Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ende-enden si Daud. Sangap kal kalak adi dosa-dosana ialemi dingen salah lepakna isasapken.

² Sangap kal kalak, adi dosana la itaktaki TUHAN dingen i bas ukurna pe la lit penipu.

³ Tupung la kuakuken dosa-dosangku, kote aku perban ndehereng tep-tep wari.

⁴ O TUHAN, IukumNdu aku suari berngi, keri gegehku bali ras remang kena las wari.

⁵ Emaka kuakui dosa-dosangku man BaNdu, salah lepakku pe la lit kubuniken. Kutetapken ukurku ngakuisa man BaNdu, jenari dosa-dosangku IalemiNdu.

⁶ Erkiteken si e ertotolah min perpulungen si tutus, tupung ia i bas kiniseran. Gelah adi reh galumbang kesusahen, la seh man bana.

⁷ Kam kap inganku cebuni, IpulahiNdu aku i bas kesusahen nari. Emaka ersurak aku perban riahna, sabap nggo aku IpulahiNdu.

⁸ Nina TUHAN, "Aku nuduhken dalan si man dalanenndu, Kuajarken kam dingen matangKu tetap mperdiateken kam.

⁹ Ula kam bali ras kuda si la rukur, si arus iatur alu sangam ras tinali, adi la bage la nggit patuh."

¹⁰ Mbue kiniseran si man tahanenken kalak jahat, tapi kalak si ernalem man TUHAN, IkelewetiNa alu keleng AteNa si tetap.

¹¹ O kalak bujur meriahlah atendu i bas TUHAN. Suraklah alu meriah, o si ngikutken Ia.