Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ende-enden Daud.
2 O Dibata, begikenlah pertotonku, ula tundalken pemindonku.
3 Dengkehken dingen aloi min aku, latih kuakap perbahan kesusahenku.
4 Mbiar kal aku erkiteken iancam musuhku, sedak kuakap perban itindih kalak jahat. Isuhsahina geluhku, dingen alu nembeh atena ilawanna aku.
5 Nggirgir kal aku, mbiar man kematen si ngerimrim aku.
6 Mbiar dingen gentar kal aku, janah ngeri kal kuakap.
7 Adi lit min ndai kabengku bagi nderapati, kabang aku ndarami ingan si teneng.
8 Ndauh kal aku kabang, jenari i gurun pasir aku tading.
9 Minter kudarami ingan cio-cio, maka ula aku kena angin erpiu ras angin kaba-kaba.
10 Sontarken ranan musuhku o TUHAN, sabap kuidah kejahaten dingen keguntaren i kota.
11 Suari berngi ikelewetina kota e, kejahaten dingen mara dem i je.
12 I jah i je lit kalak encedai, pasar-pasarna dem alu kalak si dahinna nindih ras nipu.
13 Adi kin musuh nge si nokohi aku, tahan nge aku. Adi imbang nge si megombang man bangku, banci denga aku cebuni.
14 Tapi kam jine, o teman, temanku meriah, kandu-kandungku, kam nggo salih jadi imbangku.
15 Mbarenda meriah kal bualta, dingen ras-ras kita ersembah ku bas Rumah Pertoton.
16 Mate rempetlah musuh-musuhku, geluh-geluhenlah ia nusur ku bas doni kalak mate. Sabap kejahaten kap isi rumahna, bage pe i bas pusuhna.
17 Tapi erlebuh aku man TUHAN Dibata, jenari IsampatiNa nge aku.
18 Suari ras berngi aku erlebuh dingen tangis, janah ibegiken TUHAN nge sorangku.
19 IbabaNa aku mulih alu mejuah-juah, i bas perang ngelawan musuh si nterem.
20 Dibata kap si merentah nai-nai nari, IbegikenNa nge aku dingen ItalukenNa me imbangku. Sabap la ia nggit robah, dingen la ia mbiar man Dibata.
21 Teman-temanku mbarenda ermusuhen ras teman-temanna, ipersilahangna perpadanenna.
22 Rananna tuhu medate, tapi pusuhna dem nembeh ate. Cakapna medalit bagi minak, tapi nebak desken pedang si entelap.
23 Endesken aru atendu man TUHAN, gelah kam IpegegehiNa. Sabap la pernah IpediatNa, kalak bujur italuken. <55:24> - Tapi Kam, o Dibata, IambekkenNdu me, kalak pemunuh ras penipu ku bas lubang si lanai tanggung bagesna. Kalak si bage, la nggeluh setengah umur pe. Tapi aku ernalem i bas Kam.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA