Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Untu’ pamimping pakelong. Pammujina Daud. (41-2) Mate’nei tau amparhatikangai tau lammaya; lanitulungi ri Batara ri wattu kasukkarrang.

² (41-3) Lanijagai siagang laniparakai ri Batara, lanipakate’nei ri lino, siagang tena nipassareangi mae ri limanna musunna.

³ (41-4) Lanitulungi ri Batara ri wattunna garring, siagang lanipammollei ammotere’ ri garrinna.

⁴ (41-5) Kukana, "Dorakama’ mae ri Katte, o, Batara, kamaseanga’ siagang Kipammollea’ ri garringku."

⁵ (41-6) Nacarita tau ja’dalaka’ musungku, nakellaia’ mate ke’nanga na kunikaluppai.

⁶ (41-7) Sikamma tau battua antoaka’ tena natulusu’ pa’mai’na. Napa’rappungamma’ ke’nanga kabara’ kodi, nampa napa’la’bang kemae-kemae.

⁷ (41-8) Assibici’-bici’ ngasemmi tau birisika ri nakke; nacarita sanna’ma’ kodiku ke’nanga.

⁸ (41-9) Nakana ke’nanga, "Teai sipato’ sanna’na garrinna, tena olona lakkulle ambangung poleang."

⁹ (41-10) Ba’lalo manna bela bajikku kaminang kupatappaka, tau kuaganga sipangnganreang, nahina tomma’.

¹⁰ (41-11) Kamaseang laloa’, o, Batara, Kipammolle laloa’ ri garringku, sollanna kukkulle ambalasaki kaja’dallanna sikamma balingku.

¹¹ (41-12) Punna tena nabeta’ musungku, kuassemmi angkanaya mangngellaiKi’ ri nakke.

¹² (41-13) Kitulunga’ lanri kalambusangku, siagang Kipa’jaria’ attallasa’ siagang iKatte sa’genna satunggu-tungguna.

¹³ (41-14) Nipujimi Batara, Allata’alana Israel! Mammujiko ri Ia kamma-kamma anne sa’genna satunggu-tungguna!