Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Doding podah humbani si Daud marhasoman husapi. (55-2) Tangihon Ham ma tonggongku, Ham Naibata, anjaha ulang ma tulak Ham elek-elekku.
2 (55-3) Ingat Ham ma ahu anjaha balosi Ham ma; mawat-awat do ahu ibagas doruh-doruhku.
3 (55-4) Bulinsah do ahu halani parsurak ni munsuh, halani panosak ni parjahat; ai sai manggulang hamagouan do sidea bangku, anjaha ibagas gila do sidea mammunsuhi ahu.
4 (55-5) Mangirput do uhurhu ibagas, anjaha songgot-songgot ni hamatean mandorab ahu.
5 (55-6) Biar pakon hagobiron do manrohi ahu, anjaha hasonggoton manrungkub ahu,
6 (55-7) pala huhatahon, “Ah, ambit marhabong ma ahu songon asas, habang ma ahu mayap-ayap mangindahi parsaranan.”
7 (55-8) Tongon, daoh ma ahu maporus, marborngin i halimisan. Sela.
8 (55-9) Tarolos ma ahu mangindahi ianan parlingodan, dompak logou sibungkar hasowor ampa haba-haba.
9 (55-10) Geori Ham ma sidea Tuhan, bolah Ham ma riah ni sidea. Ai huidah do paksa pakon parsalisihan ibagas huta ai.
10 (55-11) Arian pakon borngin manrunda sidea i atas tembokni; hajahaton ampa hasunsahan masa ibagas ai.
11 (55-12) Hasamboron do i tongah-tongahni, anjaha seng misir humbani alamanni panokohon pakon panipuon.
12 (55-13) Sedo munsuh na pahiri ahu, ambit ai hutaron namin; sedo halak pardomdom na roh mangimbang ahu, ambit ai marponop ahu hun lobeini.
13 (55-14) Tapi ho do, jolma na doskon ahu, huan-kuanku, hatengeran ni uhurhu;
14 (55-15) ho, hasomanku saparsaoran, ho, hasomanku saodoran hu rumah ni Naibata.
15 (55-16) Sai hamatean ma mandorab sidea, manggoluh ma sidea susur hu nagori toruh; ai hajahaton do manggoki rumah ampa paruhuron ni sidea.
16 (55-17) Tapi anggo ahu, bani Naibata do ahu dilo-dilo. Jadi Jahowa ma na paluahkon ahu.
17 (55-18) Bodari, sogod ampa tongah arian dilo-dilo do ahu, doruh-doruh, anjaha itangihon do sorangku.
18 (55-19) Paluahon-Ni do tonduyhu mardamei-damei humbani halak na mandorab ahu, ai buei tumang do sidea na manlawan ahu.
19 (55-20) Sai tangaron ni Naibata do anjaha patoruhon-Ni do sidea; Ia na marparatas humbani nabasaia. Sela. Halani seng ra sidea paubahkon uhurni, anjaha seng marhabiaran sidea bani Naibata.
20 (55-21) Ilaluhon do tanganni laho mangimbang hasomanni, mangeluk do ia humbani parpadanan.
21 (55-22) Landitan do pamanganni humbani mantega, tapi hamunsuhon do ibagas uhurni; lamlaman do hatani ase minak, tapi songon podang na sinintak do sidea.
22 (55-23) Ompaskon ma bani Jahowa holsoh ni uhurmu, jadi Ia ma na mansarihon ho; seng anjai paturuton-Ni halak parpintor marhasunsahan lalab.
23 (55-24) Tapi anggo Ham, ale Naibata, sai patuadon-Mu do sidea hubagas godung hamagouan; halak sionsop daroh pakon panipu seng anjai das ronsi partongahan ni umurni. Tapi anggo ahu hu Bamu do marhatengeran.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA