Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sukkurukko mae ri Batara, saba’ Ia bajiki; pangngamaseanNa sa’genna satunggu-tungguna.

² Sukkurukko mae ri Allata’ala Kaminang Tenaya Ruanna; pangngamaseanNa sa’genna satunggu-tungguna.

³ Sukkurukko mae ri Batara Kaminang Tinggia; pangngamaseanNa sa’genna satunggu-tungguna.

⁴ Iaji bawang akkulle anggaukangi gau’-gau’ appakalannasa’ lompoa; pangngamaseanNa sa’genna satunggu-tungguna.

⁵ Lanri kaporeanNa napa’jari langika; pangngamaseanNa sa’genna satunggu-tungguna.

⁶ Napalaparaki buttaya irate ri tompo’na je’neka; pangngamaseanNa sa’genna satunggu-tungguna.

⁷ Appareki barang-barang angngeranga singara’ ri langi’; pangngamaseanNa sa’genna satunggu-tungguna;

⁸ mataallo untu’ angkoasai singaraka; pangngamaseanNa sa’genna satunggu-tungguna;

⁹ bulang siagang bintoeng angkoasai bangngia; pangngamaseanNa sa’genna satunggu-tungguna.

¹⁰ Nabunoi sikontu ana’ bungasa’na tu Mesir; pangngamaseanNa sa’genna satunggu-tungguna.

¹¹ Naantaraki tu Israel assulu’ battu ri Mesir; pangngamaseanNa sa’genna satunggu-tungguna;

¹² siagang lima kassa’Na na kalompoanna pangngamaseanNa sa’genna satunggu-tungguna.

¹³ Tamparang Alara’ Nabage ruai; pangngamaseanNa sa’genna satunggu-tungguna;

¹⁴ Israel umma’Na, Napalimbangi anta’le; pangngamaseanNa sa’genna satunggu-tungguna.

¹⁵ Mingka karaeng Mesir siagang tantarana natallangngangi; pangngamaseanNa sa’genna satunggu-tungguna.

¹⁶ Napimpingi umma’Na allalo ri parang lompoa; pangngamaseanNa sa’genna satunggu-tungguna.

¹⁷ Nabetai sikamma karaeng porea; pangngamaseanNa sa’genna satunggu-tungguna;

¹⁸ nabunoi sikamma karaeng masahoroka; pangngamaseanNa sa’genna satunggu-tungguna;

¹⁹ Sihon, karaeng Amori; pangngamaseanNa sa’genna satunggu-tungguna;

²⁰ siagang Og, karaeng Basan; pangngamaseanNa sa’genna satunggu-tungguna.

²¹ Pa’rasanganna ke’nanga Napassareangi mae ri umma’Na; pangngamaseanNa sa’genna satunggu-tungguna;

²² a’jari Napatang Israel atanNa; pangngamaseanNa sa’genna satunggu-tungguna;

²³ Tena Nakaluppaiki’ ri wattunta nibeta; pangngamaseanNa sa’genna satunggu-tungguna.

²⁴ Nalappassangki’ battu ri musua; pangngamaseanNa sa’genna satunggu-tungguna.

²⁵ Sikontu apa-apa attallasaka Nasarei kanre; pangngamaseanNa sa’genna satunggu-tungguna.

²⁶ Sukkurukko mae ri Allata’ala makoasaya ri langika; pangngamaseanNa sa’genna satunggu-tungguna.