Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Molja’agi PANGERAN, tang sokma! Agung onggu Junandalem, Guste ALLAH, Pangeran kaula! Junandalem ngagem rasogan kabessaran sareng kamolja’an,

² sareng abuko’ caja. Junandalem ngampar langnge’ epakadi kemah,

³ sareng maddek dalemmepon e attas aeng e langnge’. Dhem-ondhem sareng Junandalem ebadhi teteyan, Junandalem netene kalembang angen.

⁴ Sareng Junandalem angen ebadhi otosan, dhap-keddhap ebadhi pangladin.

⁵ Junandalem masang bume epakoko e langganna, kantos ta’ kera gundhek salanjangnga.

⁶ Junandalem notobi bume sareng tase’ raja, aengnga ngambang kantos ka konco’na nong-gunong.

⁷ E bakto sareng Junandalem ebentak, aeng gapaneka agili, pagilina banter lantaran garudhu’na sowarana Junandalem.

⁸ Aeng agili lebat e nong-gunong ka dhalem cora, ka kennengngan se ampon esadhiya’agi sareng Junandalem.

⁹ Junandalem nantowagi tes-bates se ta’ kengeng elebadi aeng gapaneka, sopaja ta’ kantos abali ngambang neng e bume.

¹⁰ Junandalem magili somber e ra-cora, ka-cangkana songay epagili e ke’-lekke’na mo’-gumo’,

¹¹ badhi ngenome keban, maelanga pelka’na mar-hemar alas.

¹² E ma’-semma’na no’-mano’ abadhi lebunna, ngoce e dhalemmanna un-dhaunan.

¹³ Junandalem matoron ojan dhari langnge’ epagaggar ka pagunongan, bume possa’ sareng hasel karyaepon Junandalem.

¹⁴ Junandalem matombu rebba menangka teddhana ban-keban, matombu samacemmepon men-tamennan kaagem manossa. Daddi manossa kengeng men-tamennan,

¹⁵ sareng ngasellagi aengnga anggur se nyaman. Jugan mennya’ jaitun se matera’ mowana, sareng teddha’an se madhateng kakowadan ka badanna.

¹⁶ Ka’-bungka’anna se etamen PANGERAN dibi’, comara Libanon se gi-tenggi eparenge ojan sacokobba.

¹⁷ E ka’dhissa’ no’-mano’ abadhi lebunna, ko’-dalko’ alebun e co’-konco’na.

¹⁸ Nong-gunong se tenggi daddi kennengnganna embi’ alas; kancel ngetek neng e to-bato karang.

¹⁹ Junandalem abadhi bulan menangka tandhaepon bakto, are oneng bilaepon baktona compet.

²⁰ Manabi Junandalem madhateng petteng, are laju malem, sadajana burun alas padha kalowar.

²¹ Can-macan se gi’ ngodha agaung nyare mangsana, nyare teddha’an se esadhiya’agi Allah.

²² Manabi are moncar, burun alas gapaneka padha nyengla, arendhu e pangetegganna.

²³ Manossa laju kalowar alalakona, terros alako kantos are para’ compedda.

²⁴ Bannya’ onggu karyaepon Junandalem, GUSTE, sadajana elampa’agi Junandalem kalaban bicaksana; bume possa’ sareng cepta’annepon Junandalem.

²⁵ Oladi tase’ se lebar ngampar ka’dhissa’, sareng mahlok raja kene’ se ta’ kabilang bannya’na.

²⁶ E tase’ gapaneka pal-kapal alajar, Lewiyatan, naga tase’ cepta’annepon Junandalem, en-maenan.

²⁷ Sadajana padha ngarep Junandalem, anante’ papareng teddha’an manabi ampon baktona.

²⁸ Junandalem marenge, sadajana padha neddha, Junandalem nyadhiya’agi teddha’an, sadajana padha kennyang.

²⁹ Manabi Junandalem malengos, sadaja padha tako’; manabi Junandalem mondhut nyabana, sadaja padha mate, abali daddi abu akadi asalla.

³⁰ Namong manabi sareng Junandalem eparenge nyaba, sadajana ecepta’agi; Junandalem apareng odhi’ se anyar ka bume.

³¹ Moga kaagunganna PANGERAN teptebba salanjangnga! Moga Salerana sennengnga panggaliyanna ngoladi sadaja cepta’anna!

³² Pangeran ngoladi ka bume sampe’ bume ngetter, nong-gunong esedding sampe’ okossa kalowar.

³³ Sengko’ anyanye kaagem ka PANGERAN saomorra, anyanye pojiyan kaator ka Allah saabidda sengko’ gi’ odhi’ e dunnya.

³⁴ Moga tang nyanyeyan katarema’a, sabab Salerana se maperak tang ate reya.

³⁵ Mandar oreng daraka epamosna’a dhari bume, oreng jahat mandar padha’a mate. Molja’agi PANGERAN, tang sokma! Molja’agi PANGERAN!