Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Seng bennami, ale Jahowa, seng bennami, tapi bani goran-Mu ma bere Ham hasangapon, halani idop ni uhur-Mu, halani hasintongan-Mu.

² Mase ma hatahonon ni sipajuh begu-begu, “Ija do Naibata ni sidea?”

³ Ia Naibata i nagori atas do, ipasaud do sagala rosuh ni uhur-Ni.

⁴ Sisombah-sombahon ni sidea, ai pirak pakon omas, na pinauli ni tangan ni jolma.

⁵ Dong do babahni, tapi seng boi marsahap; dong do matani, tapi seng marpangidah.

⁶ Dong do pinggolni, tapi seng marpanangar; dong do igungni, tapi seng marpanganggoh.

⁷ Dong do tanganni, tapi seng boi manjamah; dong do naheini, tapi seng boi mardalan; seng luar sora humbani tolonanni.

⁸ Sai songon sidea ma halak na paulihonsi, sagala halak na martenger ni uhur hujai.

⁹ Ale Israel, porsaya ma bani Jahowa! Ia do pangurupi bani sidea pakon gantar bani sidea.

¹⁰ Ale ginompar ni si Aron, porsaya ma bani Jahowa! Ia do pangurupi bani sidea pakon gantar bani sidea.

¹¹ Nasiam sihabiari Jahowa, porsaya ma bani Jahowa! Ia do pangurupi bani sidea pakon gantar bani sidea.

¹² Idingat Jahowa do hita, pasu-pasuon-Ni, pasu-pasuon-Ni do ginompar ni Israel, pasu-pasuon-Ni do ginompar ni si Aron.

¹³ Pasu-pasuon-Ni do na mangkabiari Jahowa, dakdanak rap pakon na magodang.

¹⁴ Sai martambah ma nasiam ibahen Jahowa, nasiam pakon anak nasiam.

¹⁵ Sai pinasu-pasu ma nasiam humbani Jahowa, sitompa langit pakon tanoh on.

¹⁶ Nagori atas Jahowa do simadasi, tapi tanoh on ibere do bani jolma manisia.

¹⁷ Sedo na dob matei mamuji Jahowa, sedo halak na dob tuad hu nagori toruh.

¹⁸ Tapi hita, hita do na mamuji Jahowa, humbani sonari ronsi sadokah ni dokahni. Haleluya!