Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de to'isene 'o 'ilingi 'iamo-amokie 'o Woano gee ma Jo'oungu ma Dutu wodo-doboano doka 'ingose 'o mala'ekati ngai tumudiingika gee, "Niotagi de niapoa 'o hukumani ma Jo'oungu ma Dutuno 'o rupa tumudiingi ge'ena 'o duniaku!"

² Ge'enaka de 'o mala'ekati gee ma di-disiraka 'itagi de yapoa ma sawoko ma doda ge'ena 'o duniaku. De 'o poporoso gee posironga 'isirioka yakidabaoro 'o nyawa-nyawa gee 'onaka de ma 'ena 'o haewani ma no-nako de gee yasuba-suba ma haewani ge'ena ma patongo.

³ Ge'ena 'ipasa de 'o mala'ekati moioli yapoa ma sawoko ma doda 'o ngootuku, de ma ngooto ge'ena 'imadadi 'isoka 'o songene ma 'aunou, so 'ikokisongenoka 'iodumu gee 'i'ahu-'ahu 'o ngooto ma dodaka.

⁴ Ge'enaka de 'o mala'ekati moioli yapoa 'o sawoko ma doda 'o ngai-ngairuku de 'o 'akere ma utu-utuku, so 'o 'akere 'iodumu ge'ena 'imadadi 'o 'aunu.

⁵ Ngoi to'isene 'o mala'ekati gee yaku-kuasa 'o 'akere kaingosekau ma Jo'oungu ma Dutuka, "Ngona 'ani singina posironga 'itebinoka! Ngona no'ahu kaisi'ado-'adonika! 'O hukumani gee nosiguti-guti ge'ena 'itiai.

⁶ Sababu 'ona yakito'omakau 'ani kawasa de 'ani nabii-nabii; ne'ena ngona nakidiai 'ona 'o 'aunu ya'okere. Ma goungu ge'ena yadaene koge'ena nodiai 'onaka!"

⁷ Ge'enaka de to'isene 'o 'ilingi 'o manyanyi 'idu-dutuuku ma ngiino 'ingose 'ato, "Jou, Jo'oungu ma Dutu nokuasa 'ifo-foloi! 'Iloa de 'itiai 'o sagala hukumani gee ngona nosiguti-guti!"

⁸ Ge'ena 'ipasa de 'o mala'ekati moioli yapoa 'o sawoko ma doda 'o wange ma akoku, so 'o wange yaki'uku 'o nyawa de to 'ena ma sauku gee ma guatoka.

⁹ 'O nyawa 'o wange ma sauku yaki'uku, de 'ona yosito-torou ma Jo'oungu ma Dutu 'awi ronga, gee wakuasa 'o sagala bahaya ge'ena. Ngaro koge'ena ma 'ona yooluku yomaogoro 'o sowono yodiai de yooluku yolio ma Jo'oungu ma Dutuka. De yooluku yosiarene ma Jo'oungu ma Dutu 'awi kuasa gee 'ifoloi 'iamoko de 'awi singina ma sure.

¹⁰ Ge'enaka de 'o mala'ekati moioli yapoa ma sawoko ma doda 'o haewani gee yasuba-suba ma pareta ma go-gogeruku. So ma daeraa gee 'o haewani ge'ena ma pareta ma sigoronaka ka ma moiku 'itarusu. De 'o nyawa manga nga-ngaemuku yagoli sababu kaifoloi yosiri,

¹¹ so 'ona wisito-torou ma Jo'oungu ma Dutu 'o sorogaaka, sababu yosangisara de manga poporoso yakidisiri. Ma 'ona koyomaogoruwa yodiai 'o dorou.

¹² Ge'ena 'ipasa de 'o mala'ekati moioli yapoa ma sawoko ma doda ge'ena 'o Efrat ma 'akeruku ge'ena la 'o 'akere 'iamo-amouku. So 'o 'akere ge'ena 'itadono so 'o koa-koana 'o wange ma siwarisa yodadu-dadu 'idadi yaboa de komoiwa yakitatoko.

¹³ Ge'enaka de tamake 'o tokata 'o ngai sa'ange gee ma rupa 'isoka 'o papadeeke. 'Ena moi-moi 'ikokisupu 'o naga ma 'urude, 'o haewani ma di-disiraka ma 'urude, de 'o nabii ma ngeluku ma 'urude.

¹⁴ 'O tokata ngai sa'ange ge'ena 'o no-nako 'ihera-herangi 'idi-diai. 'Ena 'itagi 'o koa-koana 'o duniaka 'iodumika de yakipolu ma ngale yoparangi 'o wange ma amokoka ge'ena la ma 'orasi ma Jo'oungu ma Dutu woku-kuasa wahakimi 'o nyawa.

¹⁵ Ma Jou wongose 'ato, "Niosigisene! Ngoi toboa dua ma 'orasi konianakowa, 'isoka 'o nyawa yotosi-tosiki yoboa! Yosanangioka 'o nyawa gee tatapu yomadudu-duanga de yositiari manga pakeangi, so 'ona yotagi koyomawatonikawa de koyakimaekuwa 'o kawasa ma bionoka!"

¹⁶ Ge'enaka de 'o tokata ge'ena yakipolu 'o koa-koana go'ona 'o ngii moioka gee 'o Ibranioka yosironga 'o Harmagedon.

¹⁷ Ge'enaka de 'o mala'ekati moioli yapoa ma sawoko ma doda ge'ena 'o ngawa-ngawaku so ma tumudiingou. De to'isene 'o 'ilingi 'iamo-amokie 'o koana ma go-gogerino 'o Woaka gee ma Jo'oungu ma Dutu wodo-doboa, kaingosekau, "'Iduangokau!"

¹⁸ Ge'enaka de 'o tawi-tawi kaimakadowangou de 'o duturu ma 'ilingi 'ikuruusu ma de 'ipotoka, de 'i'osu 'ikua-kuatino gee koma'iwasi koge'ena! Ma 'osu ge'ena posironga 'o guatino!

¹⁹ De 'o kota 'iamo-amoko gee 'ieta 'ipula sa'angeka, de 'itorouoka 'o kota-kota 'o negara 'isinoimika 'o duniaka. Ge'enaka de ma Jo'oungu ma Dutu kowamongoruwa 'o Babel 'iamo-amoko ge'ena la 'o kota gee 'ieta 'ipula sa'angeka ma so-sowono. So ma Jo'oungu ma Dutu 'awi gorosau yakidaene matero ka 'o daluku ma cuka de 'imali-mali yakisi'okere.

²⁰ Gee ma 'osu 'ikua-kuatino ge'ena, de 'o pulo 'ikokilutu de 'o gigie 'ikokipelaka so koi'iwau.

²¹ 'O 'eis 'iteto-teto 'itotaka ma rikimoka daku 'o diwanguku. Ma 'eis 'iteto-teto ge'ena 'o ngai moi ma dubuso 'o kilo nagi motoa, ge'enau yakitapadu 'o nyawa-nyawa. So 'ona wisito-torou ma Jo'oungu ma Dutu sababu 'o 'eis ma rikimi ma amoko ge'ena.

Wahyu

Video Wahyu 16

Ikuti Kami:

KONTAK | PARTISIPASI | DONASI