Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Pammujina Daud. O, Allata’ala, tulusu’ kupujia, teaKi’ a’mereki.
2 Saba’ nibakkaia’ ri tau ja’dala’ siagang patipu appa’la’banga carita-carita balle-balle ri passala’ inakke.
3 Nabakkaia’ ke’nanga siagang kana-kana pangngabirisi, nabundukia’ ke’nanga natena passabakkanna.
4 Natudua’ ke’nanga, manna nakukamaseang ke’nanga, siagang kupappala’ doangammo ke’nanga.
5 Nabalasaki ke’nanga kabajikangku siagang kaja’dallang, pangngamaseangku siagang kabirisang.
6 Kiangka’mi se’rea tau ja’dala’ untu’ angngadeli, boli’mi kamma nitudu ri balinna.
7 Boli’mi kamma niadeli siagang nipa’nyata angkana salai, siagang boli’mi kamma nikana dosa pappala’ doanna.
8 Boli’mi kamma linta’ la’busu’ tallasa’na, nampa nialle pangka’na ri tau maraeng.
9 Boli’mi kamma a’jari kukang ana’-ana’na, siagang a’jari janda bainena.
10 Boli’mi kamma a’jari papala’-pala’ mange-mange ana’-ana’na, siagang nibongka battu rumbangang balla’na.
11 Boli’mi kamma nialle ngaseng barang-baranna ri pasingara’ inranga, siagang nirampasa’ wassele’ karesoanna ri taua.
12 Teako niakki baji’ pa’mai’ mae ri ia, yareka angkamaseangi ana’-ana’ nabokoia.
13 Boli’mi kamma nipaccappu’ sikontu turunganna, na nikaluppai arenna ri ana’-ana’ ri bokoa.
14 Boli’mi kamma tuli Nau’rangi Batara kaja’dallanna boe-boena, siagang tena nikaluppai dosana amma’na.
15 Boli’mi kamma tuli Nau’rangi Batara dosana ke’nanga, na tenamo angngu’rangi ke’nanga ri lino.
16 Saba’ anjo taua tale’bakai nau’rangi untu’ ampappicinikangi mangamaseanga. Nasessai tu kasi-asia siagang tau pa’risika, siagang nabunoi tau tenaya pakkullena.
17 Nangai appasuluka kana attunra; boli’mi kamma kalenna nataba pattunra! Tena nangai assare barakka’, boli’mi kamma natena barakka’ untu’ ia!
18 Untu’ ia anjo akkana tunraya nakanai panggaukang biasaji, sangkamma punna napake pakeanna. Boli’mi kamma anjo pattunraya a’la’bangi sanrapang je’ne’ mae ri tubuna, sanrapang minynya’ antama’ ri buku-bukunna.
19 Boli’mi kamma nitongko’ kalenna ri pattunra sanrapang pakeang, na tuli nikaluki sanrapang passikko’ aya’.
20 O, Batara, Kipitujuimi hukkungang anjo tau antudua’, mae ri tau a’bicara ja’dalaka ri batangkalengku.
21 Mingka Kitulunga’ situru’ janjinTa, o Karaeng Allata’alaku, pasalamaka’ lanri kabajikanTa siagang pangngamaseanTa.
22 Nasaba’ kasi-asia’ na kupa’risi’, siagang loko’ lantangi atingku.
23 A’biringa’ tappela’ sanrapang bayang-bayang ri wattu karueng, nibe’besanga’ sanrapang katimbang.
24 Annekkereki kulantukku lanri appuasa, a’jari roso’ dudumi kalengku.
25 Sikamma tau ancinikia’ nahina ngasemma’ napamenggong-menggong ulunna.
26 Kitulunga’, o Karaeng Allata’alaku, pasalamaka’ situru’ pangngamaseanTa.
27 Na naasseng musungku angkana anjo panggaukanTa, angkana iKatte, Batara, anggaukangi.
28 Manna pole natunraia’ ke’nanga, poro iKatte ambarakkakia’. Manna pole ambangung ke’nanga, lanipakasiriki ke’nanga; mingka poro inakke, atanTa, Kipakarannua’.
29 Boli’mi kamma tau antudua’ nikalimbuki ri kahinaang, siagang siri’-siri’ angkalimbuki ke’nanga sanrapang juba.
30 Erokka’ mammuji mae ri Batara siagang sa’ra lompo, ampa’la’bangi arenNa ri tangngana pa’rappunganna ummaka.
31 Saba’ Ia angngallei siagang ampasalamaki tu kasi-asia battu ri tau anghukkung mateai ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA