Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ini bala luk linio Yésus Keristus idi luk biré Allah Neneh, pad ngegala' kuan demulun-demulunNeh, anun-anun luk miak mangun dengan mesaget. Keristus nengecuk melaikatNeh maré kali' ratnan ineh kuan demulunNeh, Yahya,
2 idi Yahya nemada' ratnan amung-amung luk sinierneh. Ini bala Yahya ratnan bala luk biré Allah, idi bada' luk matu luk linio Yésus Keristus.
3 Samal kuan lemulun luk maca' surat ini, idi samal kuan lemulun luk ninger bada' luk biré ini, idi luk maya' luk inayud bang surat ini, ngaceku karebneh pangeh muneng.
4 Rat ni Yahya kuan tudu' sidang luk déi' Asia: Do' katu idi awang temurun kuan muyuh ratnan Allah, Luk idi nekini, idi Luk pangeh idi atun, idi Luk miak macing teh, idi ratnan tudu' roh luk pa kiung kerusiNeh,
5 idi ratnan Yésus Keristus, Lun Nekali' luk lutep maya' jani' ineh, ieh ineh Anak luk atun luk tinui rat arang lun naté, idi luk mangun ku raca' pa luun amung-amung raca' bang tana' ini. Ieh mawa netau, idi dengan dara'Neh Ieh nemuit netau ratnan amung-amung sala'tau.
6 Ieh nenganau' netau mangun ku aceh imet imam-imam kuan Allah TamanNeh. Rayeh idi tueh kuan Yésus Keristus ruked-ruked peh! Amin.
7 Siruh, Ieh macing dengan laput! Ieh miak siren amung lemulun, meluun teh lemulun luk nenebpek Neneh; idi amung-amung pupu bang tana' ini miak temido Neneh. Kali' rungen ineh mangun. Amin!
8 "Ui ini Urup luk Pun-pun idi Urup luk Kekiped," kebala Tuhan Allah luk Meluun Lalud ineh, Luk idi nekini, Luk pangeh idi atun, idi Luk miak macing teh.
9 Ui ini Yahya, kinanak muyuh. Idi bang Yésus ui ngalap babpat dengan muyuh bang susa', idi bang ImetNeh. Idi dengan muyuh ui tuman bang dereh. Ui pangeh tila' déi' Pulau Patmos, ngaceku ui nemada' bala Allah idi bada' luk matu luk linio Yésus.
10 Kareb aco Tuhan ui tigio Roh, idi ui neninger rat pa ketedku aceh uni tang luk rayeh kudeng uni serupit.
11 Kebalaneh, "Do' iko ngayud luk sirenmu idi maré surat ineh kuan tudu' sidang ini: Epesus, Smirna, Pergamum, Tiatira, Sardis, Piladelpia, idi Laudikia."
12 Ui nelumi pian nier idé luk nepebala negku. Idi ui nenier tudu' kukud dawan luk ratnan amas.
13 Luun uneddeh inan Seburur Lemulun luk kudeng Anak-Lemulun, luk kuyu' boyor macing ku kukudNeh, idi ruukNeh inabet ku abet amas.
14 AbpukNeh mebuda', mepad kudeng buluh anak dumba luk mebuda' idi salju pana'; idi matehNeh mepad kudeng budung apui:
15 kukudNeh mepad kudeng tekaling luk mesilo, luk iseb bang tetel, idi arodNeh mepad kudeng beri rueb luk medita' luk mula'.
16 Ieh nengimet tudu' gituen bang paladNeh pa tinueh, idi remuat rat bang tangNeh aceh pelapet luk metadem, luk tadem pekop, idi kiungNeh mepad kudeng mateh aco luk pelaba rasat.
17 Kareb ui nenier Neneh, ui neluka' iring kukudNeh mepad kudeng lemulun luk naté. Idi Ieh nengerareng ticu'Neh pa tinueh luunku idi nepebala, "Aleg matot, Ui ini Luk Pun-pun idi Luk Kekiped.
18 Ui ini Luk Mulun. Ui pangeh naté, idi siruh, nekini Ui mulun ruked-ruked, idi inan bang ticu'Ku taka até idi su inan até.
19 Ngaceku ineh do' iko ngayud anun-anun luk sirenmu, do' anun-anun luk bang kareb ini, idi luk miak macing teh.
20 Idi luk inalum ratnan tudu' gituen luk pangeh siniermu bang ticu'Ku pa tinueh, idi tudu' kukud dawan luk ratnan amas ineh: idi tudu' gituen ini, ieh ineh melaikat kuan sidang luk tudu' ineh, idi tudu' kukud dawan ineh, ieh ineh tudu' sidang ineh teh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA