Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ale anakku, paruhurhon ma hapentaran na humbangku, anjaha pateleng pinggolmu hubani hauhuron na humbangku,

² ase tarramotkon ho uhur panimbangion, anjaha bibirmu manjolom habotohon.

³ Mantektekkon manisan do bibir ni boru jalang, anjaha landitan do tolonanni ase minak;

⁴ tapi dobni paetan do ai ase pogu, marot songon podang sidua mata.

⁵ Naheini tuad hu hamatean, anjaha langkah-langkahni manuju nagori toruh;

⁶ seng ipardulihon dalan hu hagoluhan, kahou do panlangkahni, seng panagamanni.

⁷ Ai pe, ale anakku, tangihon hanima ma ahu, ulang ma manlembang hanima humbani hata ni pamanganku.

⁸ Padaoh ma dalanmu hun bani, anjaha ulang ma dohori labah ni rumahni,

⁹ ase ulang ibere ho gogohmu bani halak na legan, ampa ari-ari ni goluhmu bani halak na so parholong,

¹⁰ ase ulang halak na legan marbosur-bosur humbani pansarianmu, anjaha na hinangalutkonmu laho hu rumah na legan,

¹¹ gabe morong-orong ho bani ujungni, bani parreong ni dagingmu pakon angkulamu,

¹² gabe ihatahon ho, “Mase ma nani huhagigihon pangajaran, anjaha itulak uhurhu pinsang-pinsang?

¹³ Mase ma lang hutangihon sora ni gurungku, anjaha mase ma lang hupateleng pinggolhu bani na mangajari ahu?

¹⁴ Otik nari mando ase magou tumang ahu, i tongah-tongah ni humpulan ni kuria in.”

¹⁵ Minum ma ho humbani parigimu sandiri, humbani bah na mabaor humbani bah tubuhmu.

¹⁶ Ulang ma manjalir bah na hun parigimu hu darat, gabe bah na mardalan i alaman!

¹⁷ Ho ma gelah parsimada ijai, ulang dong halak na legan hasomanmu.

¹⁸ Sai pinasu-pasu ma bah tubuhmu, anjaha malas ma uhurmu bani parinangon sanggah haposoonmu, na laingan songon ursa, na majenges songon balua.

¹⁹ Sai hajengesonni ma na pabosurhon ho, anjaha marsombuh-sombuh ma ho marhitei holongni.

²⁰ Mase ma, ale anakku, mabuk ho bani parinangon ni halak, anjaha irohop ho naboru na legan?

²¹ Ai talar do dalan ni ganup halak i lobei ni Jahowa, anjaha ipardiatei do ganup langkah-langkahni.

²² Hajahatonni sandiri do na manangkap parjahat, anjaha ipardiatei do ganup langkah-langkahni.

²³ Matei do ia halani itulak pangajaran, anjaha halani banggal ni haotoonni kahou do ia.