Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ana’, tarima laloi ajarang-ajarangku, siagang tuli u’rangi laloi sikamma pappakaingakku mae ri kau.
2 Parhatikangi nikanaya cara’de’ siagang usahai ampahangi.
3 Iyo, ana’, usahai laloi untu’ ampahangi pikkirang taranga siagang appalakko pangngassengang.
4 Boyai anjo kammaya sanrapang a’boya bulaeng, siagang ondangi anjo kammaya sanrapang angngondang pakkalumanynyangngang taccokkoa.
5 Lanri kammana lanuassemmi angkanaya apa battuanna nikanaya malla’ ri Batara, siagang lanugappami pangngassengang ri sesena Allata’ala.
6 Batarami assare kacara’dekang; battu ri Iami rupataua anggappa pangngassengang siagang pammahang.
7 Mae ri tau lambusuka pa’mai’na siagang tenaya callanna, Natulungi siagang Najagai.
8 Najagai Batara tau adeleka ri panggaukanna, siagang Nala’langi ke’nanga mangngaia ri Ia.
9 Punna mannurukiko ri nakke ana’, lanuassengi anjo apa nikanaya adele’, lambusu’, siagang baji’. Lanuasseng tongi angkana antekamma batenu nukkulle tulusu’ attallasa’.
10 La’jariko tu cara’de’, siagang anjo pangngassengannu lanapakarannui pa’mai’nu.
11 Lanikatutuiko ri pammahannu siagang kacara’dekannu,
12 kammayatompa lanapisangkaiko anturuki batena tau tenaya nabaji’ batena attallasa’, kammayatompa nupakabellai kalennu battu ri sikamma tau ja’dalaka bawana.
13 Taerokai ke’nanga anturuki nikanaya cara attalasa’ bajika; oloang sassang siagang rassia dosa naolo ke’nanga.
14 Battu ri kaja’dallanna ke’nanga napanggappai kasannangngang.
15 Kodi sipaki siagang jekkongi ke’nanga lalang tallasa’na.
16 Ikau ana’, lakkullei nutolla’ panynyonyo’na baine ja’dalaka, ia eroka angngallei pa’mai’nu, ammake kana-kana te’ne.
17 Anjo baine kammaya tajarrekai pa’mai’na mae ri bura’nenna, siagang nakaluppaimi janjinna mae ri Allata’ala.
18 Punna mangeko ri balla’na battuanna mange mako ri kamateanga. A’lampaya mange anjoreng sangkamma le’baki nikanaya a’lampa mange ri linona tau matea.
19 Tau a’lampaya mange ri ia talammoterami mange ri oloang lamangea ri katallassanga.
20 Lanri kammana ana’ pinawang laloi bate tallasa’na tau bajika, siagang attallasakko situru’ ero’Na Allata’ala.
21 Nasaba’, tau attallasaka situru’ ero’Na Allata’ala, iamintu tau lambusuka pa’mai’na, iami ke’nanga lammantang ri pa’rasangang le’baka Napa’janjiang Batara.
22 Mingka tau ja’dalaka siagang tau dorakaya lanipasambilai assulu’ ri Allata’ala battu ri anjo pa’rasanganga, sanrapang ruku’ nibi’buka battu ri buttaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA