Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wongose, "Niosi-singina! Naga nginioka ne'ena, dua de ma 'ena koyosongenuwa nako koyamakewasi ma Jo'oungu ma Dutu wopareta de wi kuasa!"

² 'O wange butanga de 'o Yesus waki'asa 'o Petrus de 'o Yakobus de 'awi dodoto 'o Yohanes, yotagi ka 'ona 'o gigie moi 'ikuru-kurutieka. To 'ona manga bionoka de 'o Yesus 'awi jako 'ingali.

³ 'Awi baju 'imadadi 'i'arese daungie 'iletongo. Yoma'uju-'uju 'o duniaka ne'ena komoiwa moi 'idadi yoma'uju 'isoka koge'ena ma garese.

⁴ Ge'enaka de 'awi do-domoteke yaruange go'ona yakimake 'o Yesus de 'o Elia de 'o Musa yomabi-bicara.

⁵ So 'o Petrus kawongosekau 'o Yesusika, "'Aba Guru, 'ena ma sanangioka ngone ne'enaka. Yaowa 'o da-darusu 'o ngai sa'ange miodiai; ngai moi to ngona 'Aba, ngai moi to Musa, de ngai moioli to Elia."

⁶ 'O Petrus wongose koge'ena ngano kowosidongoowa 'okia salingou wongose, sababu 'una de 'awi manai yamididi posironga yakimodongoka.

⁷ Ge'enaka de 'o sauramo yakisaoka de ma sauramono doka yo'isene 'o 'ilingi 'ingose, "Nu'una to ngoi 'ai Ngowaka towisiboso-bosono. 'Unaka nio'isene!"

⁸ De yosijai-jai yomakadutumu manga date-dateika, 'ena yamididi koyaki'iwau ge'enaka duga ka 'o Yesusou.

⁹ Gee 'ona yo'uti ge'ena ma gigieku daku, de 'o Yesus wakidongose 'onaka, "'Uwa niosikademo ka moika ma 'okia naga gee kangano niamakekau, nako ngoi 'o Nyawa ma Ngowaka kotomomikuawasi 'o songenoka!"

¹⁰ 'Ona yamoteke 'o besesongo ge'ena, duga 'ona ma sireteka yomakadongose 'ato 'o Yesus 'awi dumutu 'okia ma ngale wowangoli wosongenokau de.

¹¹ So ma rai yosano 'o Yesusika, "'Ido'oa so 'o 'agamaka yodoto-dotoko yongose 'ato salingou 'o Elia wosirano woboa 'asa de ma Jo'oungu ma Dutu Wiiri-iriki gu'una?"

¹² So 'o Yesus wosango, "Ma goungu 'o Elia wosirano woboa, ma ngale wosikadiai 'o sagala moi-moi. Duga kokia de gee 'o Buku 'Itebi-tebinoka 'isilefoku ma ngale 'o Nyawa ma Ngowaka 'ato 'una 'asa ma gudai wosangisara de 'o nyawa wisito-torou?

¹³ Ma ngoi tinidongose nginika, 'o Elia woboakau, de 'o nyawa-nyawa wikadiai moteke to 'ona manga mau. Ge'ena 'imakadaene de gee 'isilefokau 'o Buku 'Itebi-tebinoka ma ngale 'una."

¹⁴ Gee 'o Yesus de 'awi do-domoteke yaruange yomatoomunoli de to 'una 'awi do-domoteke 'iregu, 'ona yakimake 'o nyawa manga gudaioka ge'enaka. De 'o 'agamaka yodoto-dotoko yamuruo naga yomakasango de 'o Yesus 'awi do-domoteke.

¹⁵ 'O nyawa yoku-kudai 'o Yesus wimake de yakitodokana so wido-doowara widajai-jai.

¹⁶ Ge'enaka de 'o Yesus wosano 'awi do-domoteika, "'Okiali nimakaba-baili de 'o 'agamaka yodoto-dotoko?"

¹⁷ De 'o nyawa yoku-kudaioka go'ona wimoi wosango, "'Aba Guru, 'ai ngowaka towi'asa ngonano. 'Una womou sababu 'o tokata widongosama.

¹⁸ Nako la 'o tokata wikaruahe, ge'ena 'awi roese wosiwako-wako 'o tonauku de mita 'awi 'uru ma 'i'abo, wi 'ingiri 'iboriti de wi roese 'ipatilangoka. So ngoi togaasoko 'ani do-domoteika la yoginiiki 'o tokata ge'ena, duga 'ona koya'akunuwa!"

¹⁹ So 'o Yesus kawongosekau 'onaka, "Tei ngini ne'ena bolo! Ngini ma gou-goungu koniongaku-ngakuwa. Sigado kokiasi ma do'ingo ngoi tomanoa de de ngini de tosabari nginika? 'O ngowaka ge'ena nia'asano!"

²⁰ So 'ona mita 'o ngowaka ge'ena ya'asa 'o Yesusino. Gee 'o tokata ge'ena 'o Yesus wimake, de 'o ngowaka ge'ena yadiai ma roese 'ipatilangoka so wirubaku wilolo-loloko 'o tonaoka wi 'uru ma 'i'abo.

²¹ Ge'enaka de 'o Yesus wosano ma ngowaka ma deaka, "'Ito'ingou 'una kone'ena?" Ma dea wongose 'ato, "Kawoti-tingooninosi!

²² Ma tokata ge'ena 'ijaga 'imau yaso-songenou 'o ngowaka ge'ena, so ya'umo 'o 'ukuku bolo 'o 'akeruku. Ma nako 'Aba ngona na'akunu miniriwo, tanu minidoranosi de miniriwonosi 'Aba!"

²³ 'O Yesus wosango, "'Okia nongose? Nako 'Aba na'akunu? 'Iodumu kaidadi, 'itilai 'o nyawa yongaku!"

²⁴ De ma dea kawaporoongie woma'orese, "Jou, ngoi toningaku, ma 'ai ngo-ngaku ka ma etaka. So noiriwo la 'ifoloiosi tongaku!"

²⁵ Gee 'o Yesus wakimake 'o nyawa manga gudai 'ikurue yoboa widolomu, de wodorofu 'o tokatika ge'ena wongose, "'O dopongono de 'o mou ma tokata, ngoi tonisuloko nosupu 'o ngowakoka ne'ena de koidadiwau wonidongosamoli!"

²⁶ 'O tokata ge'ena 'ima'orese, ge'enaka de yadiai 'o ngowaka ma roese ge'ena 'ipatilanga, 'asa de 'isupu 'o ngowaoka ge'ena. So 'o ngowaka ge'ena 'isoka 'isongenukou, sigado 'o nyawa 'iodumu yongose 'ato, "'Una wosongenukou!"

²⁷ Ma gee 'o Yesus wa'ao wi giamika de wimomiki, de 'una mita woma'oko.

²⁸ Gee 'o Yesus 'o woakau, de 'awi do-domoteke yaika ka 'onaka de yosano, "'Ido'oa so ngomi koidadiwa mioginiiki 'o tokata ge'ena?"

²⁹ De 'o Yesus wosango, "'O tokata koge'ena ge'ena ngone poginiiki kopa'akunuwa ma ngekomo 'okia naga bato, duga ka de 'o lahidoa."

³⁰ Ge'enaka de 'o Yesus de 'awi do-domoteke yomagoraka ge'enaka dau so yogila-gila 'o Galileaka yaboa. Duga 'o Yesus womau wooluku wigi'isene 'una kiaka waika,

³¹ sababu wakidotokosi to 'una 'awi do-domoteke konee, "Ngoi 'o Nyawa ma Ngowaka 'asa 'idukula yopa-pareta manga giama ma soatika, de 'asa 'ito'oma, duga 'o wange sa'angeka de tomomiokau!"

³² 'O Yesus 'awi do-domoteke koyasahewa ge'ena, ma 'ona koyomoroinuwa yosano 'unaka.

³³ 'O Yesus de 'awi do-domoteke ya'adonika 'o Kapernaumoka 'o woa moioka, de wosano 'awi do-domoteika, "Kangano 'okia nimakaba-baili 'o ngekomino?"

³⁴ 'Ona koyosangowa sababu manga do-dagi ma sigoronaka 'ona yomakaba-baili ma ngale nago'ona 'ifoloi yoamoko gee 'onaka.

³⁵ So 'o Yesus wogogeruku de wakitoomuno de wongose 'onaka, "Nago'ona yomau 'ifoloi yoamoko, 'ona salingou yomadadi 'ifoloi yotingoono, yodadi 'o nyawa 'iodumu manga ro-riwo."

³⁶ Ge'enaka de 'o Yesus 'o ngowaka ma dingoono moi wa'eseno so wa'okode to 'ona manga bionoka deika wakoooku de wongose 'awi do-domoteika,

³⁷ "'O nyawa gee yosibosono 'o ngowaka moi 'isoka ne'ena sababu 'imoteke ngoi, ge'ena kaimatero de 'ona mita 'isibosono ngoi. De nago'ona 'isibosono ngoi, 'ona wisibosono mita 'una gee woisulo-suloko."

³⁸ Ge'enaka de 'o Yohanes wongose 'o Yesusika, "'Aba Guru, ngomi mimake 'o nyawa wimoi 'o tokata woginiiki de to ngona 'ani ronga 'Aba. So ngomi komiosidabiwa sababu 'una ko de de ngonewa."

³⁹ Ma 'o Yesus wongose, "'Uwa koniosidabiwa, sababu komoiwa 'o no-nako 'ihera-herangi yodiai de to ngoi 'ai ronga, de kage'enaka de 'isito-torou ngoino.

⁴⁰ Sababu 'o nyawa koinadu-du'udukuwa ge'ena ma ngale 'ona ngoneno.

⁴¹ Niosi-singina! 'O nyawa gee nisi'okere 'o 'akere sababu ngini ma Koana 'o Nyawa Wosilaha-laha 'awi do-domoteke, 'ona ma raiokau yamake ma parasengi."

⁴² "Nago'ona yodiai sigado moi yoti-tingoono no'ona koyongakuwau ngoino, yaowa nako 'o tapu yosipusuika manga tomaroka de yaki'umo 'o ngootuku.

⁴³ Nako de ni giama ma songona 'o sowono nodiai, ni giama ge'ena na'oguka! Yaowa ngona no'ahu de ma Jo'oungu ma Dutu, de ni giama ka ma songonaka. 'Uwa sigado de 'ani giama 'itoto-totomo nowosanga 'o narakaka, ge'ena la 'o 'uku koisonge-songenuawau kaisi'ado-'adonika.

⁴⁴ [Ge'enaka doka 'o 'uku koisonge-songenuwa, de 'o ga'aili mita kaisongenuwa.]

⁴⁵ De nako de ni dou ma songona 'o sowono nodiai, 'ani dou ge'ena na'oguka! Yaowa ngona no'ahu de ma Jo'oungu ma Dutu de ni dou ka ma songonaka, 'uwa sigado de 'ani dou 'itoto-totomo de ni'umo 'o narakaka.

⁴⁶ [Ge'enaka doka 'o 'uku koisonge-songenuwa, de 'o ga'aili mita 'isongenuwa.]

⁴⁷ Nako de ni ako ma songona 'o sowono nodiai, napeleurika ni ako ge'ena! Yaowa ngona nowosanga ma Jo'oungu ma Dutu 'awi Dunia ma Sungika ni ako ka ma songonaka, 'uwa sigado 'ani ako ngai modidioka de ni'umo 'o narakaka.

⁴⁸ [Ge'enaka doka 'o 'uku koisonge-songenuwa de 'o ga'aili mita 'isongenuwa.]

⁴⁹ 'O nyawa moi-moi 'asa yakisitebini de 'o 'uku, 'isoka 'o su-suba 'o haewani 'isitebini de 'o gasi la ma Jo'oungu ma Dutu woduaka.

⁵⁰ 'O gasi ge'ena yaowa, ma nako koiosawau, kaidadiosi padiai 'iosali? So ngini 'o duniaka ne'ena salingou 'isoka 'o gasi yaowa-owa, ge'ena la ngini nio'ahu nimakalega moi de moi."

Markus

Video Markus 9

Ikuti Kami:

KONTAK | PARTISIPASI | DONASI