Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Humbani si Daud. Sada Psalm. Ham Naibata, sipujionku, ulang ma sip Ham!
2 Ai ngangang do dompak ahu babah ni parjahat pakon panipu, marsahap do sidea dompak ahu marhasoman dilah siparladung.
3 Marhitei hata domdom iinggoti sidea ahu, anjaha iporangi sidea do ahu seng marhala.
4 Balos ni holong ni uhurhu iaduhon sidea do ahu, tapi anggo ahu sai martonggo do.
5 Ihonahon sidea do bangku hajahaton balos ni na madear, anjaha domdom balos ni pangkaholongingku.
6 Pahehe Ham ma parjahat dompaksi, anjaha halak sipanukas jongjong i siamunni.
7 Bani na iuhumi ia, sai luar ma ia songon parjahat, anjaha tonggoni sai gabe dousa ma.
8 Sai roh otikni ma umurni, anjaha halak na legan ma mambuat pangkatni.
9 Sai tading maetek ma niombahni, anjaha mabalu ma jolmani.
10 Sai mambur merap ma niombahni gabe sipangindo-indo, daoh sirang humbani rumahni na dob pinarreong.
11 Sai ihabus sipabungahon duit ma sagala na dong bani, anjaha halak na legan mangayob na hinalojahonni.
12 Sai ulang ma dong na marholong ni atei bani, sai ulang ma dong na maridop ni uhur bani niombahni na tading maetek.
13 Sai ripas ma ginomparni, anjaha sai sasap ma goranni bani sundut na mangihut.
14 Sai taringat ma dousa ni na lobeini bani Jahowa, anjaha ulang ma hona sasap dousa ni inangni.
15 Tongtong ma ai i lobei ni panonggor ni Jahowa, anjaha masab ma hun tanoh on pardingatan pasalsi,
16 halani lang idingat mambahen idop ni uhur, tapi ipardakdak do halak na madoyuk pakon na masombuh, sonai age paruhur na madotei sihol mambunuh sidea.
17 Holong do uhurni bani bura-bura, sai mangonai ma ai hu bani; seng marosuh ia mamasu-masu, sai daoh ma ai hun bani.
18 Marpakeian bura-bura do ia, sai itorusi ma ia songon bah, anjaha songon minak hubagas holi-holini;
19 sai songon sabing na sinabingkon ma ai bani, anjaha songon gondit na tongtong longkot bani binongeini.
20 Ai ma namin upah humbani Jahowa hubani sagala na manlawan ahu, pakon humbani parsahap na masambor dompak ahu.
21 Tapi anggo Ham, ale Jahowa, Tuhanku, apiti Ham ma ahu halani goran-Mu! Paluah Ham ma ahu, romban hubani idop ni uhur-Mu.
22 Ai doyuk anjaha masombuh do ahu, anjaha uhurhu maborit do ibagas.
23 Magou do ahu songon halinoh bani panorangni marganjang, anjaha ipirpirhon do ahu songon balang.
24 Reod-reod do towodku halani marpuasa, merung do dagingku seng martaboh.
25 Siapas-apason mando ahu bani sidea, mangidah ahu, iupir-upirhon do uluni.
26 Urupi Ham ma ahu, Ham Jahowa Naibatangku, paluah Ham ma ahu romban hubani idop ni uhur-Mu,
27 ase ibotoh sidea tangan-Mu do in, Ham, Jahowa, do sibahen in.
28 Mamurai do sidea, tapi Ham do na mamasu-masu. Sai bador ma sidea na manlawan ahu, tapi marmalas ni uhur ma anggo juakjuak-Mu on.
29 Sai marpakeian hahirion ma sagala na manukas-nukasi ahu, anjaha habadoron ma manrungkub sidea songon salimut.
30 Sai sihol do pujionku Jahowa marhitei pamanganku, anjaha pujionku ma Ia i tongah-tongah ni halak na mabuei.
31 Ai Ia do na jongjong i siamun ni halak na masombuh, laho paluahkonsi humbani halak na manguhum hosahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA