Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mara edhingngagi sengko’, na’! Edhingngagi pagu-onggu kabicaksana’an ban pangarteyan se eajarragi sengko’ ka ba’na,
2 sopaja ba’na taowa baramma koduna ba’na ngator tengkana ban acaca menangka oreng se andhi’ pangataowan.
3 Babine’ se nakal bibirra manes akantha maddu ban cacana ngapencot ate,
4 tape mon kabbi la mare, kare nyandhang pae’na ban kasossa’anna.
5 Ba’na eeret toron ka dunnyana oreng mate; jalan se elebadi nojju ka maot.
6 Babine’ jareya ta’ paggun e jalan se nojju ka odhi’; o-tao la etemmo nyaleyot dhari jalan jareya ta’ kalaban apangrasa.
7 Daddi, na’, mara kabbi edhingngagi tang oca’ reya ban ja’ enthengngagi.
8 Jauwi babine’ se kantha jareya! La’-mala’ ja’ semma’e bengkona.
9 Mon ba’na ma’-nyemma’ ka babine’ se kantha jareya, ba’na bakal kaelangana kahormadanna, ban nyabana ba’na bakal erengguda gi’ ngodhana bi’ reng-oreng se ta’ andhi’ bellas ase sakale.
10 Artana ba’na bakal obusa ekakan oreng laen, ban hasel ollena pello konengnga ba’na bakal ekaandhi’a oreng se ta’ ekataowe ba’na.
11 Dhi-budhina ba’na bakal aserrowa, mon badanna ba’na tompes ekakan panyaket.
12 Ba’na tanto pas ngoca’, "Ah, arapa sengko’ me’ baji’ ka babala’an? Arapa sengko’ me’ ta’ endha’ epaenga’?
13 Sengko’ ta’ endha’ ngedhingngagi tang ru-guru ban ta’ atoro’ ka dhabuna.
14 O-tao sengko’ la tadha’ argana e dhalem masarakat."
15 Daddi, paesto ka binena dibi’, ban bagi kataresna’anna ba’na ka binena jareya malolo.
16 Tadha’ gunana ba’na nyare kane’madan dhari oreng se banne binena.
17 Kane’madan jareya pera’ kaangguy ba’na ban binena malolo, banne ban oreng laen.
18 Daddi ba’na kodu pasenneng pera’ ban binena dibi’; sare kane’madan pera’ e babine’ se la akabin bi’ ba’na –
19 paraban se raddin ban lebur gulina akantha keddang. Dina badanna se lebur abasanna matagiyur atena ba’na ban asmarana mamabu’ ba’na.
20 Apa gunana anapso ka babine’ laen, na’? Arapa’a me’ tedhunga ban babine’ nakal?
21 PANGERAN ngoladi sabarang se elakone manossa. Dha’ emma’a bai manossa, bi’ Pangeran eoladi terros.
22 Dusana oreng jahat padha ban jebbak se ajira’ aba’na dibi’.
23 Aba’na mate polana ta’ narema babala’an. Kabudhuwanna maancor aba’na dibi’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA