Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bo aku'oi nokodongog kon singog moḷoben nongkon bonu im baḷoi Allah noguman kom malaekat pitu tatua, "Bayakdon bo pobutakdon bonu im pitu palo toruk i Allah tanion kon tudu im butaí!"
2 Malaekat inta muna minayak bo nopobutak bonu im palonya tatua kon tudu im butaí. Daí nomukaídon im bituḷ mita inta moko'ondok bo mokobahaya kon intau mita inta oyuíon in tanda im mahaḷuk mita tatua bo kon intau mita inta nosumbah kom patongnya.
3 Onda intua malaekat induanya nopobutak domandon bonu im palonya kom bonu in dagat, daí tubig kon dagat nobaliídon duguí naonda bo duguí in intau minatoi. Bo minatoidon komintan mahaḷuk inta nobiag kom bonu in dagat.
4 No'iduduimai kon tua, malaekat intoḷunya nopobutak domandon bonu im palonya kon ongkag mita bo kom bayongan bokakak daí nobaliídon duguí im bayongan tubig tatua.
5 Bo dinongogku malaekat inta nongawasa kon tubig, noguman nana'a, "Hukuman inta pinoḷabuí-Mu tua moaídil, o..Allah inta totok im mokudus, Allah inta oyuíon bo inta aindon oyuíon!
6 Sim mosia ain nopobutak kon duguí in umat mita i Allah bo duguí in nabi mita, tana'a makow pino'inum-Mu domandon mosia in duguí patusbií tarima'an monia intua!"
7 Bo dinongogku in singog nongkon meja pototuduan kon sosumbah noguman, "O.. Tuhan, Allah inta totok im mokawasa, mobanar bo moaídilbií in hukuman mita inta pinoḷabuí-Mu!"
8 Nopaḷut makow kon tua, malaekat inggopatea nopobutak doman bonu im palonya kom mata in singgai, daí mata in singgai inogoidon momokak kon intau takin patuínya inta totok motoyang tua.
9 Intau sinurubnya im patuí inta nongkon i-Nia, bo mosia nogodi-godimai kon tangoi i Allah inta nongawasa kom bodito mita tatua. Umpakah natuadon, ta'e mosia doií domandon mogogai mogaid kon dosa mita monia bo doií doman modayow kong kamulia'an i Allah.
10 Bo malaekat ilimanya nopobutak doman bonu im palonya kon tampat pomomarenta'an mahaḷuk tatua. Daí bayongan karaja'an mahaḷuk tatua sinimindip. Bo lantaran mo'iliudon totok in nakitea, daí mosia mo'ikaḷut kon dilaí.
11 Bo mosia mogodi-godimai ko'i Allah inta kon soroga lantaran nakitea bo lantaran bituḷ mita monia. Ta'e umpakah natua mosia doiíbií doman mogogai mogaid kon inta mongora'at.
12 Onda intua malaekat inggonomnya nopobutak doman bonu im palonya kon Ongkag Eprata inta moḷoben tatua. Daí ongkag tatua no'ingkagdon sahingga raja mita nongkon timur mayakdon mongintua.
13 Bo aku'oi noko'ontong kon dimukud mora'at toḷu, inta naonda bo batangan tumpaḷak. Tumpaḷak mita tatua ilumuai nongkon bibig in naga, nongkon bibig im mahaḷuk bo nongkon bibig in intau inta mongaku nabi, ta'e de'emanbií totu'u nabi.
14 Mosia tua in dimukud mita mora'at inta nogaid kon soaáḷ mita inta mokoherang. Dimukud taya toḷu tatua minayak kom bayongan raja kon dunia na'a bo nosipun ko'i monia sim moparang kon singgai inta moḷoben, Singgai i Allah inta totok mokawasa.
15 "Indongogaidon! Aku'oi mamangoi naí mononakow! Mosanangdon totok intau inta umuran mobasadia bo inta umuran monarukiramai kom pakeangnya, simbaí diaí mopilang in sia maya-mayak makow, bo ko'ontongan intau moaíntoí in dodia'annya!"
16 Onda intua dimukud mita tatua nosipun kon raja mita tatua kon tampat inta kom bahasa Ibrani sinangoian "Harmagedon" (Tampat poyoyangan/pomutuían.)
17 Nopaḷut makow kon tua malaekat impitunya nopobutak domandon im palonya kom baḷangon. Daí kino dongogandon singog moropot nongkon tampat pomomarenta'an kom baḷoi i Allah, inta noguman, "Ain nopaḷut!"
18 Bo nongilatdon moyo-moyodudui bo gonugur ing gotup moko'ondok totok, bo linug inta paling motoyang. Diaípa dodai onda nolinug naímai tua ing koropotea, mulaipamai dunia na'a pinomia. Tua in linug inta paling motoyang!
19 Kotaí inta moḷoben tatua nobotak nosilai toḷu nosilai, bo norimumudon doman kotaí mita im bayongan negara kon dunia inta diaí nonota'au ko'i Allah. Bo kino toropandon i Allah im Babel, kotaí inta moḷoben tua. Bo pino'inumdon i Allah in anggur nongkon palo anggur i Allah -- tuata anggur toruí-Nya inta moḷoben totok.
20 Komintan pulau nobuli bo komintan buḷud diaídon ko'ontongan.
21 Uyan eis moḷoben, inta toḷolima nokilo ing kosibuḷnya, noḷabuí nongkon ḷangit bo no'idantug kon intau mita. Daí mosia nohojat ko'i Allah lantaran bodito uyan eis inta totok im motoyang tua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA