Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Jaburra Daud, abdina PANGERAN. Enyanyeyagi ka PANGERAN e bakto Daud epalopot dhari Saul ban dhari so-mosona. (18-2) Abdidalem taresna ka Junandalem, GUSTE, Junandalem kakowadanna abdidalem.
2 (18-3) PANGERAN padha ban binteng se koko kennengnganna sengko’ ngaop. Tang Allah akantha gunong bato kennengnganna sengko’ anaong. akantha tameng se notobi tang aba’, se ajaga sengko’ sopaja aman salanjangnga.
3 (18-4) Ka PANGERAN sengko’ aserro, sengko’ epasalamet dhari tang moso. Sokkor ka PANGERAN.
4 (18-5) Sengko’ ekalenglenge babaja maot, ancor tasellem e dhalem banjir.
5 (18-6) Sengko’ ekalenglenge babaja maot, jebbak maot ngaddhang e adha’na soko.
6 (18-7) E dhalem karekongan sengko’ aserro ka PANGERAN, sengko’ aera’ ka Allah nyo’on partolongan. Dhari kalenggiyanna Allah meyarsa tang sowara, Allah agateyagi tang parnyo’onan.
7 (18-8) Bume laju agundhek ban agaledder, sar-dhasarra gunong aguli ban ngetter, polana Allah duka.
8 (18-9) Kokos ngebbul dhari lobangnga pangambungnga, apoy ban mardha kalowar dhari lesanna.
9 (18-10) Langnge’ eseba’, samarena Salerana pas toron ka baba, toron ban ondhem se celleng e baba’anna padana.
10 (18-11) Pangeran ngabber, kerub menangka teteyanna; ngabang e attassa kalembangnga angen.
11 (18-12) Salerana abuko’ papetteng; ekalenglenge ondhem se tebbel.
12 (18-13) Dhari kelap e ajunanna, kalowar ondhem, ojan es ban apoy.
13 (18-14) PANGERAN laju jendharan akantha galudhuk e bang-abang; Se Mahatenggi asowara talebat kaja.
14 (18-15) Na-panana eocol saleng pajeddhat, so-moso padha epabalessudan; kelap patang kareddhap, ta’ endha’ ambu kabbi moso padha buru.
15 (18-16) Dhasarra tase’ tasengkap, langganna bume maroka e bakto PANGERAN abentak mosona sambi duka.
16 (18-17) Dhari attas PANGERAN ajuluwagi astana; sengko’ ecandhak laju eangka’ dhari banjir se dhalem, epakalowar.
17 (18-18) Sengko’ epasalamet dhari moso se parjuga, ban dhari reng-oreng se baji’ ka sengko’ reya, sabab reng-oreng jareya monggu ka sengko’ talebat kowat.
18 (18-19) Sengko’ eserrang e dhalem balai tape PANGERAN apareng partolongan.
19 (18-20) Sengko’ epalopot dhari babaja, epasalamet polana sengko’ ekasokane Salerana.
20 (18-21) PANGERAN malesse tang lalakon se teppa’; sengko’ eberkadi sabab sengko’ ta’ sala.
21 (18-22) Sengko’ ngestowagi papakonna PANGERAN, ban ta’ mongkore tang Allah.
22 (18-23) Sakabbinna hokomna bi’ sengko’ egateyagi, kon-papakonna ejalannagi.
23 (18-24) Salerana ngagali sengko’ tadha’ calena, ban ajauwi sabarang se sala.
24 (18-25) Daddi PANGERAN aganjar tang lalakon se teppa’ sabab Salerana ngagali sengko’ ta’ andhi’ sala.
25 (18-26) GUSTE, Junandalem esto ka oreng se esto sareng sae ka oreng se sae.
26 (18-27) Junandalem socce ka oreng se socce, namong amoso ka oreng se jahat.
27 (18-28) Oreng se andhap asor sareng Junandalem epasalamat, oreng se angga’ epanyonglet.
28 (18-29) Damar abdidalem sareng Junandalem eodhi’i; Guste ALLAH, Junandalem se matera’ papetteng se notobi abdidalem.
29 (18-30) Junandalem se makowat abdidalem, sareng se abanto, sopaja bisa’a makala moso, sareng magujura partahananna.
30 (18-31) Se elampa’agi Allah reya samporna, janjina ekenneng parcaja salanjangnga. PANGERAN reya marabut tameng monggu ka oreng se nyare pangaoban ka Salerana.
31 (18-32) Sabab tadha’ Allah salaenna PANGERAN; tadha’ se nolong sengko’ ban ba’na kajabana Allah.
32 (18-33) Allah jareya se makowat sengko’ ban se maaman tang jalan.
33 (18-34) Salerana makowat tang soko epakantha sokona manjangan, ban ajaga tang kasalameddan e pagunongan.
34 (18-35) Sengko’ eajari aperrang, sampe’ tao menthang gandhiba se paleng kowat.
35 (18-36) GUSTE, Junandalem ajaga sareng masalamet abdidalem; abdidalem etongka sareng kobasaepon Junandalem, abdidalem daddi oreng raja lantaran se elampa’agi Junandalem.
36 (18-37) Junandalem ajaga sopaja abdidalem ta’ kantosa ekenneng tawan, kantos abdidalem ta’ oneng labu.
37 (18-38) Abdidalem nyerser moso sampe’ epakala, ta’ poron nyorot kantos moso mate sadajana.
38 (18-39) Sareng abdidalem moso ebanteng kantos ta’ bisa jaga pole, sadaja robbu ta’ aguli e adha’na soko abdidalem.
39 (18-40) Junandalem marenge abdidalem kakowadan kaangguy aperrang, sareng kamennangan ka so-moso sadajana.
40 (18-41) Sareng Junandalem so-moso abdidalem epaburu; se baji’ ka abdidalem padha epaobus.
41 (18-42) Reng-oreng gapaneka reng-cerrengan, namong tadha’ se apareng partolongan, sadajana aserro ka PANGERAN, tape Salerana ta’ apareng jawaban.
42 (18-43) Sareng abdidalem moso eparemmok, kantos akadi abu se atabuyan, epagemmet akadi oreng nyapowe cellot e lorong.
43 (18-44) Junandalem malopot abdidalem dhari oreng daraka, abdidalem epangobasane sa-bangsa; sa-bangsa se ta’ ekennal abdidalem epadaddi dunor abdidalem.
44 (18-45) Reng-oreng manca atellok ka abdidalem atoro’ manabi mereng parenta abdidalem.
45 (18-46) Kabangalannepon ampon elang, sadaja padha ngetter kalowar dhari bintengnga.
46 (18-47) PANGERAN odhi’! Molja’agi se abilla sengko’! Molja’agi kaagunganna Allah se masalamet sengko’!
47 (18-48) Sengko’ epamennang ka tang moso; tang moso epasojud e tang soko,
48 (18-49) Sengko’ epasalamet dhari tang moso. GUSTE, Junandalem marenge abdidalem kamennangan ka moso, abdidalem epasalamet dhari reng-oreng se kejjem.
49 (18-50) Daddi abdidalem ngagungngagi Junandalem e antaraepon sa-bangsa, abdidalem amolja’agiya Junandalem sareng nyanyeyan-nyanyeyan pojiyan.
50 (18-51) Allah marenge kamennangan se raja ka rato peleyanna, teptep taresna ka oreng kakasena, iya areya Daud ban toronanna, terros salanjangnga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA