Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu aku mangkita wo’u samba’a pomakau i mPue Allah to maroso, ia ma’i yako ndate saruga. Pomakau etu ia nakumut nu limu pasi ri wawo mbo’onya re’e pindurai. Lionya ewa mata nu eo karemenya, pasi witinya ewa tinja to mawea ewa apu.
2 Ia mangkongko samba’a buku kodi to rayuyu to tiloka pasi ia makore sambali witinya tondo ngkana ri wawo ntasi, sambali to tondo ngkii ri wawo ntana.
3 Wali tempo etu ia kaboo. Loonya etu maroso kojo ewa loo nsinga to manggori. Pei ojo karoonya ia kaboo etu, re’e loo nu lamoa pitu yongu mangansono. Lamoa etu magombo ewa tau.
4 Wali ojo karoonya aku mangandonge loo nu lamoa pitu etu, aku damangantulis anu to nato’o. Pei re’e katawanya aku mangantulis, aku mangandonge wo’u loo magombo yako ndate saruga. Loo etu manganto’o, “Ne’e ratulis gombo to yako ri loo nu lamoa pitu etu. Ne’e rapaponsanika sa’e.”
5 Wali pomakau to aku mangkita makore ri wawo ntasi pasi ri wawo ntana etu, ia mangokotaka palenya tondo ngkana nto’u yangi.
6 Panewa ia mangika parajanji. Ia manganto’o sanga i mPue Allah anu to tuwu singkasaenya pasi to mampapowali yangi, lino, tasi pasi samparia bananginya. Naka pei ia manganto’o mangampake sanga i mPue Allah, apa ia mampakaroso parajanji to ia damanganto’o etu. Wali si’i semo parajanji to ia manganto’o, to’onya, “Tamo re’e to damangantalas powali nsongka i mPue Allah.
7 Pei ane ratamo temponya pomakau i mPue Allah to kapitu mangantawuis tarompet to si ia, tempo etu semo i Pue Allah damangabanang songkaNya to tawa rakita. Palaong to damawali etu roomo napakarebaka yami i mPue Allah resi to papolaongiNya, etu semo to pantuntu tuntuNya tempo owi.” Etu semo parajanji to nato’o mpomakau etu.
8 Wali ojo karoonya pomakau manganto’o parajanjinya etu, aku mangandonge wo’u loo to owo dongeku ngena magombo yako ndate saruga. Loo etu manganto’oka aku, “Inta pei oko buku rayuyu to tiloka ri pale mpomakau to makore ri wawo ntasi pasi ri wawo ntana etu.”
9 Wali aku yau resi pomakau etu pei manganto’oka ia, “Waika aku buku to rayuyu kodi etu.” Panewa ia manganto’oka aku, “Oko pei koni yau buku si’i. Ngangamu damangepe momi ewa juu, pei la’u kompomu ia damawali mapa’i.”
10 Wali aku mangoko buku rayuyu kodi etu yako ri pale mpomakau, panewa aku mangkoni yau. Tempo aku mangkoni buku etu, aku mangepe momi ewa juu, pei roo kukoni, panewa aku mangepe matida kompongku.
11 Panewa yako etu ia manganto’oka aku, “Pakarebaka wo’u anu to damawali. Kareba etu mangkonong tau to boros bansa, pasi tau to boros paporentanya, pasi tau to boros basanya, pasi boros makole nto lino.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA