Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ale anakku, anggo ijalo ho hatangku anjaha iparimbagaskon ho titahku,

² tangi ho bani hapentaran anjaha itareihon ho uhurmu dompak pangarusion,

³ tongon, anggo dilo-dilo ho bani pangarusion, ipamaling ho soramu mangindo hauhuron,

⁴ anggo ipindahi ho ai songon na mangindahi pirak, anjaha i torihi ho ai songon bani arta na ponop,

⁵ jadi arusanmu ma biar dompak Jahowa, anjaha jumpah ho habotohon pasal Naibata.

⁶ Ai Jahowa do sibere hapentaran, humbani pamanganni do roh habotohon pakon hauhuron;

⁷ Ia do sipasirsir pangurupion bani halak parpintor, Ia do gantar bani halak na bujur marparlahou.

⁸ Ijaga do pardalan ni uhum, anjaha iramotkon do dalan ni halak na daulat Bani.

⁹ Jadi arusanmu ma hapintoron pakon uhum, habonaron pakon sagala dalan na dear;

¹⁰ ai roh ma hapentaran hubagas uhurmu, anjaha mantin ma habotohon bani tonduymu;

¹¹ uhur hapantason ma manramotkon ho, anjaha pangarusion siparjaga bam.

¹² Paluahonni do ho humbani dalan hamagouan, humbani halak sisahapkon na masambor,

¹³ halak na manundalhon dalan hasintongan, laho mardalan bani dalan hagolapan,

¹⁴ na marosuh mangkorjahon na marsambor anjaha na marmalas uhur bani tahi-tahi na jahat,

¹⁵ halak na marlegot-legot pardalanni, na mardalan bani dalan hakahouan.

¹⁶ Paluahonni do ho humbani parinangon ni halak, humbani parinangon na legan simantin sahap,

¹⁷ na manadingkon hasoman haposoonni hinan, na mangkalupahon padan ni Naibatani.

¹⁸ Ponop do rumahni hu hamatean, sonai age dalanni hu nagori toruh.

¹⁹ Sagala na laho hu bani, seng mulak be, anjaha seng dapotsi be dalan hagoluhan.

²⁰ Mardalan ma ho bani dalan ni halak na bujur, anjaha totap ma ho bani dalan ni halak parpintor.

²¹ Tongon halak parpintor do siiankon tanoh on, anjaha halak na daulat totap marianan ibagas,

²² tapi halak parjahat ripasonkon do hun tanoh ai, anjaha halak sipangosei iorbat do hunjai.