Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Man BaNdu saja o TUHAN, labo man kami, man BaNdu saja nge kemulian arus ibereken, erkiteken keleng AteNdu si tetap dingen KesetianNdu.

² Ngkai maka bangsa-bangsa arus nungkun, "I ja kin Dibatandu?"

³ I Surga kap Dibatanta, IdahikenNa kai AteNa IbahanNa.

⁴ Dibata-dibata kalak ah, ibahan i bas emas ras pirak nari, ibentuk alu tan manusia.

⁵ Lit babahna, tapi la beluh ngerana, lit matana tapi la erpengidah.

⁶ Lit cupingna, tapi la erpemegi, lit igungna tapi la erpenganggeh.

⁷ Lit tanna, tapi la banci ndadap, lit nahena tapi la banci erdalan.

⁸ Kerina kalak si nggo njadikenca dingen tek man gana-gana e, jadilah ia bali ras gana-gana e.

⁹ O kalak Israel, teklah man TUHAN, Ia kap si nampati dingen si ngkawali kam.

¹⁰ O imam-imam, teklah man TUHAN, Ia kap si nampati dingen si ngkawali kam.

¹¹ O kerina si nembah man TUHAN, teklah man TUHAN, Ia kap si nampati dingen si ngkawali kam.

¹² TUHAN si nginget kita dingen si masu-masu kita, Ia si masu-masu kalak Israel, bage pe kerina imam-imam Dibata.

¹³ Kerina kalak si erkemalangen man BaNa, ipasu-PasuNa, subuk si meherga ntah lang.

¹⁴ TUHANlah si mereken tuah man bandu, ertambah-tambahlah kesusurenndu.

¹⁵ Ipasu-pasu TUHANlah kam, Ia kap si nggo njadiken doni ras langit.

¹⁶ TUHAN kap empuna Surga, doni IberekenNa man manusia.

¹⁷ Kalak si nggo mate labo muji TUHAN, eme kalak si nggo nusur ku bas doni kematen.

¹⁸ Tapi kita si nggeluh denga nge si ngataken bujur man BaNa, genduari nari seh rasa lalap. Pujilah TUHAN!