Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ui nenier melaikat baken luk metueh, temurun rat bang langit. Ieh nengayung ku kuyu' laput, idi tegkang luun uluhneh. Kiungneh mepad kudeng mateh aco, idi kukudneh mepad kudeng diri apui.
2 Bang paladneh inan aceh surat isuut luk lisad. Kukudneh pa tinueh ngeradu' luun abpa' rayeh. Idi kukudneh pa kabing ngeradu' luun tana'.
3 Ieh nengitang mepad kudeng uni balang luk ngeku. Idi kareb ieh nengitang, tudu' lalam ineh pana' nenguni unideh anid-anid.
4 Kareb tudu' lalam ineh pangeh muni, ui temina' ngayud, idi ui neninger aceh arod rat bang langit, kebalaneh, "Ngetu anun-anun luk pangeh bila tudu' lalam ineh, idi aleg ngayud ineh."
5 Idi melaikat luk pangeh sinierku tuped luun abpa' rayeh idi luun tana', nengiding ticu'neh pa tinueh nicul déi' langit,
6 idi ieh nepebulung ku ngadan Allah luk mulun ruked-ruked, idi luk nemudut langit dengan amung-amung uangneh, idi tana' dengan amung-amung uangneh, idi abpa' rayeh dengan amung-amung uangneh, kebalaneh, "Na kareb kuandeh teh!
7 Iamo' kareb melaikat luk ketudu' ineh ngiup serupitneh, luk inalum Allah ineh uen ngacing, maya' kudeng luk bilaNeh kuan demulunNeh, nabi-nabi."
8 Idi arod luk pindengerku rat bang langit ineh, nepebala negku sekua' teh, kebalaneh, "Amé' iko, ngalap surat luk lisad luk bang palad melaikat luk tuped luun abpa' rayeh idi luun tana'."
9 Ui iné' matun melaikat ineh idi nemutuh neneh maré surat luk isuut ineh negku. Idi kebalaneh kuanku, "Do' ngalap idi kuman ineh, idi ieh miak nganau' batekmu mepét, iamo' bang tangmu ieh mepaci' mepad kudeng duru' tebikan."
10 Ui nengalap surat luk isuut ineh rat ticu' melaikat ineh, idi nekuman ineh, idi bang tangku ieh mepaci' mepad kudeng duru' tebikan, iamo' kareb ui pangeh nekuman ineh, ieh mepét bang batekku.
11 Idi ieh nepebala kuanku, "Do' iko mada' bala Allah sekua' teh ratnan tuda'-tuda' inul idi tuda'-tuda' pupu, inul, buri', idi raca'."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA