Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi kebala Yésus, "Ngerawé do'-do', inan rat arangdeh luk tuped ieni luk na miak kali' maté kareb nateh ideh nier Imet Allah macing dengan laludneh."
2 Pangeh anem aco Yésus nenguit Pétrus, Yakub, idi Yahya amé' setau' luun aceh pegkung luk medita', idi ayuNeh nisu' pa kiungdeh.
3 Idi ayungNeh merasat, idi pelaba buda', pad seburur lemulun bang tana' ini na miak mupu' pad mebuda' kudeng ineh.
4 Idi diteluh nenier Elia idi Musa nepebala-pebala dengan Yésus.
5 Idi kebala Pétrus nan Yésus, "O Guru, do' tau tudo ieni; nima' nekai mudut teluh lepo, sebuleng kuanMu, sebuleng kuan Musa, idi sebuleng kuan Elia."
6 Ngaceku na ieh kali' anun luk miak belénneh ngaceku ideh pelaba tot.
7 Idi inan aceh laput luk nengelungung nedeh, idi inan aceh tang rat bang laput ineh luk nepebala, "Ini AnakKu luk inanKu mawa, do' muyuh ninger Neneh."
8 Idi diteluh nenier libut-libut, idi na ideh kali' seburur lemulun pana', iamo' Yésus mo'.
9 Idi laba' ideh temurun rat luun pegkung ineh, idi Yésus nemebpeng nediteluh na mada' luk sinierdeh ineh kuan seburur lemulun pana', pad pelaba karebneh Anak-Lemulun pangeh tumui rat arang lun naté.
10 Idi diteluh nemaya' balaNeh, idi nengitun seburur dengan seburur, "Anunké ilung bala, tumui rat arang lun naté ineh?"
11 Idi ideh nengitun Yésus, keburi'deh, "Ngudehké guru-guru Ukum nepebala, idi na miak na Elia miak macing atun?"
12 Idi kebala Yésus, "Matu Elia macing atun pad nganau' amung-amung temina'. Iamo' kudeng apehké luk inayud ratnan Anak-Lemulun, idi Ieh miak mabeh mula' dereh idi talan lemulun?
13 Ui pebala nemuyuh, idi Elia ineh pangeh nacing, idi ideh nenganau' kuanneh anun-anun luk piandeh sebuleng, maya' kudeng luk inayud ratnan ieh."
14 Kareb ideh nacing inan anak-anak sekola'Neh, idi ideh nenier nelun mula'. Idi guru-guru Ukum nengitun-ngitun anak sekola'Neh.
15 Idi kareb lun mula' nenier Yésus idi ideh pelaba awa, idi nupun nepetabi' Neneh.
16 Yésus nengitun anak-anak sekola'Neh, "Anunké luk inan muyuh pesaad?"
17 Idi seburur rat arang lun mula' ineh nepebala, "O Guru, ui pangeh nenguit kuanMu anakku luk deléi luk sinuet ada' pad ieh mebegkeh.
18 Idi iapeh-iapeh luk inan ada' ineh semuet neneh, idi ieh ngeluka' neneh; idi tangneh melapa' idi lipenneh pekatep, idi ieh kukeng. Idi ui pangeh nemutuh anak-anak sekola'Mu nala' ada' ineh, iamo' na ideh miak."
19 Kebala Yésus nedeh, "O inul luk na manu! Tuda' ioké Ui tudo dengan muyuh? Tuda' ioké Ui mekadang niat kuan muyuh? Do' nguit neneh amé' Negku."
20 Idi ideh nenguit anak ineh iné' Neneh. Kareb ada' ineh nekali' Yésus, idi petacu ieh nengeluka' anak ineh, pad ieh nebpeh luun tana' idi rier-rier dengan tangneh melapa' teh.
21 Idi Yésus nengitun taman anak ineh, "Tuda' ioké ini pangeh nangun neneh?" Idi keburi'neh, "Rat ieh isuut.
22 Idi megéi' ieh talanneh bang apui idi bang abpa', ngaceku ieh sikal ngaté neneh. Ngaceku ineh kudeng Iko miak ngedengan neneh, do' méi' nekai idi ngedengan nekai."
23 Iamo' kebala Yésus, "Matu, kudeng iko miak! Luk amung-amung miak mangun kuan lemulun luk manu."
24 Idi taman anak ineh nengitang idi nangi', kebalaneh, "Ui inan anu sen, iamo' na petap. Ngedengan anuku ineh!"
25 Idi Yésus nenier lun mula' luk nupun pamung déi', idi Ieh nemebpeng ada' ineh idi nepebala, "O ada' luk mebegkeh idi mebengel, Ui ngecuk namu remuat rat neneh, idi aleg iko semuet baruh teh."
26 Idi ada' ineh nengeluka' neneh teh, idi neremuat. Idi anak ineh mepad kudeng butung, pad lun mula' ineh nepebala, "Ieh naté."
27 Iamo' Yésus nengimet ticu'neh idi nengiding neneh, idi ieh netumui.
28 Kareb Yésus pangeh nesemuet bang ruma' idi anak-anak sekola'Neh nengitun Neneh dengan lulem, keburi'deh, "Anunké punneh kai ini na miak nala' ada' ineh?"
29 Kebala' Yésus, "Ada' luk kudeng ineh na miak ruaten dengan anun-anun imao' dengan sembayang."
30 Idi ideh nenecan bawang ineh, idi nenalan lemaba Galilia, iamo' Yésus na sikal seburur pana' kali' Neneh,
31 ngaceku Ieh uned mada' anak-anak sekola'Neh, kebalaNeh, "Anak-Lemulun barén bang palad lemulun, idi lemulun miak ngaté Neneh. Kareb Ieh pitayendeh, idi pangeh teluh aco, idi Ieh miak tumui teh."
32 Iamo' na ideh kali' ilung bala ini, idi ideh matot ngitun Neneh teh.
33 Idi ideh nacing déi' Kapernaum. Kareb Yésus nacing déi' ruma', idi Ieh nengitun anak-anak sekola'Neh, "Anunké luk inan muyuh pesaad kareb muyuh maya' dalan?"
34 Iamo' ideh pirud, ngaceku ideh pangeh pesaad déi' arang dalan ratnan idéké luk meluun rayeh.
35 Idi Yésus netudo idi nenawar pulu' dueh anak sekola' ineh, kebalaNeh, "Idé-idé luk sikal amé' pa atun, do' ieh amé' pa muci lun baken, idi mangun ku lun ngasa' amung-amung lemulun."
36 Ieh nengalap seburur anak luk isuut, idi nenaped neneh arangdeh. Kareb Ieh pangeh nengapel neneh idi keburi'Neh nedeh teh,
37 "Idé-idé luk nganak seburur anak luk isuut mepad kudeng anak ini bang ngadanKu, idi ieh luk nganak Negku; idi idé-idé luk nganak Negku ini, setuneh baken ieh nganak Negku iamo' Ieh luk pangeh nengecuk Negku."
38 Kebala Yahya Neneh, "O Guru, kai pangeh nenier seburur lemulun luk nala' ada' dengan ngadanMu, idi kai nemebpeng neneh ngaceku na ieh maya' netau."
39 Iamo' keburi' Yesus, "Aleg mebpeng neneh, ngaceku na luk idi seburur pana' nganau' kekamen luk melalud dengan ngadanKu, idi petacu ngedat Negku.
40 Ngaceku lemulun luk na sikal metueh rat Negku, ieh ineh luk lun dengan tau.
41 Meluun teh, idé-idé luk maré luk rupen ratnan sesangkir abpa' pana' ngaceku ngadanKu, idi ngaceku muyuh ini lun dengan Keristus, ngaerawé do'-do', na tabparneh ineh miak metutu' peh.
42 "Idé-idé luk ngesabeng seburur rat arang anak luk isuut luk manu Negku ini, meluun do' kuanneh kudeng aceh batu tekalan luk rayeh betin i dierneh idi ieh miak talan bang abpa' rayeh.
43 Idi kudeng ticu'mu ngesabeng namu, do' nangal neneh, ngaceku meluun do' iko semuet bang ulun luk meruked dengan ticu' luk sebuleng, ratnan iko semuet bang takung apui dengan ticu' luk dueh, ieh ineh bang apui luk na miak uen ngilep.
44 Déi uleddeh na miak maté, idi apui na miak uen ngilep.
45 Idi kudeng kukudmu ngesabeng namu, do' nangal neneh, ngaceku meluun do' iko semuet bang ulun luk meruked dengan kukud luk sebuleng ratnan iko talan bang takung apui dengan kukud luk dueh.
46 Déi' uleddeh na miak maté, idi apui na miak uen ngilep.
47 Idi teh, kudeng matehmu ngesabeng namu, do' nakul neneh, ngaceku meluun do' iko semuet bang Imet Allah dengan mateh luk sebuleng ratnan iko talan bang takung apui dengan mateh luk dueh.
48 Déi' uleddeh na miak maté, idi apui na miak uen ngilep.
49 "Ngaceku anid-anid burur miak uen ngeligan ku apui mepad kudeng aceh baré uen nucu' ku tucu'.
50 Idi tucu' ineh do', iamo' kudeng tucu' ineh pangeh metalang, dengan anunké ieh miak uen muyuh mepaci' teh? Do' inan tucu' bang niat muyuh, idi pedo' seburur dengan seburur."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA