Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sada doding. Psalm humbani si Asap. (83-2) Ham, Naibata, ulang ma sai sip Ham, ulang ma ipanengel-nengel Ham, ulang ma sai soh Ham, ale Naibata!

² (83-3) Ai tonggor ma, sai manggeori do munsuh-Mu, na mandomdomi Ham, sai ipadorgak do uluni.

³ (83-4) Sai mambahen ranggi-ranggian do sidea mangimbang munsuh-Mu, anjaha manriahi sidea manlawan halak na niondingan-Mu.

⁴ (83-5) Nini sidea, “Eta, boiskon hita ma sidea songon sada bangsa, ase ulang be dong na mardingat Israel.”

⁵ (83-6) Tongon, marsada ni uhur do sidea manriah, anjaha marpadan do sidea manlawan Ham:

⁶ (83-7) Lampolampo ni Edom pakon Moab, halak Ismael pakon halak Hagar;

⁷ (83-8) Gebal pakon Amon ampa Amalek, halak Palistim pakon par Tirus;

⁸ (83-9) dihut do Assur hasoman ni sidea, gabe panungkoli bani ginompar ni si Lot. Sela.

⁹ (83-10) Bahen Ham ma bani sidea songon na bani halak Midian, songon na bani si Sisera, ampa si Jabin i lambung ni Bah Kison,

¹⁰ (83-11) ai ma na bois dohorhon Endor, gabe napu ni juma ni sidea.

¹¹ (83-12) Bahen Ham ma dompak na sangap ni sidea songon na bani si Oreb pakon si Zeb, anjaha ganup raja ni sidea songon si Zeba pakon si Salmuna,

¹² (83-13) na mangkatahon ai, “Buat hita ma sagala ianan ni Naibata banta!”

¹³ (83-14) Ham Naibata, bahen Ham ma sidea songon tompoh-tompoh, songon lapa-lapa i lobei ni logou.

¹⁴ (83-15) Songon apuy, na manutung harangan, songon gara ni apuy, na mamonsongkon dolog,

¹⁵ (83-16) sonai ma usir Ham sidea marhitei halisungsung-Mu, anjaha songgoti Ham sidea marhitei haba-haba-Mu.

¹⁶ (83-17) Gok ma bohi ni sidea bahen Ham bani habadoron, ase pindah-pindah sidea bani goran-Mu, Ham Jahowa.

¹⁷ (83-18) Sai bador anjaha tarsonggot ma sidea sadokah ni dokahni, maila anjaha magou ma sidea,

¹⁸ (83-19) ase andohar ibotoh sidea, pitah Ham do na margoran Jahowa, Na Tang Sitimbulan i sab tanoh on.