Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pelajarilah si kukataken man bandu o anakku, janah ula kal kam lupa si kuturiken man bandu.

² Megermetlah nandangi kepentaren jenari cubakenlah ngantusisa pe.

³ O anakku, pindolah pemeteh, seksekilah ndatken pengertinna.

⁴ Daramilah e desken ndarami emas, ayakilah e desken ndarami erta si terbuni.

⁵ Alu bage maka ietehndu kai ertina erkemalangen man TUHAN, jenari idatndu me pemeteh kerna Dibata.

⁶ TUHAN kap si mereken kepentaren, i bas Ia nari kap manusia ndatken pemeteh ras pengertin.

⁷ Man kalak benar ras bujur IberekenNa penampat ras ampang-ampang.

⁸ TUHAN si ngkawali kalak si bujur perbahanenna janah iampang-AmpangiNa kalak si tutus man BaNa.

⁹ Adi idengkehkenndu aku, ietehndu kai si bujur, si benar dingen adil. Ietehndu pe kai si arus ilakokenndu.

¹⁰ Kam jadi kalak pentar janah pemetehndu mereken kesenangen man bandu.

¹¹ Kebeluhen dingen pengertinndu kap si ngkawali kam,

¹² dingen ia si ngambati kam maka ula ngelakoken si lepak. Ipedauhna kam i bas kalak si erbahan perjengilen nari alu rananna.

¹³ Kalak si bage la nggit ngikutken peraten Dibata, erkiteken ia erdalan i bas kegeluhen si dem alu dosa.

¹⁴ Meriah iakapna ngelakoken si salah janah ndarami kepuasen i bas perbahanenna si jahat.

¹⁵ Ia penipu dingen la terteki pe.

¹⁶ Ngasup me kam nulak diberu gutul si nami-nami kam alu cakap medalit gelah kam guling.

¹⁷ Diberu si bage la keleng atena perbulangenna, nggo lupa ia padan si ibelaskenna man TUHAN.

¹⁸ Adi lawes kam ku rumahna, e ertina kam erdalan kempak kematen. Ndahi ia seri ras ndeheri doni kematen.

¹⁹ Kalak si ndahi ia asa ndigan pe lanai banci mulihken; lanai ndigan pe ia mulihken ku bas dalan kegeluhen.

²⁰ Dage o anakKu, arus maka iusihndu perbahanen kalak si mehuli dingen nggeluhlah i bas kegeluhen si benar.

²¹ Sabap kalak si nggeluh rikutken si ngena ate Dibata, eme kalak si bersih ukurna, ia kap si tading i bas negerinta enda.

²² Tapi kalak jahat dingen perdosa isintapken Dibata me i bas negeri enda nari desken dukut si iruah i bas taneh nari.