Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sengko’ taresna ka PANGERAN, sabab Pangeran meyarsa’agi tang parnyo’onan.

² Pangeran meyarsa’agi tang sowara, sabban sengko’ aserro ka Salerana.

³ Sengko’ ekalenglenge babaja maot; ce’ marengessa rassana ngadhebbi pate, sampe’ sengko’ ngalengsang ban tako’.

⁴ Daddi sengko’ aera’ ka PANGERAN, "Adhu GUSTE, nyo’ona tolong, parenge salamet abdidalem!"

⁵ PANGERAN reya bellas ase ban adil; Allahna sengko’ ban ba’na neserran parana.

⁶ PANGERAN reya meyara reng-oreng se majja; sengko’ epasalamet e bakto ta’ bisa apa-rapa.

⁷ Sengko’ maayem tang ate, sabab PANGERAN sae ka sengko’.

⁸ PANGERAN la malopot sengko’ dhari pate; sengko’ elepor ban ejaga sampe’ sengko’ ta’ labu.

⁹ Daddi sengko’ bisa ngarassa’agi kobassana odhi’ e dunnya reya, e dhalem pangaobanna PANGERAN.

¹⁰ Sengko’ paggun parcaja maske sengko’ ngoca’ kantha reya, "Sengko’ taseksa parana."

¹¹ E dhalem kabingongan sengko’ ngoca’ bariya, "Tadha’ oreng se ekennenga parcaja."

¹² Apa se eatorragiya sengko’ ka PANGERAN, menangka babalessa kasaeyanna ka sengko’ reya?

¹³ Sengko’ ngeba’a tor-ator anggur ka PANGERAN, menangka tandha sokkor eparenge partolongan.

¹⁴ Sengko’ neptebbana tang janji ka Salerana e adha’anna sakabbinna ommadda.

¹⁵ PANGERAN arassa ce’ emanna mon badha oreng se ekataresnae Salerana mate.

¹⁶ Abdidalem ka’dhinto abdiepon Junandalem, GUSTE, akadi ebu, abdidalem jugan abakte ka Junandalem. Junandalem ampon mabebas abdidalem dhari tahanan.

¹⁷ Abdidalem ngatorragiya kurban sokkor ka Junandalem, sambi ngatorragiya du’a abdidalem.

¹⁸ Sengko’ neptebbana tang janji ka Pangeran, e adha’na sakabbinna ommadda

¹⁹ se akompol e taneyanna Padalemman Socce, e tengngana kottha Yerusalim. Molja’agi PANGERAN!