Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Limbah te aku mite ije biti malekat mohon bara sorga. Intu lengee ie mimbing kunci lowang pampatei tuntang ije pasong hai.
2 Palus ie manawan naga, naga bakas te, -- iete setan atawa Roh Papa te -- tuntang mamasong ie katahin sakoyan nyelo.
3 Limbah malekat te manjakah naga te akan huang lowang pampatei, balalu mangunci lowang te hapan segel mangat naga te dia tau tinai mananjaro kare bangsa helo bara sakoyan nyelo te hapus. Limbah te ie musti malapase tinai hanjulo.
4 Balalu aku mite kare padadusan, tuntang kare oloh je mondok hunjue te inenga kuasa uka mamutus perkara. Aku mite kea kare hambaruan oloh je jari inetek takoloke awi ewen manyaksi tahiu Yesus, tuntang mambarita auh peteh bara Hatalla. Kare oloh te dia manyembah meto, atawa hampatonge. Dia kea ewen puji manarima tanda bara meto te intu lingkau atawa intu lengen ewen. Maka ewen belom haluli tuntang marentah kilau raja haya-hayak dengan Kristus katahin sakoyan nyelo.
5 Jetoh ie tingkat je solake oloh matei imbelom haluli. (Tapi kare oloh matei awang beken te dia imbelom haluli katahin sakoyan nyelo te.)
6 Salamat kare oloh je omba imbelom haluli hong katika je solake te. Ewen te patut manjadi oloh ain Hatalla. Pampatei je ambal due dia aton kuasae mawi ewen. Ewen kareh manjadi oloh imam Hatalla tuntang kare imam Kristus; tuntang ewen kareh marentah hayak Dengae sakoyan nyelo katahie.
7 Limbah wayah sakoyan nyelo te hapus, setan kareh ilapas bara ekae ingurong,
8 tuntang ie kareh haguet mananjaro kare bangsa je kasaburan hong hapus kalunen, iete Gog tuntang Magog. Setan mamumpong ewen mangat hakalahi, ewen te paham toto karee, sama kilau pasir hong tasik.
9 Maka ewen te kasaburan hong hapus kalunen, palus mangapong eka kemah ain ungkup Hatalla tuntang lewu je inyinta Hatalla. Tapi apui mohon bara langit tuntang mambinasa ewen.
10 Limbah te setan je manipu ewen, injakah akan huang tasik apui tuntang barirang. Intu hete eka meto tuntang nabi pananjaro te bihin jari injakah. Ewen kareh ingapehe handau hamalem palus katatahie.
11 Limbah te aku mite ije padadusan baputi je hai tuntang oloh je mondok hunjue. Langit tuntang petak lilap bara hila baue, sampai jaton gitan tinai.
12 Tuntang aku mite kare oloh matei, hai, korik, mendeng intu taharep padadusan te. Maka kare surat mahin iukei. Palus ije surat je beken iukei iete Surat ain Oloh Belom. Limbah te hukuman ilalus akan oloh matei, mambaleh akan ewen tumon ampin gawin ewen kilau je inyurat huang kare surat te.
13 Palus tasik manyarah kare oloh matei je aton intu huange. Pampatei tuntang Lewun Pampatei mahin manyarah kare oloh matei je aton intu ie. Tuntang kare oloh matei te samandiai ihukum manumon kare taloh gawie.
14 Limbah te Pampatei tuntang Lewun Pampatei injakah akan huang tasik apui. (Tasik apui toh iete pampatei je kaduee.)
15 Kare oloh je jaton inyurat arae huang Surat ain Oloh Belom, inganan akan huang tasik apui.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA