Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Nirurungang ri kacapi. Kelong pangngajara’na Daud. (55-2) O, Allata’ala, Kipilangngeri pappala’ doangku, teaKi’ allei rupanTa battu ri pappalakku.
2 (55-3) Kiparhatikanga’ siagang kipialia’, ancuruka’ lanri kasusaangku.
3 (55-4) Lussaki pa’maikku lanri pa’garatta’na musua siagang panjallakkanna tau ja’dalaka. Saba’ nasusai ke’nanga tallasakku, siagang larroi ke’nanga ammusua’.
4 (55-5) Sanna’ lussa’na pa’maikku, nipakamallaka’ ri karama’na kamateanga.
5 (55-6) Nikalimbukia’ ri kamallakkang siagang pannekkerang, nijallakkanga’ ri pakkasia’ malla’ dudua.
6 (55-7) Uh, ebara’ angkana akka’nyika’ sangkamma jangang-jangang bodobangkeng, lanri’baka’ mange a’boya tampa’ sannang.
7 (55-8) Iye’, lanri’baka’ bella sikali, na kuammantang ri parang luaraka.
8 (55-9) Lapparurua’ a’boya tampa’ pa’la’langngang battu ri anging puttusuka siagang anging lompoa.
9 (55-10) O, Batara, Kipa’lingu laloi musu-musungku, Kikacoi bicaranna ke’nanga, saba’ ri kotaya kuciniki katerassanga siagang passiba’jianga.
10 (55-11) Allo bangngi a’jappa ke’nanga akkuliling, anggaukangi kaja’dallanga siagang appare’ karicuang.
11 (55-12) Kemae-kemae nia’ pangngancurang; panjallakkanga siagang pannipuanga a’la’bangi ri pasaraka.
12 (55-13) Ebara’ angkana nacalla’ musungku, akkulle ija’ attahang. Ebara’ angkana nahina’ balingku, akkulle ija’ ampaccokkoangi.
13 (55-14) Mingka ba’lalo ikau, belaku, sahabakku, bela ma’reppesekku a’giling ambalianga’.
14 (55-15) Riolo sileporangki’ siagang baji’, biasaki’ siagang assambayang ri Balla’Na Batara.
15 (55-16) Boli’mi kamma namate silalonna musungku na naung attallasa’ ri linona tau matea, saba’ kaja’dallanna niaki ri balla’na ke’nanga, ri tangnga-tangngana ke’nanga.
16 (55-17) Mingka akkioka’ mae ri Allata’ala, Batara lampasalamakka’.
17 (55-18) Allo bangngia’ akkunrareng siagang angngarru’, na Napilangngeri sa’rangku.
18 (55-19) Napasalamaka’ battu ri pa’bakkana musua, sannaka jaina battu ambalianga’.
19 (55-20) Allata’ala ammarentai battu ri satunggu-tungguna laNapilangngeria’ siagang Nabetai ke’nanga. Saba’ taerokai ke’nanga toba’, siagang tamallakkai mae ri Allata’ala.
20 (55-21) Le’ba’ belaku nabunduki agang-aganna, nakaluppai janjinna.
21 (55-22) Kana-kananna baji’ sikali manynyonyo’, mingka atinna lalang sangnging kabirisang. Bicaranna lamma sikali, mingka anno’doki sanrapang pa’dang taranga.
22 (55-23) Erangi sikontu ranggaselanu mae ri Batara, Iami lassareko kagassingang; saba’ tena Nabalang parekangi tau lambusuka nibeta.
23 (55-24) Mingka iKatte, o, Allata’ala, laKipanaungi ke’nanga antama’ ri kali’bong sannaka lantanna. Sikamma patipua siagang appasolonga cera’ talanarapikai bageruanna umuru’na ke’nanga. Mingka inakke tappaka’ mae ri Katte.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA