Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Humbani juakjuak ni Jahowa, ai ma si Daud, na manluarhon hata ni doding on bani Jahowa, bani panorang ipaluah Jahowa ia humbani tangan ni munsuhni pakon humbani tangan ni si Saul, (18-2) nini, “Holong tumang do uhurhu bamu Jahowa, hagogohonku.
2 (18-3) Jahowa, dolog batu bangku, batar-batarhu, na paluahkon ahu, Naibatangku, batu gingging anjaha parlingodanku, gantarhu, tanduk haluahonku pakon benteng bangku.
3 (18-4) “Pinuji ma Jahowa!” ningku mandilohon, ai ipaluah do ahu humbani munsuhku.
4 (18-5) Iinggoti gilumbang ni hamatean do ahu, anjaha bah hamatean manonggoti ahu;
5 (18-6) isangkut tali ni nagori toruh do ahu, siding ni hamatean tagang dompak ahu.
6 (18-7) Ibagas hasosakankai hudilo ma Jahowa, dilo-dilo ma ahu bani Naibatangku. Gabe itangihon do sorangku humbani rumah-Ni, anjaha das do doruhkai hu pinggol-Ni.
7 (18-8) Munjei anjaha dugur ma tanoh on, onjolan ni dolog pe murdug ma, munjei halani ringis-Ni.
8 (18-9) Maripul do timus humbani igung-Ni, haluar apuy na mangankon humbani pamangan-Ni, narnar na gara marjimbur hun Bani.
9 (18-10) Iondun ma langit, turun ma Ia, lotir do i toruh ni nahei-Ni.
10 (18-11) Mangajak herub do Ia, anjaha habang mayap-ayap bani habong ni logou.
11 (18-12) Na golap do ibahen manrungkub-Si, lampolampo-Ni inggot ni bah na mamirong ampa hombun na hapal.
12 (18-13) Humbani sinalsal na i lobei-Ni luar do hombun-Ni, ambolas pakon gara ni apuy.
13 (18-14) Marhata ma longgur ibahen Jahowa i langit, ipamaling Na Timbul in ma sora-Ni.
14 (18-15) Isiorhon ma panah-Ni laho pamerap sidea, ibahen do mardejep-dejep hilap laho mardakdak sidea.
15 (18-16) Jadi taridah ma holbung ni bah, mulgap ma onjolan ni dunia on, halani pangasupimu Jahowa, halani pangombus ni hosah ni igung-Mu.
16 (18-17) Idurdurhon do tangan-Ni hun babou manangkap ahu, idokdok do ahu humbani bah banggal.
17 (18-18) Ipaluah do ahu humbani munsuhku na gogoh, humbani halak na mandondoni ahu, sigogohan humbangku.
18 (18-19) Idorab sidea do ahu bani ari hasunsahanku, tapi Jahowa do hatundalanku.
19 (18-20) Itogu do ahu bani ianan na lumbang, ipaluah do ahu, ai marosuh do Ia bangku.
20 (18-21) Ibahen Jahowa do hu bangku romban hubani hapintoronku, romban hubani haborsihon ni tanganku ipasuang hu bangku,
21 (18-22) ai huihutkon do dalan ni Jahowa, seng dong manjahati ahu, marbalik humbani Naibatangku.
22 (18-23) Sai tong do i lobei ni matangku sagala aturan-Ni, anjaha seng hupadaoh titah-Ni humbangku.
23 (18-24) Seng dong sihataon bangku i lobei-Ni, hujaga do diringku dompak hajahaton.
24 (18-25) Halani ai ibalos Jahowa do hu bangku romban hubani hapintoronku, romban hubani haborsihon ni tanganku i lobei-Ni.
25 (18-26) Hubani na bujur uhur, bujur do Ham, hubani halak parpintor, pintor do Ham.
26 (18-27) Bani halak paruhur na pansing ipatidak Ham do hapansingon-Mu, tapi marah do uhur-Mu dompak halak pargeduk.
27 (18-28) Ipaluah Ham do bangsa na madoyuk, tapi ipatoruh Ham do mata na toal.
28 (18-29) Ai Ham do, alo Jahowa, mambahen palitangku marsinalsal; Jahowa Naibatangku do palihar hagolapanku.
29 (18-30) Marhasoman Ham tardorab ahu do hulanan ni bala, mangunsagahkon Naibatangku tarlumpat ahu do tembok.
30 (18-31) Gokan dear do dalan ni Naibata, pitah do hata ni Naibata, Ia do gantar ni ganup halak, na marlingod hu Bani.
31 (18-32) Ai ise ma Naibata sobali Jahowa, ise batar-batarta sobali Naibatanta?
32 (18-33) Naibata do na manggonditkon hagogohon bangku, anjaha ipatorsa do dalanku.
33 (18-34) Ia do mambahen naheihu songon nahei ni ursa boru-boru, anjaha ipajongjong do ahu i atas buntu-buntu.
34 (18-35) Ia do mangajari tanganku marmunsuh, gabe pandei tanganku manintak sior tombaga.
35 (18-36) Ibere Ham do bangku gantar ni hatuahon-Mu, itungkoli tangan siamun-Mu do ahu, anjaha halayakon-Mu pabanggal ahu.
36 (18-37) Ipalumbang Ham do ianan panlangkahanku, anjaha seng tarsimpok mata ni ari ni naheihu.
37 (18-38) Hupardakdak do munsuhku ronsi dapot sidea, seng mulak ahu paima rasei sidea.
38 (18-39) Huropuki do sidea, gabe seng tarbahensi be jongjong, radag do sidea i toruh ni naheihu.
39 (18-40) Igonditkon Ham do bangku hagogohon laho marporang, ipatunduk Ham do imbangku hu toruhku.
40 (18-41) Ipaundur Ham do munsuhku i lobeihu, anjaha siap do hubahen sagala na mandomdomi ahu.
41 (18-42) Dilo-dilo sidea, tapi seng dong na paluahkon, hubani Jahowa homa, tapi seng itangihon sidea.
42 (18-43) Jadi hulumati ma sidea songon orbuk sihabangkonon ni logou, hulotloti ma sidea songon hubang i tongah dalan.
43 (18-44) Ipaluah Ham do ahu humbani paringoran ni bangsa-bangsa, anjaha ipabangkit Ham do ahu gabe kopala ni bangsa-bangsa, bangsa na so hutanda pe marsombah do hu bangku;
44 (18-45) ibogeihonsi pasal ahu, mintor itangihon do ahu, halak silegan pe tunduk do sidea papuji-puji ahu.
45 (18-46) Mandatei do halak silegan, hitir-hitir do sidea luar humbani bentengni.
46 (18-47) Manggoluh do Jahowa, sai tarpuji ma batar-batarhin, sai timbul ma Naibata ni hatuahonku,
47 (18-48) Naibata sibere pambalason hu bangku, anjaha na patundukkon bangsa-bangsa bangku.
48 (18-49) Na paluahkon ahu humbani munsuhku, nai ma, na pagijangkon ahu mangimbang sagala na manlawan ahu, na paluahkon ahu humbani halak sipangodoh-odoh.
49 (18-50) Halani ai pujionku do Ham Jahowa i tongah-tongah ni sagala bangsa, anjaha dodingkononku do goran-Mu.
50 (18-51) Ia do sibere hatuahon banggal bani raja-Ni, anjaha sibere idop ni uhur bani na mininakan-Ni, ai ma hubani si Daud ampa hubani ginomparni ronsi sadokah ni dokahni.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA