Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ On do hata ni si Lemuel, raja ni Massa, pinodahkon ni inangni bani,

² “Aha do ale anakku hatahononku bam! Aha do, ale sinuan tunas? aha do, ale anak bagah-bagahku?

³ Ulang ma bere gogohmu bani naboru, anjaha ulang ma pasaor dirimu bani halak siparseda raja-raja.

⁴ Seng patut bani raja-raja, ale Lemuel, seng patut bani raja-raja minum anggur, sonai homa kopala-kopala minum siinumon na koras,

⁵ ase ulang halani haru-haru minum sidea, gabe lupa uhum hasintongan, gabe peol panguhumni bani halak na madoyuk.

⁶ Bere ma inuman na koras bani halak na magou-magou, ampa anggur bani halak na pusokan uhur,

⁷ ase minum sidea, gabe lupa bani hasombuhonni, anjaha seng idingat be hasunsahanni.

⁸ Buha ma pamanganmu mangkopkop halak na longah, halani hak ni halak na tading maetek.

⁹ Buha ma pamanganmu, anjaha sintong ma panguhummu, ondingi ma hak ni halak na madoyuk ampa na masombuh.”

¹⁰ Parinangon na madear, ise ma na dob jumpahan ai? Harganan do ai daoh humbani mutiha.

¹¹ Ia do tenger ni uhur ni paramangonni. anjaha pasal na dong pe seng hurangan ia.

¹² Na dear do ibahen hubani pargotongni, sedo na masambor, sadokah manggoluh ia.

¹³ Sari do ia bani wol ampa bonang linnen, anjaha ringgas do tanganni marhorja.

¹⁴ Songon kapal ni partiga-tiga do ia, humbani na daoh do iparroh sipanganon bani.

¹⁵ Girah sogod, golap-golap ope, domma puho ia, ipatorsa ma panganon bani pangisi ni rumahni anjaha ibagihon horja bani juakjuak naboru.

¹⁶ Iuhurhon do homa pasal juma, gabe dapotsi do ai; marhitei pansarian ni tanganni ipungkah pohon anggur.

¹⁷ Igonditi do binongeini ase margogoh, anjaha tanganni sihap do tongtong.

¹⁸ ididah do, manjadi do horjani, anjaha bani na golap pe seng miloh suluhni.

¹⁹ Pandei do tanganni manjamah sorha, anjaha sihap jari-jarini manangkap tuldak.

²⁰ Layak do tanganni bani halak na masombuh, anjaha buha bani halak na hurangan.

²¹ Seng haru uhurni pasal rumahni bani musim salju, halani haganup na i rumahni marbaju wol do.

²² Ipauli do salimut bani, hiou linnen na alus ampa na marpurada do pakeianni.

²³ Sangap do pargotongni i partumpuan, sanggah na hundul ia rap pakon pangintuai ni nagori in.

²⁴ Itonun do pakeian linnen, ijuali do ai; gondit do jualonni bani halak partiga-tiga.

²⁵ Tunggung anjaha sangap do ia, tawa do ia managam ari na roh.

²⁶ Ibuha do pamanganni ibagas hapentaran, anjaha podah halamlamon do i atas ni dilahni.

²⁷ Ipardimata do pardalan ni horja i rumahni, anjaha seng ibotoh na marayoh.

²⁸ Roh do anakni, ipuji do ia, sonai homa paramangonni, ipatunggung do ia, nini,

²⁹ “Buei do parinangon na madear, tapi ham do siatasan humbani haganupan ai.”

³⁰ Sipaoto-oto do hajengeson, anjaha na lang do rupa na majenges, tapi parinangon na mabiar bani Jahowa, ai do sipujion.

³¹ Bere ma hu bani buah ni na hinorjahonni, anjaha lahoanni do mambahen tarpuji ia i partumpuan.