Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Psalm ni si Daud. (41-2) Martuah ma halak na marpanatap bani halak na galek; bani panorang hasosakan, sai paluahon ni Jahowa do ia.
2 (41-3) Jahowa do na manramotkon ampa na pagoluhkonsi, anjaha martuah do ia bahenon-Ni i tanoh on; seng anjai ondoskonon-Ni ia hu tangan ni munsuhni.
3 (41-4) Jahowa do na manatangsi bani podomanni sanggah boritan, mubah do ibahen haganup pangandunganni.
4 (41-5) Ningku do, “Ham Jahowa, maidop ma uhur-Mu bangku, pamalum Ham ma ahu, ai dompak Ham do ahu mardousa.”
5 (41-6) Isahapkon imbangku do na jahat dompak ahu: Sadihari do ia matei, ase magou goranni?
6 (41-7) Anggo dong halak na manorih ahu, ladung do isahapkon; na sambor do ipatumpu-tumpu uhurni, anjaha i darat isahap-sahapkon ma ai.
7 (41-8) Ganup na marsogam ni uhur bangku marhusip-husip pasal ahu, na jahat do ipingkir-pingkiri sidea dompak ahu.
8 (41-9) Domma mangonai bani naborit na parah, anjaha ia, na tibal-tibal ai, seng anjai hehe be.
9 (41-10) Gari huan-kuanku, hatengeran ni uhurhu, na rap mangan pakon ahu, iangkat do naheini laho mantadahkon ahu.
10 (41-11) Tapi Ham Jahowa, sai idop ma uhur-Mu bangku, pajongjong Ham ma ahu, ase mambalas ahu bani sidea.
11 (41-12) Marhitei on botohonku ma, paboa na marosuh do Ham bangku, anggo seng be marsurak-surak imbangku dompak ahu.
12 (41-13) Anjaha ahu, ibagas hasintongankai, itatang Ham do ahu, anjaha ipajongjong Ham do ahu hu lobei-Mu tongtong.
13 (41-14) Napuji ma Jahowa, Naibata ni Israel, humbani na basaia ronsi sadokah ni dokahni. Amen, amen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA