Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa bemanik malik tipaq ie pade, "Tiang badaq side pade: Setetune lẽq antare side pade saq araq lẽq deriki araq saq ndẽq gen ninggal, sendẽqman serioq Kerajaan Allah rauh siq kuase!"

² Enem jelo sesampun nike, Deside Isa gadingang Petrus, Yakub dait Yahya, nyendiri ojok sopoq gunung saq atas. Beterus Deside Isa begentiq rue lẽq julun ie pade.

³ Kuace-Ne jari putẽq ngempor. Ndẽq araq sopoq dengan tukang popoq lẽq dunie niki saq tao mopoq putẽqne maraq nike.

⁴ Beterus ketelu pengiring-Ne nike serioq Deside Isa kenyeke bebaos kance Elia dait Musa.

⁵ Make Petrus matur tipaq Deside Isa, "Paq Guru, maiq gati ite lẽq deriki. Silaq tiang pade penganjeng telu kẽmah, sopoq umaq Pelungguh, sopoqne Musa dait sopoqne malik umaq Elia."

⁶ Setetune Petrus ndẽq nenaoq napi saq harus ie ucapang, sẽngaq ie kance kedue baturne kenyeke takut gati.

⁷ Beterus awan turun lẽq atas ie pade, dait lẽman awan nike kedengahan suare, "Niki Bije Tiang saq Tiang kasihin. Pade dengahang Ie!"

⁸ Becat-becat ie pade serioq sekelining ie pade, dait ndẽq araq malik serioq sai-sai lẽq derike bareng ie pade, kecuali Deside Isa.

⁹ Sewaktu ie pade turun lẽman gunung nike, ie pade teperinget siq Deside Isa, "Ndaq tuturang lẽq sai juaq napi saq side pade serioq nike, sendẽqman Bije Manusie idup malik lẽman ninggal-Ne."

¹⁰ Ie pade taat lẽq pesen nike, laguq lẽq antare ie pade mẽsaq mulai ngeraosang napi maksut Deside Isa, "Idup malik lẽman ninggal-Ne".

¹¹ Make ie pade metakẽn lẽq Deside Isa, "Kembẽq ahli-ahli Taurat bebase bahwe Elia harus rauh juluan?"

¹² Jawab Deside Isa, "Mule tetu Elia gen dateng juluan dait ie gen siepang selapuqne. Laguq berembẽ halne siq Bije Manusie? Kembẽq lẽq dalem Kitab Suci tetulis bahwe Ie gen luwẽq menderite dait tehine siq dengan?

¹³ Laguq Tiang badaq side: Elia sampun dateng, dait dengan-dengan perlakuang ie semẽlẽ angen ie pade. Nike sesuai kance saq sampun tetulis dalem Kitab Suci mengenai diriqne."

¹⁴ Sewaktu Deside Isa dait ketelu pengiring-Ne sampun araq malik bareng pengiring-pengiring saq lainne, ie pade serioq luwẽq dengan lẽq derike. Araq ahli-ahli Taurat kenyeke besoal jawab kance pengiring-pengiring Deside Isa.

¹⁵ Sewaktu dengan-dengan nike serioq Deside Isa, ie pade kemomotan, terus pelai nyambut Ie.

¹⁶ "Napi saq side pade masalahang kance ahli-ahli Taurat nike?" Deside Isa beketuan lẽq pengiring-pengiring-Ne.

¹⁷ Jawab salaq sopoq lẽman dengan luwẽq nike, "Bapaq Guru, tiang jauq anak tiang tipaq Pelungguh. Ie tekuasein siq roh jahat saq miaq ie jari pakoq.

¹⁸ Lamun roh nike nyerang ie, awakne tetimpak-timpak ojok tanaq, biwihne bekowok, gigine bekeretek dait selapuq awakne jari kojor. Tiang tunas pengiring-pengiring Pelungguh sediq roh jahat nike, laguq ie pade ndẽq tao."

¹⁹ Make Deside Isa bemanik tipaq ie pade, "Luar biase side pade niki! Side pade tetu-tetu dengan saq ndẽq percaye. Jangke piran Tiang harus araq kance side pade dait sabar tipaq side pade? Jauq kanak nike ojok deriki!"

²⁰ Beterus ie pade jauq kanak nike ojok Deside Isa. Waktu roh jahat nike serioq Deside Isa, ie piaq awak kanak nike kojor-kojor sehingge kanak nike geriq begoloq-goloq lẽq tanaq. Biwihne bekowok.

²¹ Terus Deside Isa beketuan lẽq amaq kanak nike, "Sampun pire ngonẽq ie maraq niki?" "Lẽman ie masih kodẽq!" jawab amaqne.

²² "Rimpes gati roh jahat nike berusahe nyematẽq ie siq care geriqang ie ojok dalem api atao ojok dalem aiq. Keranaq nike lamun Pelungguh bau nulung, tulung tiang pade dait periak lẽq tiang pade!"

²³ "Napi basende? Lamun Pelungguh bau?" jawab Deside Isa. "Ndẽq araq saq mustahil umaq dengan saq percaye!"

²⁴ Langsung amaq kanak nike bejawab siq suare saq belẽq, "Tiang percaye! Laguq iman tiang kurang. Tulung tiang adẽq tiang lebih percaye malik!"

²⁵ Sewaktu Deside Isa cingakin dengan luwẽq mulai dateng bekerimpun lẽq derike, Ie prẽntahang roh jahat nike. Manik-Ne, "Roh pakoq dait kedok, Tiang prẽntahang sugul lẽman kanak niki dait ndaq gati tame malik ojok dalemne."

²⁶ Roh jahat nike nyurak, dait awak kanak nike kojor-kojor, beterus sugul lẽman kanak nike. Kanak nike penggitan maraq mayit sehingge selapuq dengan bebase, "Ie sampun milinang!"

²⁷ Laguq Deside Isa negel imene dait tulung ie ures. Beterus kanak nike ures.

²⁸ Sesampun Deside Isa lẽq gedẽng, pengiring-pengiring-Ne secare husus parek dait metakẽn, "Kembẽq tiang pade ndẽq bau sediq roh jahat nike?"

²⁹ Jawab Deside Isa, "Roh jahat saq maraq niki cume bau tesediq siq do'e."

³⁰ Deside Isa dait pengiring-pengiring-Ne bilin taoq nike, dait lanjutang pemargian-Ne langan Galilea. Ie nẽnten kayun araq dengan saq nenaoq hal nike;

³¹ sẽngaq Ie kenyeke ngajah pengiring-pengiring-Ne. Deside Isa bemanik tipaq pengiring-pengiring-Ne, "Bije Manusie gen teserahang tipaq kuase manusie dait Ie gen tematẽq, laguq lẽq jelo ketelu Ie gen idup malik!"

³² Pengiring-pengiring Deside Isa ndẽq ngerti napi arti manik Deside Isa nike, laguq ie pade takut nakẽnang hal nike lẽq Deside Isa.

³³ Deside Isa dait pengiring-pengiring-Ne rauh lẽq Kapernaum. Sesampun lẽq gedẽng, Deside Isa beketuan lẽq pengiring-pengiring-Ne, "Napi saq side pade raosang lẽq tengaq langan onẽq?"

³⁴ Ie pade ndẽq bejawab, sẽngaq lẽq tengaq langan ie pade betungkasan mengenai sai saq paling belẽq lẽq antare ie pade.

³⁵ Deside Isa melinggih, beterus ngemanikang kedue olas pengiring-Ne nike. Ie bemanik lẽq ie pade, "Dengan saq mẽlẽ jari saq penembẽq, ie harus jari saq penutuq dait harus jari pelayan selapuq dengan."

³⁶ Beterus Deside Isa bait sopoq kanak kodẽq, dait penganjeng-Ne kanak nike lẽq julu ie pade selapuq. Deside Isa kapong kanak nike dait bemanik lẽq pengiring-pengiring-Ne,

³⁷ "Dengan saq nerimaq sopoq kanak maraq niki lantaran Tiang, artine nerimaq Tiang. Dait dengan saq nerimaq Tiang, ie ndẽq nerimaq Tiang doang, laguq nerimaq ẽndah Ie saq ngutus Tiang."

³⁸ Beterus Yahya matur lẽq Deside Isa, "Paq Guru, tiang pade serioq dengan sediq roh jahat siq pesẽngan Pelungguh. Terus tiang pade balaq ie sẽngaq ie ndẽq lẽman kelompoq ite."

³⁹ Laguq jawab Deside Isa, "Ndaq balaq ie, sẽngaq ndẽq araq sopoq dengan juaq saq miaq keajaipan siq aran Tiang, lẽq waktu nike ẽndah ngucapang hal saq lengẽ tipaq Tiang.

⁴⁰ Sẽngaq dengan saq ndẽq ngelawan ite, artine bepihak lẽq ite.

⁴¹ Pade inget! Dengan saq ngebẽng nginem tipaq side lantaran side pade pengiring Almasih, ie pasti gen nerimaq upaqne."

⁴² "Sai-sai saq jari penyebap salaq sopoq lẽman kanak-kanak kodẽq saq percaye lẽq Tiang niki bedose, solahan lamun batu penggilingan tetaliq lẽq belongne, dait ie tetetẽh ojok dalem segare.

⁴³ Lamun imende miaq side bedose, peleng ime nike! Solahan side ndẽq bedowẽ ime setowẽq laguq idup bareng kance Allah, ketimbang bedowẽ due ime, laguq tetetẽh ojok api nerake saq kekel.

⁴⁴ [Lẽq derike api ndẽq iniq pedaq, dait ulet ndẽq iniq matẽ.]

⁴⁵ Dait lamun naẽnde miaq side bedose, peleng naẽ nike. Solahan side ndẽq bedowẽ naẽ setowẽq laguq side idup bareng kance Allah, ketimbang bedowẽ due naẽ, laguq tetetẽh ojok dalem api nerake.

⁴⁶ [Lẽq derike api ndẽq iniq pedaq dait ulet ndẽq iniq matẽ.]

⁴⁷ Lamun penentengde miaq side bedose, luit penentengde! Solahan side tame Kerajaan Allah bedowẽ sopoq penenteng, ketimbang side dait kedue penentengde tetetẽh ojok dalem api nerake.

⁴⁸ Lẽq derike api ndẽq iniq pedaq dait ulet ndẽq iniq matẽ.

⁴⁹ Sebilang dengan gen tesiaq siq api.

⁵⁰ Sie nike solah, laguq lamun jari tawah, napi bau tepaẽqang malik? Jari, side pade harus jari maraq sie dait -- idup damẽ sopoq kance saq lain."

Markus

Video Markus 9

Ikuti Kami:

KONTAK | PARTISIPASI | DONASI