Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas Daud nari. O TUHAN, lawanlah kalak si ngelawan aku, peranglah kalak si merang aku.
2 Pakelah ampang-ampang ras baju PerangNdu, jenari reh Kam nampati aku.
3 Angkatlah lembing ras KapakNdu, guna ngelawan kalak si ngelis aku. Kataken min bangku maka Kam kap keselamatenku.
4 Bahanlah maka kalak si ersura-sura munuh aku, talu dingen juru. Janah kalak si erpekat munuh aku, surut dingen bene ukurna.
5 Iayak malekat TUHAN ia, desken segal iembus angin.
6 Ielis malekat TUHANlah ia, i dalin si gelap dingen medalit.
7 Alu la ersabap, itogengna siding man bangku, ikalina lubang si mbages nangkap aku.
8 Tapi alu la isangkana, kerneplah ia. Ia jinelah kena sidingna, jenari jertuh dingen merteh-erteh!
9 Emaka ersurak aku kerna TUHAN, meriah ateku sabap aku IkeliniNa.
10 Ningku man TUHAN alu bulat ukurku, "La lit si terpeseri ras Kam! IkawaliNdu si la ergegeh i bas si megegeh nari, si musil-musil i bas si nindihsa nari."
11 Kalak jahat nuduh aku dingen ersaksi, kerna kejahaten si la kueteh pe.
12 Kiniulinku ibalasna alu kejahaten, emaka labuh kal ukurku.
13 Tupung ia bangger, kupake baju tanda ate ceda, dingen erpuasa, jenari janahku tungkuk ertoto aku,
14 kutotoken ia bali ras penotokenku kerna senina tah temanku kal. Tungkuk aku janahku tangis, bali ras kalak tangis erkiteken kepaten nande.
15 Tapi tupung aku i bas kesusahen, meriah ukurna, jenari ikelewetina aku janahna nguru-nguru aku. Kalak si la kutandai mekpeki aku, alu la ngadi-ngadi.
16 Tetap megombang ia bangku, alu ipen erderik ijerlengna aku.
17 O TUHAN, asa kai nari dekahna Kam natap saja? Pulahi min aku sabap ijerngemna aku, kelini min geluhku i bas singa-singa e nari.
18 Emaka kukataken bujur man BaNdu itengah-tengah perpulungen BangsaNdu, kupuji Kam i lebe-lebena kerina.
19 Ula pelepas aku iguro-guroken kalak si ernembeh ate man bangku alu la ersabap. Ula pelepas aku isuraki, kalak si ernembeh ate man bangku alu la ersebap.
20 Rananna pegabuken, kalak si ngena atena perdamen icekurakina.
21 Alu megang sorana isalahina aku nina, "Idah kami nge kai si ibahanndu."
22 Tapi IidahNdu kap kerina o TUHAN, ula min tatap Kam ndauh dingen sinik saja.
23 Kekeken jenari kapiti min perkarangku! O Dibatangku, o TUHANku sampati min aku!
24 O TUHANku, sabap Kam bujur, kapiti min aku, ula pelepas aku isuraki imbangku.
25 Ula pelepas ia rukur i bas ukurna nina, "Untung ia mate! Sabap e kin sura-sura kami."
26 Bahanlah maka si meriah akapna ngenen kiniseranku, italuken dingen bene ukurna. Bahanlah maka kalak si megombang bangku, juru dingen mela akapna.
27 Ersuraklah kalak si mejehe ngidah aku ibenarken, iulih-ulihinalah ngataken, "Andiko muliana TUHAN e! Ngena AteNa adi sangap suruh-SuruhenNa".
28 Emaka kuberitaken kerna KeadilenNdu, dingen kupuji Kam gedang-gedang wari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA