Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de tamake 'o mala'ekati 'iregu moi 'i'uti 'o sorogaaku. To 'ena ma kuasa posironga ma amoko, de to 'ena ma kumati ma letongo so 'o dunia 'ikinitara ka ma moiku.

² De ma 'ilingi 'iamo-amokie 'imapoaka 'ingose 'ato, "'Itorouokau! 'O Babel 'iamo-amoko 'itorouokau! Ma 'orasi ne'ena 'ena 'imadadi 'o sagala tokata ma ngii. Ge'enaka dau 'i'ahu 'o sagala namoro gee nanga bo-bosono de gee 'o nyawa yodu-du'uduku.

³ Sababu 'o sagala nyawa ya'okerokau to 'ena ma nyafisuu 'ito-torou ma 'anggur. 'Ena ge'ena la 'o ngeweka mimoi 'ami roese mowuku-wukunu. 'O duniaka ma koa-koana yodiai 'o nyafisuu 'ito-torou de de muna, de gee 'okia sonaa yomawuku-wukunu 'o duniaka yakisikayakau de to muna 'ami nyafisuu ma dorou gee koma'akunuwa mapareta."

⁴ Ge'enaka de to'isene 'o 'ilingi 'iregu daku 'o sorogaaku kaingosekau, "'Ai kawasa! Tagi minimada muna! 'Uwa ngini niodomoteke to muna 'ami di-diai 'isowo-sowono la 'uwa niamoku 'o hukumani de de muna!

⁵ Sababu 'ami sowono posironga ma amoko, de ma Jo'oungu ma Dutu kowamongoruwa to muna 'ami di-diai 'ito-torou.

⁶ Ngini salingou niodiai 'ito-torou munaka 'isoka kokia naga muna modi-diai 'o nyawa-nyawaka. Ngini salingou niosikilioro 'o dorou munaka 'ilape modidiku de gee muna modi-diai. Ngini salingou niodarisi to muna 'ami sawokuku 'o daluku ma gosaka gee ma guata 'ilape modidiku de gee muna mokula-kula 'o nyawaka, ma ngale minihukumu.

⁷ Niokula munaka 'o sangisara de 'o balisa gee kaimatero de kokia naga yaika muna momaie de 'ami pareta de kokia naga yaika mi korago. Sababu muna kaitaurika mongose muna ma sireteka konee: 'Ngoi ne'ena 'o koana 'o ngeweka gee topa-pareta! Ngoi ko 'o bao-baowa; ngoi 'asa kotamaowa 'o balisa!'

⁸ Ge'enau so ma Jo'oungu ma Dutu 'asa kawositaitino womihukumu de 'o panyake, 'o balisa, de 'o baulaco. Muna 'asa mi'uku sababu ma Jo'oungu ma Dutu gee woku-kuasa 'asa wosiputusu to muna 'ami hukumani."

⁹ 'O koa-koana 'o duniaka gee yamote-moteke to muna 'ami di-diai 'ito-torou, de mita 'o ngeweka gumuna 'ami nyafisuu, 'asa yodagari de yodoto-tora 'o kota ge'ena gee yamake ma 'uku ge'ena ma dowo 'ikuwuwulu ma kotaka ge'ena.

¹⁰ 'Ona 'asa yoma'okode 'o gurutika, sababu yodomodongo 'ona mita yakidaene 'o sikisaa ge'ena. 'Ona kayongosekau, "Tei, posironga 'itorouoka 'o kota gee kiaka naga bato yogi-gi'isene -- 'O Babel ma kota gee 'ikua-kuata! Ka 'o 'orasi moi 'ena ma Jo'oungu ma Dutu wahukumokau!"

¹¹ 'O nyawa gee yomawuku-wukunu 'o duniaka mita yo'ari de yobalisa sababu 'o kota ge'ena, ge'ena la muna gee 'ami roese mowuku-wukunu, sababu komoiwau ya'ija to muna 'ami kia sonaa mowuku-wukunu.

¹² Komoiwa ya'ija to muna 'ami guraci, 'ami saaka, 'ami permata, 'ami mustika, mita 'ami mosa 'isure-sure, ya'ungu-'ungu 'ihali-hali, de gee yosironga 'o sutara, de mita 'o mosa 'ite-tereboko 'isi'osa-'osaka, 'o sagala gota gee rekeni koyamake-makewa. De mita 'okia sonaa gee 'o gading yadi-diaiku, de 'o gota gee 'ihali-hali yadi-diaiku, 'o tambaga yadi-diaiku, 'o besi de 'o marmar;

¹³ mita 'o kayu manis ma kai, 'okia sonaa ma bounu yaowa-owa, 'o gota ma tigono ma bounu yaowa-owa de 'ihali-hali, de 'o manyanyi; 'o 'anggur de 'o goooro, 'o gandum gee yadiaikou 'o tarigu de gee ko'uwasi, 'o sapi de 'o domba, 'o kuda de 'o goroba, 'o yongo-yongosi de mita 'o nyawa gee 'o parangi de yakitago-tagokino.

¹⁴ Yomawuku-wukunu gee kayongosekau 'o ngewekaka gumuna, "'Iodumu gee ngona nodua-duaka koi'iwau. De 'o sagala gee 'ani 'ahu 'isisa-sanangi de nisisure-sure gee 'iisangokau. Ngona 'asa konamakewau!"

¹⁵ Yomawuku-wukunu gee yokayakou sababu yomawukunu munaka, 'asa yoma'okode 'o gurutika sababu 'ona yakimodongo yakidaene 'o sikisaa. 'Ona 'asa yo'ari de yobalisa,

¹⁶ de kayongosekau, "Tei sioko! 'Itorouoka 'o kota ma amoko ne'ena! Ma kotaka ge'ena biasa yomasinoa 'o baju 'isure-sure, ge'ena la 'o baju 'ileto-letongo, 'i'alu-'alusu, de 'o mosa 'i'ungu-'ungu de yate-tereboko 'isi'osa-'osaka. De biasa yomasipake-pake 'o guraci, de 'o teto 'isure-sure de 'ihali-hali gee ma ronga permata de 'o mustika.

¹⁷ Ma ka 'o 'orasi moi ma dodaka duga, to 'ena ma korago ge'ena 'ikokiisangokau!" Yoodumu 'o kapali yo'asa-'asa, de 'o nyawa 'iregu-regu gee ma kapalioka yopare-parenuku, de gee yoma-manarama 'o kapalioka, de yoodumu gee manga 'ahu yononu 'o ngootoka, yoma'okode 'o gurutika.

¹⁸ 'O 'uku gee ma Babel ma kota ya'uku-'uku ge'ena yamake 'ikuwuwulu de 'ona yomapoaka yosigasoko yongose 'ato, "'O kota 'iregu koi'iwa 'isoka 'o kota ma amoko ne'ena!"

¹⁹ So 'ona yobiakoro 'o kakawo manga saeuku, ma no-nako 'ato 'ona yobalisa, de yo'ari yomapoa-poaka yosibetongo 'ato, "Tei 'itorouoka 'o kota 'iamo-amoko ne'ena! De to 'enau ma korago so 'o nyawa 'iodumu gee de manga kapali 'o ngootoka so yotagi yomawukunu 'o kapaluku, 'ona yokayakau! Ma ka 'o 'orasi moi ma dodaka duga de to 'ena ma kia sonaa ge'ena 'ikokiisangokau!"

²⁰ Ee, ngini gee 'o sorogaaka salingou niomorene sababu ma Jo'oungu ma Dutu watorouokau 'o Babel! Ma Jo'oungu ma Dutu 'awi kawasa, 'o su-suloko, de 'o nabii-nabii, salingou niomorene sababu ma Jo'oungu ma Dutu wahukumokau 'o Babel, ma ngale wosikilioro 'okia naga gee 'o Babel ma nyawa yodi-diaiokau nginika!

²¹ Ge'ena 'ipasa de 'o mala'ekati 'ikua-kuata moi yagoraka 'o teto ngai moi posironga ma amoko de ya'umo 'o ngootuku de kaingosekau, "Dua kone'enau ma Jo'oungu ma Dutu waisanga 'o Babel ma kota 'iamo-amoko, matero ka 'o ngootuku wa'umo so dua koi'iwau."

²² 'O tapakioka dua koi'iwau 'o ben ma 'ilingi, 'o koroncong ma 'ilingi, yoba-barija yonyanyi manga 'ilingi, de mita koi'iwau 'o suling de 'o torompet ma 'ilingi. 'O nyawa yoba-barija dua yoodumu koyaki'iwau, de 'o lusu de 'o du-dutuku dua koi'ilinginowau.

²³ 'O silo 'asa koiletonguawau ge'ena ma kotaka; de 'o nyawa 'asa koyo'isenuawau mita 'o ngaamoko ma rame ge'enaka. Sababu 'o nyawa yomawuku-wukunu ge'ena la 'o nyawa yola-laagomo 'o duniaka, de manga dawa-dawari ge'ena yakisihaga 'o sagala nyawa 'o duniaka!

²⁴ De ma Jo'oungu ma Dutu wahukumu 'o Babel sababu ma Babel ma nyawa yakito'omakau 'o nabii-nabii de ma Jo'oungu ma Dutu 'awi kawasa, de 'o nyawa 'iodumu gee yakito-to'omakau 'o duniaka.

Wahyu

Video Wahyu 18

Ikuti Kami:

KONTAK | PARTISIPASI | DONASI