Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tarema pa-apa se eajarragi sengko’ reya, na’, ban kaenga’e terros tang babala’an ka ba’na.

² Tetene apa se bicaksana ban ehteyarragi sopaja ba’na pahama ka maksodda.

³ Onggu na’, ehteyarragi sopaja ba’na andhi’a pekkeran se tajem ban nyo’on sopaja ba’na eparenge pangarteyan.

⁴ Sare jareya pakantha se nyare emmas, serser pakantha se nyerser arta se tabendhem.

⁵ Kalaban cara se kantha jareya ba’na bakal taowa apa artena tako’ ka PANGERAN ban ba’na bakal olleya pangataowan parkara Allah.

⁶ PANGERAN se apareng hekmat ban dhari Salerana manossa narema pangataowan ban pangarteyan.

⁷ Oreng se atena berse ban tadha’ calena eparenge partolongan ban pangaoban.

⁸ Pangeran ajaga reng-oreng se adil, sarta ngaobi reng-oreng se taresna ka Salerana.

⁹ Mon ba’na norodi sengko’, na’, ba’na tanto tao apa se adil, jujur ban bagus. Ba’na bakal taowa keya baramma carana ba’na kodu odhi’.

¹⁰ Ba’na bakal daddiya bicaksana, ban pangataowanna ba’na bakal masennengnga atena ba’na.

¹¹ Pangarteyan ban kapenterranna ba’na bakal ngaobana ba’na,

¹² sarta lang-ngalange ba’na atoro’ cara odhi’ se ta’ becce’, bariya keya majau ba’na dhari reng-oreng se juba’ colo’na.

¹³ Reng-oreng jareya ta’ endha’ atoro’ jalan se becce’ e dhalem odhi’na; se epele jalan se petteng ban possa’ dusana.

¹⁴ Reng-oreng jareya nemmo kasennengngan dhari lalakonna se jahat.

¹⁵ Reng-oreng jareya roce ban odhi’na ta’ teppa’.

¹⁶ Ba’na, na’, tanto bisa nolak mon ecacae babine’ se nakal se aehteyar ngangguy ca’-oca’ se manes sopaja ba’na kapencoda.

¹⁷ Babine’ jareya ta’ esto ka lakena sarta loppa ka janjina ka Allah.

¹⁸ Mon ba’na entar ka bengkona, ba’na padha ban se ajalan ngamba’a pate. Entar ka jadhiya padha ban oreng se entar ka dunnyana oreng mate.

¹⁹ Oreng se entar ka babine’ jareya tadha’ se abali ka jalan se nojju ka kaodhi’an.

²⁰ Daddi, na’, toro’ contona oreng se becce’, ban mara ba’na odhi’ menorot kasokanna Allah.

²¹ Sabab oreng se odhi’na atoro’ ka kasokanna Allah, iya areya reng-oreng se berse atena, jareya se ngennengngana nagara se ejanjiyagi Pangeran.

²² Tape oreng se jahat ban dusa bakal ebuwanga kalowar dhari nagara jareya bi’ Allah, akantha rebba se edabu’ dhari tana.