Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iaminne kana-kana napaua amma’ Lemuel, karaeng Masa mae ri ana’na,

² "Anakku, ana’ nikamaseangku, kulassukanga lanri nipilangngerinna pappala’ doangku. Apa kutadeng lakukana ri kau?

³ Teako pa’laboangi kagassingannu yareka nupela’ bawang-bawang kakassakannu mae ri bainea. Jaimi karaeng a’jari panra’ lanri baine.

⁴ U’rangi anne Lemuel! Angnginung anggoro’ siagang cinna dudua ri inungang terasa’, tena nasiratang mae ri pamarentaya.

⁵ Saba’, punna angnginung inungang terasa’ karaenga, nakaluppai hukkunga siagang tenamo najampangi ha’na tau lammaya.

⁶ Inungang terasaka iami untu’ tau ta’ronanga siagang tau si’naya pa’mai’na.

⁷ Angnginungi ke’nanga untu’ angkaluppai kakasi-asianna siagang kasusaanna ke’nanga.

⁸ Alleangangi ke’nanga tau tenaya nakkulle naallei kalenna. Jagai ha’na sikontu tau tenaya pakkullena.

⁹ Appattujuangko untu’ ke’nanga, siagang a’jariko haking adele’. Katutui ha’na tu kasi-asia siagang tau nijallakkanga."

¹⁰ Baine cara’deka sukkaraki nigappa; lompoangngangi anggaranna na intang barliang.

¹¹ Tena nalakakurangang apa-apa bura’nenna, lanri napadongkoki panrannuanna mae ri ia.

¹² Tale’bakai a’gau’ kodi mae ri bura’nenna; lalang sikontu tallasa’na baji’ gauki mae ri ia.

¹³ Rajengi appasse’re tannungang siagang bulu gimbala’, tuli sibuki anjama attannung.

¹⁴ Battu bellai angngerang kanre, sanrapang nagaukang kappala’-kappala’ padangganga.

¹⁵ Ri bari’basa’ dudua ambangungi appasadia kanre untu’ bone balla’na, siagang untu’ ambagei tugasa’ palayang-palayanna.

¹⁶ A’boyai sipammantangang tampa’, nampa naballi; angngusahai koko anggoro’ battu ri wassele’ panggappanna.

¹⁷ Napasadiai kalenna untu’ anjama tojeng-tojeng.

¹⁸ Naassengi angkana sikontu apa nagaukanga, assawalaki; anjamai sa’genna lantang bangngia.

¹⁹ Naotereki bannanga siagang natannungi kaenga.

²⁰ Tena nagi’gili’ mae ri tau kakuranganga; baji’ pa’maiki mae ri parallua nitulung.

²¹ Tena naranggasela punna battu wattu dinginga, lanri sadiai baju dinginga untu’ bone balla’na.

²² Kalenna ampareki tappere’ pa’lapara’na; pakeanna kaeng lenang sannaka ga’gana.

²³ Masahoroki arenna bura’nenna kalase’renna pamimping kotaya.

²⁴ Appareki pakeang siagang passikko’ aya’ nampa nabalukang ri padangganga.

²⁵ Nikangalikangi siagang nipakalompoi; siagang tena naranggasela ri passala’ allo lanadallekanga.

²⁶ Lammai bicaranna; cara’deki kana-kananna.

²⁷ Tuli rajengi anjama siagang naparhatikangi urusang lalang balla’na.

²⁸ Nipakalompoi ri ana’-ana’na, siagang nipuji ri bura’nenna, angkana,

²⁹ "Nia’ jai baine baji’, mingka ikaumi kaminang baji’ battu ri yangasenna ke’nanga."

³⁰ Tanja’ ga’gaya takkulleai nipatappa’, siagang kaga’ganga lalanynyaki; mingka baine mappilangngeria ri Batara siratangi anggappa pammuji.

³¹ Balasaki sikontu kabajikanna; iami baine siratanga nipakalompo ri kere-keremae!