Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Humbani si Daud. Ham Tuhan, imbang Ham ma na mangimbang ahu, porang Ham ma na mamorang ahu.
2 Jolom Ham ma gantar etek pakon gantar bolon, jongjong ma Ham mangurupi ahu.
3 Ondamkon Ham ma tanja pakon tangkei dompak na mangayak ahu, hatahon Ham ma bani tonduyhu, “Ahu do sipaluah ho.”
4 Bahen Ham ma maila anjaha tarbador na manguhurhon hosahku, bahen Ham ma surut anjaha maila na manranggihon hamagouan dompak ahu.
5 Paturut Ham ma sidea songon lapa-lapa niombus ni logou, anjaha malekat ni Jahowa ma mardakdak sidea.
6 Sai golap ma dalan ni sidea anjaha landit, anjaha malekat ni Jahowa ma marburu sidea.
7 Ponop anjaha seng marhala itaon sidea siding ni sidea bangku, anjaha seng marhala ihurak sidea do godung mambuat hosahku.
8 Sai sogop ma bani hasedaon na so ingkat binotohni, siding na tinaonni na ponop ai ma manangkapsi, sai majomba ma ia hubagas godungni ai.
9 Tapi marolob-olob do tonduyhu ibagas Jahowa, anjaha marmegah-megah halani pangurupi-Ni.
10 Haganup holi-holingku mangkatahon, “Ham Jahowa, ise ma na songon Ham, na paluahkon halak na madoyuk humbani halak sigogohkonni, halak na musil ampa na madorun humbani panrampok?”
11 Marrohan do saksi na jahat-jahat, isungkuni do ahu pasal na so hubotoh.
12 Na jahat do ibahen bangku balos ni na madear, tarpunjung do ahu halani ai.
13 Tapi anggo ahu, sanggah boritan sidea hinan, hupakei do pakeian pusok ni uhur, huarsik do diringku marhitei puasa, anjaha unduk do ahu martonggo,
14 songon dompak huan-kuanku ampa saninangku sonai do hubahen pangabangku, marpakeian pusok ni uhur, unduk songon na mateian inang, sonai do unduk ahu.
15 Hape dob targompang ahu, megah ma sidea, anjaha martumpu-tumpu laho mangimbang ahu; halak na so hutanda mandorab ahu, anjaha seng marnamangadi sidea mangapasi ahu.
16 Seng maralang-alang sidea pahirihon ahu, ipangesnges do iponni dompak ahu.
17 Ham Jahowa, piga dokah on do sai paidah-idahon-Mu sonin? Paluah Ham ma tonduyhu humbani siparaum, sonai homa hosahku humbani anak ni singa.
18 Sai pujionku do Ham i tongah-tongah ni Kuria na banggal, anjaha pasangaponku do Ham i tongah-tongah ni jolma na mabuei.
19 Sai ulang ma lopas Ham marmalas ni uhur imbangku, siparladung, mangidah ahu, na mangkasogamkon ahu na so ingkat marhala, na pahirdop-hirdop matani.
20 Ai seng dong damei isahapkon sidea, iranggi do panipuon dompak halak parsip i nagori in.
21 Ipangangang sidea do babahni dompak ahu, anjaha nini, “E, e, e, domma ididah matanami.”
22 Domma ididah Ham ai, Ham Tuhan, sai ulang ma Ham sip, sai ulang ma Ham mandaoh-daoh humbangku, ale Jahowa.
23 Jongjong ma Ham anjaha roh ma Ham mambela pakarangku, Ham Naibatangku anjaha Tuhanku!
24 Pintori Ham ma ahu romban hubani hapintoron-Mu, Ham Jahowa Naibatangku, ase ulang marmogah-mogah sidea mangidah ahu,
25 ase ulang ihatahon sidea ibagas uhurni, “E, e, domma das sura-surangku!” ase ulang ihatahon sidea, “Domma ibondut hanami ia!”
26 Sai maila anjaha tarbador ma sagala na mangkamalaskon hamagouanku. Sai marhiou hailaon ampa habadoron ma halak na pajuntul-juntulhon dirini dompak ahu.
27 Sai marolob-olob anjaha marmalas ni uhur ma halak na mangkasiholi hapintoronku, sai tongtong ma ihatahon sidea, “Timbul do Jahowa, na mangkarosuhkon haluahon ni juakjuak-Ni.”
28 Sai patugah-tugahon ni dilahku do hapintoron-Mu, anjaha puji-pujian ma Bamu ganup ari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA