Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Banne abdidalem, GUSTE, banne abdidalem, namong Junandalem se kodu emolja’agi, sabab Junandalem esto sareng taresna salanjangnga.

² Arapa sa-bangsa me’ kodu ngoca’, "E dhimma Allahna reng-oreng jareya?"

³ Allahna sengko’ ban ba’na badha e sowarga, Salerana alampa’agi sabarang se daddi kasokanna.

⁴ Brahalana reng-oreng jareya dhari emmas ban salaka, gabayanna tanangnga manossa.

⁵ La-brahala jareya badha colo’na, tape ta’ bisa acaca, badha matana, tape ta’ nangale pa-apa.

⁶ Brahala jareya badha kopengnga, tape ta’ ngedhing pa-apa, badha elongnga, tape ta’ bisa nyeyom.

⁷ Brahala jareya badha tanangnga, tape ta’ bisa araga, badha sokona, tape ta’ bisa ajalan, ban ta’ kalowar sowara dhari gerrunganna.

⁸ Mandar kantha’a jareya keya daddina reng-oreng se agabay ban se parcaja ka la-brahala jareya.

⁹ He ommat Isra’il, mara ngarep ka PANGERAN, Salerana se nolong ban ngaobi ba’na.

¹⁰ He para imam, mara ngarep ka PANGERAN, Salerana se nolong ban ngaobi ba’na.

¹¹ He reng-oreng alem, mara ngarep ka PANGERAN, Salerana se nolong ban ngaobi ba’na.

¹² PANGERAN emot ban apareng berkat ka sengko’ ban ba’na, Salerana bakal aberkadana ommat Isra’il ban sakabbinna imam toronanna Harun.

¹³ Pangeran bakal aberkadana reng-oreng alem, se raja, bariya keya se kene’.

¹⁴ Moga PANGERAN marengana bannya’ ana’, ka ba’na ban toronanna.

¹⁵ Moga ba’na eberkadana bi’ PANGERAN, se nyepta’agi langnge’ ban bume!

¹⁶ Langnge’ reya kaagunganna PANGERAN malolo, tape bume eparengngagi ka manossa terros.

¹⁷ PANGERAN ta’ eagungngagi bi’ oreng mate, bi’ oreng se la toron ka tana se seppe.

¹⁸ Tape sengko’ ban ba’na se odhi’ reya asokkor ka Salerana, sateya ban salanjangnga. Molja’agi PANGERAN!