Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pujimi Batara, he nyawaku! Tamaka malompoTa iKatte, o, Batara Allata’alaku! AmmakeKi’ pakeang kagammarrang siagang kala’birang,
2 akkalimbukKi’ cahaya. IKatte ampaka’rangi langika sanrapang kema,
3 siagang ambangungi ballatTa ri tompo’ je’neka ri langi’. Rammang-rammanga Kipa’jari kareta, ka’nyi’na anging Kidongkoki.
4 Anging Kipa’jari suroTa, na kila’ a’jari palayanTa.
5 Kijarreki Kitannang buttaya ri dasara’na, sa’genna tena nalata’lengga satunggu-tungguna.
6 Kikalimbuki siagang tamparang lompo, ammantangi je’ne’na ri coppo’-coppo’ buluka.
7 Punna Kiga’gara’, a’lo’loroki anjo je’neka, a’lo’loro’ kancang lanri arrunna sa’ranTa.
8 A’lo’loroki je’neka numalo ri moncong-moncong antama’ ri ka’bung, ri tampa’ le’baka Kipasadiangi.
9 Kipattantui pa’baeng-baeng takkullea nalaloi, sollanna tena nammotere’ ammantang ri bontoa.
10 Kipanaiki je’ne’ timbusenga ri sikamma ka’bunga, a’lo’loroki je’ne’ kaloroka ri alla’na bulu’-buluka,
11 untu’ assarei je’ne’ inung sikontu olo’-oloka ri parang, napassau turerena sikamma keledai romanga.
12 Appareki ru’mung jangang-janganga ri ampi’na; assa’ra-sa’ra ke’nanga ri alla’na leko’-leko’ kayua.
13 Battu ri langi’ Kipaturung bosia ri moncong-monconga, rassi linoa siagang bate paretTa.
14 Kipattimboi ruku’-rukuka untu’ kanre olo’-olo’, na sangka’ rupa lamung-lamung untu’ rupataua. Akkullei a’lamung-lamung,
15 nappa’nia’ wassele’ je’ne’ anggoro’ appakasannanga. Kammayatompa minynya’ zaitun ampa’jari accayai tanja’na, siagang kanre assareai ke’nanga kagassingang.
16 Poko’-poko’ kayuNa Batara anggappai bosi jai poko’ camara Libanon nalamung kalennai.
17 Anjoremmi a’ru’mung jangang-janganga, jangang-jangang ranggung a’ru’mung ri coppo’na.
18 Moncong-moncong tinggia a’jari tampa’na bembe romang; palandu’ accokko ri batu karanga.
19 ApparekKi’ bulang untu’ pammatei wattu, naassengi alloa wattu pa’labuanna.
20 Punna Kipaturung sassanga, alloa a’jarimi bangngi, na sikontu olo’-olo’ romanga a’lemere’mi.
21 Singa-singa rungkaya ammarrammi amboyai apa lanakanrea, appala’ kanre Napasadiaya Allata’ala.
22 Punna ammumba mataalloa, a’lilimi ke’nanga, mange anra’ba ri tampa’ paccokkoanna.
23 Nampa assulu’mo rupataua untu’ anggaukangi jama-jamanna, nanjama tulusu’ sa’genna karueng.
24 Tamaka jaina bate paretTa, o, Batara, yangasenna Kipa’jari lanri bajitTa; rassi buttaya siagang bate paretTa.
25 Ciniki tamparang luara’ takka’ranga, siagang apa-apa lompo ca’dia tanikulle nirekeng.
26 Anjoremmi sikamma kappalaka asombala’, siagang Lewiatan, naga tamparang bate paretTa, akkarek-karena.
27 Yangaseng ke’nanga iKatte narannuang, untu’ anggappa kanre punna narapi’ wattunna.
28 IKatte assare, nake’nanga ampa’rappungi, iKatte ampasadiai, nangnganre ke’nanga sa’genna sukku’ nakasia’.
29 Punna a’gilingKi’, mallaki ke’nanga; punna Kialle nappasa’na ke’nanga, possoki, nampa ammotere’ a’jari limbu’bu’ butta sangkamma riolo.
30 Mingka punna Kisare ke’nanga nappasa’, nipa’jarimi ke’nanga; Kisarei katallassang beru linoa.
31 Poro satunggu-tungguna kalompoanNa Batara! Poro rannui mae ri sikontu bate pa’jariNa!
32 Naciniki buttaya na’jari annekkere’mo buttaya, nasentoki moncong-monconga, sa’genna assulu’ umbunna.
33 Erokka’ akkelong mae ri Batara lalang tallasakku, akkelong pammuji mae ri Allata’alaku lalang niakku ija.
34 Poro anggappa pangngellai battu ri Ia kelong-kelongku, saba’ Iami ampa’jari rannui pa’maikku.
35 Boli’mi kamma lanynya’ battu ri lino tau dorakaya, boli’mi kamma cappu’ posso’ tau ja’dalaka. Pujimi Batara, he nyawaku! Pujimi Batara!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA