Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pilangngeria’, na’! Parhatikangi kacara’dekangku siagang pangngassengangku kupangngajarranga mae ri kau,
2 sollanna nuasseng ampa’rampei kalennu siagang a’bicara sangkamma tau niaka pangngassenganna.
3 Anjo baine salaya, sanrapangi je’ne’ bani bawana, kana-kananna angngallei pa’mai’,
4 mingka punna allalo ngasemmo apa le’baka, paika mami siagang pa’risika mami ammantang tassesa.
5 Nare’resangko naung ri linona tau matea; oloang naoloa iamintu oloang lamange ri kamateanga.
6 Tena natuli ammantang ri oloang lamangea ri katallassanga; tanaassenga kalenna nammengkamo battu ri anjo oloanga.
7 Lanri kammana anjo, ana’-anaka, pilangngeri laloi kana-kanangku siagang teako balang parekangi.
8 Pakabellai kalennu battu ri baine sala kammaya anjo. Ba’lalo teako a’reppesi ri balla’na.
9 Punna assileporangko siagang baine kammaya anjo, latappela’mi kala’birannu, siagang nyawanu laniallemi ri wattu rungkanu ri tau tangngassenga mangngamaseang.
10 Kakalumanynyangannu lala’busuki nikanre ri tau maraeng, siagang wassele’ karesoannu la’jari napatangi tau tenaya nanuassengi.
11 Kale’bakkanna lakkunrareng mako, punna cappu’mo batangkalennu nikanre ri garring.
12 Nampa lanukana, "Ah, angngapa nakubirisi’ ri pappakaingaka? Angngapa kutaeroka nipasaile?
13 Taeroka’ ampilangngeri guru-gurungku siagang taeroka’ anturuki ke’nanga.
14 Takuassenga kalengku nakutu’guru’mo ri dallekang matanna tau jaia."
15 Lanri kammana anjo, teako amminrai pa’mai’nu mae ri bainennu siagang mangngaiko mae ri ia bawang.
16 Tena matu-matunnu a’boya kanyamangngang mae ri baine teai bainennu.
17 Anjo kanyamangnganga poro untu’ ikau bawang siagang bainennu, teai untu’ siagang tau maraenga.
18 Lanri kammana anjo, paralluko mate’ne siagang baine kalennu; boyai kanyamangnganga siagang tulolo le’baka nunikkai,
19 iamintu tulolo sannaka ga’gana siagang laccirika sanrapang kijang. Boli’mi kamma kaga’gang tubuna tuli ampongoriko siagang nabengoko pangngainna.
20 Apa matu-matunna taua cinna mae ri baine maraenga, ana’? Untu’ apa nanusikatinroang siagang baine salaya?
21 Naciniki Batara sikontu apa-apa nagaukanga rupataua. Manna kemae lampana rupataua, tuli nijannangngi ri Batara.
22 Anjo dosana tau ja’dalaka sanrapangi sikko’ tattannanga untu’ kalenna tonji ke’nanga.
23 Matei lanri tenana naero’ annarima pappakainga’. Katoloanna angngerangi mae ri kaancuranga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA