Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lepá arepkungan nga-nga sabeu ka Uman Taikamanua sipasikukua ka matadda samalaika sipitu, "Kenan kam, nupiliaké kam bagat pulokat sipitu oloi golut Taikamanua néné, ka polak!"
2 Iageti einangan leú et malaika siboikí, ipiliaké sikukuddu ka bagat pulokat néné ka polak. Oto baranangan leú et appu sikataí besí, ka tubudda sangamberi sirimanua sibara ka tubu toggaiat tarimeu, samba ka tubudda sipaniddogi tularatnia.
3 Lepá nenda piliakénangan ka sia malaika sikarua sikukuddu ka bagat pulokatnia ka koat. Iageti bailiunangan koat néné kelé logaura sirimanua simamatei. Oto mateinangan leú et sangamberi makluk sikukuddu ka bagat koat.
4 Lepá mitsá ei nia ka sia malaika sikatelu, masipiliaké sikukuddu ka bagat pulokatnia ka pabaga-bagat oinan sambat ka sangamberi matat bubuakat. Oto ka sia sangamberinia oinan bailiu logau.
5 Iageti arepkungan nia ipanibo ka sia malaika sikup-kup'aké oinan néné, pelé nga-ngania, "Maadil lé ukuman siorak'akenennu, ale Sipunenan, Taikamanua tonemnangan lé aian nia samba siturerere kababara!
6 Arapiliakéan logaura sapaamian Taikamanua sambat logaura tai nabi; oto kineneiget kaunungan sia masiló logau. Kirénangan mateúan rasiló kelé nenda!"
7 Lepá arepkungan nga-nga sibara ka kudduat pasijá-jakat tareimeu buluakenen, sipasikukua, "Ale Tuhan, Taikamanua Sipulugege, maroipo samba maadil lé ukuman siorak'akenennu!"
8 Lepá nenda, piliakénangan ka sia sikukuddu ka bagat pulokatnia ka matat sulu; oto obáaké ka sia matat sulu, ilabó sirimanua oloinia simakopé kataí besí néné.
9 Oloi sulu néné te masilalabó sirimanua, oto kalulut néné, pateleirangan leú et onin Taikamanua, sipasikukup-kup'aké paoreat néné. Tápoi kenanen kisedda, tá leú et rababauaké paatuatda, samba tá raobá masiumun'aké pulatsanan Taikamanua.
10 Iageti piliakénangan sikukuddu ka pulokatnia ka sia malaika sikalima, ka uddenan purimataat tarimeu. Oto magep-gepnangan leú et sangaliot purimataat tarimeu néné, pat sotdangan jalaira sirimanua, kopet besínia.
11 Oto pateleirangan leú et Taikamanua ka manua kalulut besit tubudda sambat kalulut apputda. Tápoi bulat beri bauakéra paatuatda ka galai tubudda sikataí.
12 Lepá piliakénangan ka sia sikukuddu ka bagat pulokatnia malaika sikaenem, ka Oinan Eprat sabeu. Iageti makalanangan leú et, bulat pat oi raenungi nia tai rimata sibara ka kabelaiat sulu.
13 Oto itsókungan leú et, telu ketsat sikataí, kelé mutubu kuret. Rababara iaté, ka nga-ngan ulou simakopé beunan sambat ka nga-ngan tarimeu, samba leú et ka nga-ngan nabi sipatataju.
14 Sia néné te paketsa-ketsat sikataí sibaraaké pakise-kiseiet. Iageti eirangan leú et kateludda ketsat néné, ka sangaliot polak masirurúaké sangamberi tai rimata, bulé raei pasaggak ka Gogoi sabeu, iaté Gogoi Taikamanua Sipulugege.
15 "Arep'aké! Momoi te aku kelé sipananangkou! Mauktuk te sia simatarek tubu samba sipasijajago leppeinia, bailiu tá simabulutut ipuenung elé maila nia ka siberikabaga!"
16 Iageti eirangan leú et paketsa-ketsat néné masirurúaké tai rimata ka sara kudduat, onin kudduat néné ka nga-ngan Ibrani iaté Harmagedon.
17 Lepá nenda piliakénangan nia ka sia sikukuddu ka bagat pulokatnia malaika sikapitu, ka rusa. Iageti maarepnangan nga-nga simaron sibara ka uddenan purimataat ka Uman Taikamanua, sipasikukua, "Atuléléan!"
18 Oto bara bilá sitaipuaari, apakilat, samba nga-ngan leleggu apagururuu samba simakararat, samba teteu simakopé kataí ron. Bulat barania ka panandaat aitubaraaké sirimanua, bulat ainangan tá babara teteu sabeu kelé néné. Néné te sara teteu bulat simakopé kataí ron!
19 Laggai sabeu ragai oi telu, samba palagga-laggai ka sangaliot negara leú et kakkataí. Iageti repdemnangan laggai Babel sabeu néné Taikamanua. Kaunangan lónia anggur sibara ka pulokat anggur Taikamanua, iaté anggur oloi golúnia.
20 Oto sangamberinia panusa-nusa tatá, samba sangamberi palele-leleu leú et, tatá.
21 Urat es leú et belé palilima ngapulu kilogram sanénia, pasaksanginangan leú et sirimanua. Iageti paloloirangan leú et Taikamanua, kalulut paoreat urat es simakopé kataí besí néné.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA