Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali roo see aku mangkita samba’a pomakau i mPue Allah to yusa ma’i yako ndate saruga. Pomakau etu bae kuasanya, pasi kayawanya mampakareme lino.
2 Ia maroso loonya kaboo, manganto’o, “Napukamo, napukamo kota Babel to bae etu! Babel etu room nawali yau lipu measa, pasi mawali yau seja banua nsamparia nosa to maja’a, pasi gimpu nsamparia tonsi to makarika pasi to maja’a nakita ntau.
3 Kota Babel si’i naka pei mawali ewa see apa saba samparia bansa ri lino mangalulu lengkonya pasi pamporaninya to magoyal. Sira raporapaka ewa tau kayangu manginu tule. Pasi makole-makole nto lino room magoyal resi ia. To payoli pasi to pobalu ri sambawo lino, sira sugi apa sira mampobalu ngayangayanya to masuli resi to Babel, apa to Babel etu ojo ngaya-ngaya to masuli to bae batuanginya resi sira.”
4 Wali ojo karoonya pomakau etu magombo, aku mangandonge wo’u loo to yako ndate saruga, loo etu manganto’o, “Komi to Aku Puenya, pasuwu yako ri kota Babel, see komi taa damangika seja dosa to inikanya etu, pasi komi taa damangarata seja soba to ratanya.
5 Apa dosa to inikanya etu matapi-tapimo rata ndate yangi, pasi i Pue Allah Ia taa mangkalingan lengko ntau to maja’a etu.
6 Wali see naka Aku manganto’o, ewa wimba naika ngkota etu mangansesai sa’e, ika seja resi ia. Pasi balasika ia dua ngkani to ewa inikanya resi sa’e etu. Pasi ri raya nsangkir to si ia pasilongaka ia tule to dua ngkani kapa’inya yako ri tule to waikanya sa’e.
7 Ia mampakabae koronya, pasi ia mangaluluka yau pamporani to si ia to taa kojo tita’amaka. Wali waika ia kasesa pasi kamawo ndayanya to sewaju kaparinya ewa to inikanya etu. Apa ia mampobuuka ri rayanya, ‘Aku semo makole to we’a pasi aku matunda ri gadera makole. Aku si’a tau balu, pasi aku taa damangarata kamawo ndaya. Aku sangkani damasanang.’ Etu semo to ia mampobuuka.
8 Wali saba etu, see naka ri rayanya seo ia damangarata soba, etu semo panyaki, kamawo ndaya, pasi oro. Panewa ia daratunu yau, apa i Pue Allah anu to mangahuku ia makuasa kojo.”
9 Wali makole-makole nto lino to roomo magoyal resi Babel pasi to taa seja manta’amaka pamporani ndayanya to maja’a, sira damangkita kumbu nu apu to mangkoni yau Babel etu. Wali tempo sira mangkita kumbu nu apu etu sira datumangi mangantangis ia.
10 Sira damakore yako nja’u longko apa meka raya nsira mangkita kasesanya etu. Sira sakaboo manganto’o, “O Gete! Masesa kota Babel to bae pasi to maroso. Ri rayanya samba’aja jam korom roomo rahuku.”
11 Wali to lino to payoli pasi to pobalu, sira seja tumangi pasi mawo kojo rayanya mampobuuka kota etu, apa tamo re’e to mangoli ngaya-ngayanya.
12 Ngayangayanya to sira mampobalu etu, etu semo weyawa, pera, watu to masuli olinya, mutiara, kain to magaya ewa kain lena, kain to makamumu pasi to mawaa, kain to rato’oka sutra, mpangaya-ngaya kaju to magaya waunya, boros ngayanya to raika yako ngisi binatang to rato’oka gaja, boros ngaya-ngaya to raika yako kaju to masuli olinya, tambaga, wubu, watu pualam,
13 kaju momi, ramparampa, dupa, minya to rato’oka mur, soga to rato’oka kemenyan, tule, indol, terigu pasi jole, sapi pasi domba, jarang, bendi, pasi tau seja sira mampobalu yau damawali watua.
14 Wali to payoli pasi to pobalu etu, sira manganto’oka Babel, sira manganto’o, “Puramo wua ngkaju to nuporani ngkorom. Pasi puramo seja kasugimu pasi kayawamu, pasi korom tamo damangarata wo’u.”
15 Wali tau to mampobalu ngaya-ngaya to etu nja’u Babel, to mangarata kasuginya yako ri kota etu, sira seja damakore yako nja’u longko apa meka raya nsira mangkita kasesa etu. Sira seja datumangi pasi mawo kojo rayanya, sira manganto’o,
16 O Gete! Masesa kota to bae! Apa kota etu tempo ruyu ia mangampake kain lena to magaya pasi kain to makamumu pasi to mawaa, pasi mangampake seja weyawa, watu to masuli olinya, pasi mutiara.
17 Pei ri rayanya samba’a jam napura yau samparia kasuginya etu.” Wali samparia kepala to mangangkeni bangka, pasi tau to yusa to mapone ri bangka, pasi tau to mapalaong ri bangka pasi samparia tau to mapalaong ri tasi, sira seja makore yako nja’u longko.
18 Sira mangkita kumbu nu apu to mangkoni yau kota etu. Wali ri raya nsira mangkita etu sira sakaboo manganto’o, “Gete! Tare kojo kota to yusa to sewaju kagayanya pei kota to bae si’i!”
19 Wali sira mangkaku awu ntana pei mansaworaka nto’u wawo mbo’o nsira apa mawo kojo rayanya. Sira tumangi pasi ri raya ngkamawo ndaya sira sakaboo manganto’o, “O Gete! Masesa kota to bae. Ia semo kota to sugi kojo, kota to mampakasugi samparia tau to re’e bangkanya ri wawo ntasi. Pei ri rayanya samba’a jam ia room rakaja’aka yau.” Etu semo gombo to si sira.
20 O Saruga, pakasanang rayamu apa kota etu room rapakaja’aka yau. O tau to i Pue Allah Puenya, pasi pomakau i mPue Yesu, pasi to pantuntu tuntu i mPue, pakasanang raya ngkomi apa i Pue Allah room mangahuku kota etu apa saba kota etu room mangansesai komi.
21 Wali ojo karoonya aku mangandonge gombo etu panewa aku mangkita samba’a pomakau i mPue Allah to maroso, ia mangokotaka watu to bae kojo ewa watu to rapake mangabusak pae. Ia mangoko watu etu pei ipanasokanya yau ri raya ntasi. Wali ia manganto’o, “Ewa see seja kaparinya palaong to daraika resi kota Babel to bae. Maroso daraika mampakaja’aka yau kota etu, panewa kota etu tamo darakita wo’u.”
22 Wali pomakau etu mampogomboka kota Babel. Ia manganto’o, “Yako ri raya ngkorom tau tamo damangandonge wo’u ewa tau to mangantingko gambus, pasi tau to menyanyi, pasi tau to mangantawuis suling pasi tarompet. Pasi tamo seja dararata ri raya ngkorom tau to pande mangika bara kesaa. Pasi tamo seja daradonge ewa watu to mangabusak pae.
23 Tamo damiyala reme mpansona ri raya ngkorom. Pasi tamo seja daradonge loo mpangantin to langkai bara to we’a ri raya ngkorom. Samparia to etu damawali resi korom apa saba to payoli pasi to pobalu to si korom, sira semo tau to bae kojo angganya ri lino tempo ruyu. Pasi apa saba samparia to lino paka natipu nu mpake pasi do’a ngkorom.”
24 Wali kota Babel darahuku apa saba mampopate yau to pantuntu tuntu i mPue Allah pasi tau to i Pue Allah Puenya, see naka raa ntau etu paka nja’u nja’u raya ngkota etu. Pasi samparia tau to yusa to rapopate yau ri lino si’i, paka kota Babel semo to pu’u mpalaong to etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA