Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu aku mangandonge loo to maroso magombo yako ri raya Banua i mPue Allah. Loo etu manganto’oka pomakau i mPue Allah to pitu etu, “Inta pei wubu yau ri lino huku yako resi i Pue Allah to ri raya yama to pitu etu.”
2 Wali pomakau to uyunya ia yau mangawubu yau banang nu yama to si ia ri wawo lino. Wali yako etu mawalimo bisul to mapari kojo pasi matida kojo ri koro ntau to re’e tondong binatang to maja’a pasi to mampue resi tau-tau binatang etu.
3 Wali yako etu pomakau to kadua mangawubu yau seja banang nu yama to si ia, pei to si ia, ia mangawubu ri wawo ntasi. Panewa tasi etu mawali yau ewa raa ntau to mate, wali banang nu ntasi etu samparia mate yau.
4 Yako etu pomakau to katogo mangawubu seja banang nu yama to si ia ri koro-koro nue pasi mata-mata nue. Wali ue etu seja mawali yau raa.
5 Panewa aku mangandonge pomakau i mPue Allah to mangkuasang ue, ia manganto’oka i Pue Allah, to’onya, “O Komi to tare dosa, to re’e tempo si’i pasi to re’e tempo owi, Komi mangahuku to lino singkonong kojo ewa sala nsira.
6 Apa sira roomo mampopate yau pei mangawubu raa ntau to Komi Puenya pasi to pantuntu TuntuMu. Wali Komi mampapoinuka sira raa. Masipato kojo sira mangarata huku to etu.”
7 Wali ojo karoonya ia magombo, aku mangandonge wo’u loo to yako ri palampa, loo to etu mampogomboka i Pue Allah, ia manganto’o, “O Pue Allah anu Makuasa, monso pu’u anu to nato’o mpomakau ngKomi etu. Tempo Komi mangahuku to lino, huku etu huku to masipato pasi singkonong kojo ewa sala.”
8 Wali yako etu pomakau to kaopo mangawubu seja banang nu yama to si ia. Pei to si ia, ia mangawubu ri mata nu eo, panewa mata nu eo etu rabiaka tidugang wo’u kapoinya pasi mampakaluru koro nto lino.
9 Wali tau maluru koronya naika mpana nu eo apa mapoi kojo. Panewa sira manganto’o maja’a i Pue Allah anu to mangkuasang soba-soba to narata nsira etu. Sira taa majea pasi sira taa seja mangabarong i Pue Allah.
10 Wali yako etu pomakau to kalima mangawubu seja banang nu yama to si ia. Ia mangawubu ri wawo mpaporenta nu binatang to maja’a. Tempo ia mangawubu yau etu, juku tana to naporenta nu binatang etu mawali mawuri kiji. Panewa tau to nja’u nja’u ria sira mangamamamama jilanya apa masesa kojo naepe.
11 Pasi sira manganto’o maja’a seja i Pue Allah ndate saruga apa saba sira matida kojo naepe pasi mabisul. Pei sira taa seja mangandolika tangonya yako ri lengko nsira to maja’a.
12 Roo see, pomakau to kaono ia seja mangawubu yau banang nu yama to si ia. Ia mangawubu yau banang nu yamanya etu ri wawo nue to bae to rato’oka Eprat. Wali ue etu oti yau mawali jaya danakama’i makole-makole to yako tondo mata nu eo.
13 Wali yako etu aku mangkita nosa to maja’a, nosa etu ewa toda ta’anya, togo mba’a. Nosa to togo etu masuwu yako ri nganga nu ule naga samba’a, pasi yako ri nganga nu binatang to maja’a samba’a, pasi yako ri nganga nto pantuntu tuntu to taa monso.
14 Nosa togo etu semo nosa measa to mangika palaong to taa rapobiasa to mawali tondong resi tau. Wali nosa etu yau damampasiromunaka makole-makole yako ri sambawo lino yau damamusu ane ratamo temponya eo bae, etu semo eo to rato’oka Eo i mPue Allah anu Makuasa.
15 Wali si’i gombo i mPue, Ia manganto’o, “Padongeka! Aku dama’i ewa to palima, wali komi taa damangansani tempo Aku dama’i etu. Wali masanang kojo tau to taa bayore pasi to mangajagang pakenya see ia taa dalambe pasi damea ri tango ntau boros.”
16 Wali ojo karatanya nosa to ewa toda etu resi makole-makole, sira mampasiromunaka makolemakole etu nja’u tampa to ane ewa ri raya basa Ibrani rato’oka Harmagedon.
17 Wali yako etu, pomakau to kapitu ia seja mangawubu banang nu yama to si ia. To si ia, ia mangawubu yau ri rao, panewa yako etu re’e loo to maroso mamoni yako ri gadera Makole ri raya Banua i mPue Allah. Loo etu manganto’o, “Roomo!”
18 Panewa re’e bilak kreto pasi loo to bae kojo pasi re’e seja lengko tana to maroso kojo. Lengko tana etu tawa re’e nikanya yako ri kare’e nto lino to ewa wetu karosonya. Lengko tana to etu maroso kojo.
19 Wali kota to bae, etu semo kota Babel, kota etu mawali magoa togo. Pasi kota-kota ntau to taa mangalulu i Pue Allah, to ri sambawo lino napukanaka yau seja. Wali i Pue Allah taa mangkalingan mangahuku kota Babel to bae etu. Ia mampapoinuka kota etu samparia tule to la’u raya nsangkiriNya. Tule etu batuanginya huku mapari kojo yako resi i Pue Allah apa maja’a rayaNya.
20 Wali samparia pulo-pulo malondong yau pasi tongku-tongku mawali lempe yau.
21 Pasi re’e seja tiba to tudu yako ndate yangi. Tiba etu bara lima mpuyu kilo kabeunya rayanya nsampa’i. Tiba etu mangaronso to lino, wali to lino manganto’o maja’a i Pue Allah saba sira naronso ntiba etu, apa soba etu mapari kojo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA