Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangeh ineh ui nenier aceh melaikat luk baken netemurun rat déi' langit. Ieh inan lalud luk rayeh, idi tana' ineh macang ku rasat melaikat ineh.
2 Idi ieh nengitang, kebalaneh, "Babil bawang rayeh ineh pangeh netabpa. Ieh mangun ku luk inan sétan, ada', idi suit-suit luk melutak idi luk inan megateh.
3 Ngaceku ieh nemaré lutak sawa'neh rupen amung-amung pupu. Idi raca'-raca' bang tana' ini mangun ku lun do' ngaceku ratnan lilineh luk pelaba ini."
4 Idi ui neninger aceh arod luk baken teh rat bang surga luk nepebala, "O pupuKu, do' remuat rat neneh, pad muyuh na perurum bang sala'neh, idi muyuh na kumin pad-pad denganneh!
5 Ngaceku sala'neh pebuun-pebuun pad macing déi' langit, idi Allah ngerawé ratnan kekamenneh luk dat.
6 Ngua' kuanneh mepad kudeng luk inau'neh nemuyuh, idi nganau' dueh kua' kinula' ratnan luk inau'neh. Manu' sangkirneh ku luk rupen, dueh kua' galih ratnan luk tinina'neh kuan muyuh.
7 Maré dereh idi susa' neneh maya' kinula' ubur idi rayeh luk biréneh kuan bururneh sebuleng. Ngaceku ieh megéi' pebala bang niatneh: 'Ui tudo mepad kudeng raca' decur! Baken ui tinula', Na tu-tu ui miak nangi'!'
8 Ngaceku ineh bang seaco amung derehneh miak macing, ieh ineh até, tido, idi lau. Idi ieh miak sabpen ku apui, ngaceku Tuhan Allah luk ngukum neneh ineh melalud."
9 Idi raca'-raca' bang tana' ini luk pangeh nepasét idi netudo dengan lutak pad-pad denganneh miak nangi' idi temido neneh kareb ideh nier rabpun apui luk ngeseb neneh.
10 Ideh tuped rat mado ngaceku matot ku derehneh idi pebala, "Mesusa', mesusa', bawang Babil luk rayeh, bawang luk meraben ineh! Bang sejam kinioneh ukum pangeh nacing namu."
11 Idi lemulun luk pepua' bang tana' ini miak nangi' idi temido neneh, ngaceku seburur pana' na miak melih binawehdeh teh;
12 seburur pana' nateh luk melih binaweh amas, pirak, batu luk meraga, bau mutiara, idi kibung luk melipi, luk sia' merirem, luk mesalud, idi luk mesia', tuda'-tuda' kayuh luk do' buen, idi binaweh luk ratnan tulang, binaweh luk inau' ratnan kayuh luk mikat raga, binaweh ratnan tekaling, belawan, idi batu luk mebuda';
13 idi teh anit kayuh kadingau, tuda'-tuda' akan luk maré do' én, idi luk sabpen luk do' buen, mur, ilu', abpa' anggur, umau saitun, banak, padé, sapi', dumba, kuda, keréta, demulun, idi ulun lemulun pana'.
14 Kebala lemulun luk pepua' ineh, "Amung-amung luk inanmu melili atun pangeh neburo rat namu. Idi amung-amung luk mén idi luk meraga ineh pangeh netutu', pad na miak mekalap teh."
15 Lemulun luk pepua' ini, luk pangeh mangun ku lun do' ratnan pepua' bang bawang ineh, miak tuped rat mado ngaceku matot ku derehneh. Ideh miak nangi' idi temido,
16 keburi'deh, "Mesusa', pelaba susa' kuan bawang rayeh ineh, luk pangeh inayung ku kibung luk melipi luk sia' merirem idi luk mesia', idi luk ibpu ku amas, batu luk meraga, idi bau mutiara!
17 Idi bang sejam mo' kinioneh amung-amung binawehneh pangeh inusag." Idi anid-anid lemulun luk ngimet kapal, lemulun luk maya' kapal, lemulun luk ngakem bang kapal, idi lemulun luk pepua' maya' abpa' rayeh ineh, tuped rat mado,
18 idi nengitang kareb ideh nenier rabpun apui luk ngeseb bawang ineh, idi pebala, "Bawang sapehké luk mepad kudeng bawang rayeh ineh?"
19 Idi ideh mubpur uluhdeh ku abuh dengan ngitang, nangi' idi temido, keburi'deh, "Mesusa', pelaba susa' kuan bawang rayeh ineh, ieh ineh bawang su luk inan lemulun luk maya' kapal bang abpa' rayeh pangeh mangun ku lun do' ku amung-amung binawehneh! Idi bang sejam mo' ieh pangeh inusag!"
20 O surga, do' iko mawang niat ngaceku usagneh ineh! O lun manu, rasul-rasul idi nabi-nabi, do' muyuh mawang niat, ngaceku Allah pangeh nengukum neneh ngaceku luk inau'neh nemuyuh.
21 Idi seburur melaikat luk metueh, nengiding aceh batu luk mepad kudeng batu iung kirayehneh, idi ieh nenala' neneh bang abpa' rayeh idi nepebala, "Dengan bitung luk kudeng ini, Babil bawang luk rayeh ineh miak talan dengan metueh, idi na tu-tu ieh miak siren teh.
22 Idi uni giula' luk tetagken lemulun luk menani, luk ngiup suling idi serupit, na tu-tu miak megala' pedingeren bang namu teh. Idi lun luk mileh ku kekamen anun-anun pana' na miak siren bang namu teh, idi uni batu iung pana' na miak pedingeren teh!
23 Idi acang ilu' na tu-tu miak macang bang namu, idi uni tang deléi luk ngaweh idi decur pana', na tu-tu miak pedingeren bang namu. Amung-amung lemulunmu luk pepua', ieh ineh luk meluun mebala aput tana', idi ratnan bangunmu amung-amung pupu pangeh neraruh!"
24 Babil pangeh inukum ngaceku dara' nabi-nabi idi lun manu luk nekali'Neh bang bawang ineh, setuneh dara' amung-amung lemulun luk pinaté bang tana' ini pana'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA