Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pammujina Asaf: se’re kelong-kelong. (83-2) O, Allata’ala, teaKi’ a’mereki, teaKi’ lappakki limanTa siagang ammantang a’mereki.

² (83-3) Ciniki musunTa a’jalloki, sikamma tau birisika ri Katte apparicu ngasengi.

³ (83-4) Appareki rancana cara’de’ untu’ angngewai ummatTa; assikongkoloki ke’nanga angngewai sikamma tau Kijagaia.

⁴ (83-5) Nakana ke’nanga, "Umba niancuruki bansa Israel, sollanna nikaluppai arenna ke’nanga."

⁵ (83-6) Assamaturu’mi bansa-bansaya, assikongkolo’mi ero’ angngewaKi’:

⁶ (83-7) bansa Edom, siagang Ismael, tu Moab siagang Hagar;

⁷ (83-8) bansa Gebal, Amon, siagang Amalek, bansa Filistea siagang pandudu’na Tirus.

⁸ (83-9) Kammayatompa Asyur asse’re tommi ke’nanga, a’jari mata-matana turunganna Lot.

⁹ (83-10) Gau’ kammami ke’nanga tu Midian, sangkamma Sisera siagang Yabin ri Binanga Kisyon,

¹⁰ (83-11) le’baka niancuru’ ri Endor, na’jari pupu’ ri butta.

¹¹ (83-12) Gau’mi pamimpinna ke’nanga sangkamma Oreb siagang Zeeb, patunduki tukoasana ke’nanga sangkamma Zebah siagang Salmuna,

¹² (83-13) lanri nakanamo ke’nanga, "Umba naniempoi butta pammantanganNa Allata’ala."

¹³ (83-14) O, Allata’ala, pasimbung laloi ke’nanga sanrapang limbu’bu’, sanrapang rarame niirikanga ri anging.

¹⁴ (83-15) Sanrapang pepe’ angkanreai romanga, rinra pepe’ ampamutungai moncong-monconga.

¹⁵ (83-16) Ondangi ke’nanga siagang anging lompoTa, pabangkai ke’nanga siagang anging puttusutTa.

¹⁶ (83-17) O, Batara, boli’mi kamma nihina ke’nanga, sollanna naakui ke’nanga kakoasanTa.

¹⁷ (83-18) Boli’mi kamma tuli nipakasiri’ siagang malla’ ke’nanga, boli’mi kamma mate lalang hina ke’nanga.

¹⁸ (83-19) Poro naassengi ke’nanga angkana iKatteji bawang Kaminang Tinggi, O, Batara, makoasaya ri sikontu linoa.