Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kaangguy pamimpinna koor. Jaburra Daud. (41-2) Bajjra onggu oreng mekkere oreng se ta’ kowat; PANGERAN tanto nolong oreng jareya e bakto sossa.

² (41-3) PANGERAN tanto ajaga ban meyara oreng jareya, tanto marenge kasennengngan e dhalem odhi’na e dunnya, ban ta’ massra’agi aba’na ka mosona.

³ (41-4) PANGERAN tanto nolong oreng jareya e bakto sake’, badanna laju epabaras pole.

⁴ (41-5) Ca’na sengko’, "Abdidalem dusa ka Junandalem, GUSTE, kaneserre sareng pabarassagi abdidalem."

⁵ (41-6) Sengko’ ekacaca juba’ bi’ tang moso, se ngarep sopaja sengko’ mate ban ta’ ekaenga’e oreng pole.

⁶ (41-7) Reng-oreng se nyapot sengko’ ta’ saongguna atena. Kabbi padha nyare kabar juba’ parkara tang aba’, pas ekacaca san-kassannagi.

⁷ (41-8) Se baji’ ka sengko’ padha ato’-koto’, acaca barang se paleng juba’ parkara sengko’.

⁸ (41-9) Ca’na reng-oreng jareya, "Panyakedda ce’ sarana, ta’ kera ngenneng jaga pole salanjangnga."

⁹ (41-10) La’-mala’ tang kanca se rapet se paleng eparcaja bi’ sengko’, oreng se ngakan abareng ban sengko’ padha ya-nyeya sengko’.

¹⁰ (41-11) Kaneserre abdidalem GUSTE, pabarassagi abdidalem, sopaja abdidalem kengenga males kajahadanna so-moso abdidalem.

¹¹ (41-12) Manabi abdidalem ta’ epakala moso, abdidalem pas oneng ja’ abdidalem katarema ka Junandalem.

¹² (41-13) Junandalem nolong abdidalem lantaran ate abdidalem berse; abdidalem epaodhi’ asareng Junandalem salanjangnga.

¹³ (41-14) Molja’agi PANGERAN, Allahna Isra’il! Molja’agi Salerana sateya ban salanjangnga!