacec men cinogo ingga an men lusud gedig en ouci len debinim naugb eninohob, len laugwan toua. Doba Allah en esa smougb dau bogaden naugb ait Setan men sadodor ingga, len laugwan merur mor namcir.

¹⁰ Doba Bilis gedig en augwohosa len graga, kaba, len lerba en desij aremeta gen dau dum mohu, dara gembala areibahau lan se dum smougb naugb sug smougb dau igdahab gohoseri gini eic gerij medam dou len astesda lona loba beb huhugb namcir.

¹¹ Dauwohob, kaba, dan deiya maija moc gogouf cucugb medam hom. Dara sud hom eigtou se maija moc gin toua. Dangga sug cinogo dara bogo lan laiya en, kaba, lan laugb dau en terimda en maires ecib dau lan namcir.

¹² Dara dan deiya leng lomom dau leng meroho agas, dara leng meroho eb tainya areg len latou debin len merug se arisogomoc huntun sisa ginohob, kaba, len laugwan leseino Allah men maija moc gin toua.

¹³ Anai dum mohu, dara gomom, dara w Seol len ledug leng lomom len laugwan ucugwohob naugb Allah ogod aremer debin len, aimo dau meren geicara dou len toua.

¹⁴ Dauwohob, kaba, en eh surad meh an meren geicara gin dou len. Dara en eh surad meh hom en moho maireseb menau geb huhugb dou len deit. Hanoba en ogod aremer debin len laugwan, aimo dau meren geicara areg en og deb se meren surad ingga toua. Dangga en ecic, doba gareg en moho emeb se Surad Maireseb Menau Geb Huhugb ginero, kaba, en erba len laugwan se dum smougb namcir.

¹⁵ Dara gomom dara w Seol, kaba, sug lan ladug leng lomom len laugwan ucugwohob, kaba, Allah erba lan toua se dum smougb namcir. (Hang dum smougb gin, kaba, lusud leija gini dag gomom mougwa cuhwai icira toua.)

Wahyu

Video Wahyu 20

Ikuti Kami:

KONTAK | PARTISIPASI | DONASI