Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Areya’ ca’-oca’ se edhabuwagi ebu Lemuwel, rato Masa ka pottrana,

² "Na’, buwana tang ate, se lahir ollena tang du’a. Apa se ekoca’agiya sengko’ ka ba’na?

³ Ja’ wang-mowang kakowadan ka oreng babine’. La bannya’ rato se ancor polana babine’.

⁴ Kaenga’e Lemuwel! Ngenom anggur ban mato ka nom-enoman kerras, ta’ pantes monggu ka pangobasa.

⁵ Sabab, mon rato ngenom nom-enoman kerras, tanto pas loppa ka hokom ban ta’ marduli ha’na oreng se ta’ andhi’ kakowadan.

⁶ Nom-enoman kerras reya kaangguy oreng se nyangsara ban sossa atena.

⁷ Reng-oreng jareya ngenom terro loppa’a ka kameskenanna ban ka kasossa’anna.

⁸ Tolonge oreng se ta’ bisa nolong aba’na dibi’. Pasalamettagi ha’na oreng se ta’ bisa apa-rapa.

⁹ Aperrang kaangguy reng-oreng jareya, mara daddi hakim se adil. Pasalamettagi ha’na oreng mesken ban oreng se tatendhes."

¹⁰ Bine se cakep malarat sareyanna; bine se kantha jareya alarangan dhari enten ban barleyan.

¹¹ Lakena ta’ kera kakorangan pa-apa, sabab la parcaja ka binena jareya.

¹² Babine’ se kantha jareya ta’ tao agabay sala ka lakena, saomorra becce’ ka lakena jareya.

¹³ Babine’ jareya bajeng makompol rame ban buluna dumba, terros etennon tadha’ ambuna.

¹⁴ Dhari jauna babine’ jareya madhateng kakanan, padha ban se ejalannagi pal-kapalla dagang.

¹⁵ Gi’ petteng la jaga nyadhiya’agiya kakanna saessena bengkona, sarta gi-magiya lalakon ka reng-barengnga.

¹⁶ Babine’ jareya nyare tana pas ebelli, pas namenne kebbun anggur dhari hasella lakona.

¹⁷ Babine’ jareya nyadhiya’agi badanna alalakona salar-kellarra.

¹⁸ Babine’ jareya tao sabarang se elakone madhateng kaontongan; mon alalakon sampe’ ce’ malemma.

¹⁹ Bennang epente, kaen etennon.

²⁰ Ta’ cerre’ ka oreng se kakorangan, bagus atena ka oreng se marlowagi partolongan.

²¹ Babine’ jareya ta’ kobater mon la mosem cellep, sabab la nyadhiya’agi kalambi panas kaangguy saessena bengkona.

²² Babut e bengkona gabayanna dibi’, bariya keya kalambina se dhari kaen linen bungo terrong se bagus.

²³ Lakena oreng se kalonta nyamana, sala settong dhari pamimpin e kotthana.

²⁴ Kalambi ban sabbu’ ekagabay, pas ejuwal ka sodagar.

²⁵ Babine’ jareya ehormat ban ekatako’e oreng, ta’ kobater ngadhebbi bakto e budhi are.

²⁶ Pacacana lemma’ manes ce’ alossa; ca’-oca’na bicaksana.

²⁷ Mon alalakon ce’ bajengnga, ta’ nga-satengnga ngoros kabutowanna roma tatanggana.

²⁸ Babine’ jareya ehormat bi’ na’-ana’na, sarta ealem bi’ lakena.

²⁹ "Bannya’ babine’ se becce’," ca’na lakena, "tape ba’na se paleng becce’ dhari sakabbinna."

³⁰ Roba se raddin ta’ ekenneng parcaja, raddinna mowa bisa elang; tape babine’ se ta’at ka PANGERAN pantes ealem salanjangnga.

³¹ Bales kabecce’anna, jareya babine’ se patot ehormadi e man-dhimman.